പാനൂര്: ആര്എസ്എസ് കണ്ണൂര് ജില്ലാ ശാരീരിക് പ്രമുഖായിരുന്ന കതിരൂരിലെ എളന്തോട്ടത്തില് മനോജിന്റെ രണ്ടാം വീര ബലിദാനത്തിന്റെ രണ്ടാം വാര്ഷിക ദിനം ഇന്ന്.
2014 സെപ്തംബര് 1ന് രാവിലെ വീട്ടില് നിന്നും മാരുതി ഓമ്നി വാനില് തലശ്ശേരിയിലേക്ക് പോകവേ ഉക്കാസ് മൊട്ടയില്വെച്ച് സിപിഎം അക്രമിസംഘം മനോജ് സഞ്ചരിച്ച വാനിനു നേരെ ബോംബെറിയുകയും നിയന്ത്രണംവിട്ട വാന് റോഡരികിലെ മതിലിലിടിച്ച് നില്ക്കുകയായിരുന്നു. ഓടിയെത്തിയ അക്രമിസംഘം മനോജിനെ വാനില് നിന്നും പിടിച്ചിറക്കി വെട്ടിക്കൊലപ്പെടുത്തുകയും നിഷ്ഠൂരമായി മനോജിന്റെ തലയറുത്തുമാറ്റുകയുമായിരുന്നു.
വീരബലിദാന വാര്ഷിക ദിനമായ ഇന്ന് ഈ വീരപുത്രനെ നാടു നമിക്കും. കണ്ണൂരിന്റെ അഭിമന്യൂവിന് ആയിരങ്ങള് അന്ത്യാഞ്ജലിയര്പ്പിക്കും.
നാട്ടുകാരുടെയെല്ലാം പ്രിയപ്പെട്ടവനായിരുന്ന സ്വര്ഗ്ഗീയ മനോജ് സിപിഎമ്മിന്റെ രാവണന്കോട്ടയില് സംഘാദര്ശം വ്യാപിപ്പിക്കാന് തന്റേടം കാണിച്ച്, നിഴല് പോലെ മരണമുണ്ടായിട്ടും പതറാതെ അവസാനശ്വാസം വരെ പോരാട്ടത്തിന്റെ പാതയില് പൊരുതിനിന്ന അഭിനവ അഭിമന്യുവായിരുന്നു. കണ്ണൂരിലെ സിപിഎം അക്രമവും അധിനിവേശവും ജനജീവിതത്തെ സാരമായി ബാധിച്ചൂവെന്നത് ചരിത്ര വസ്തുതയാണ്. പതിറ്റാണ്ടുകളായി തുടരുന്ന അക്രമത്തില് എത്രയോ സംഘ കുടുംബങ്ങള് നിരാലംബരായി. 1969ല് തലശേരിയിലെ വാടിക്കല് രാമകൃഷ്ണനെന്ന ആര്എസ്എസ് പ്രവര്ത്തകനെ കൊന്നു കൊണ്ട് ആരംഭിച്ച സിപിഎം അസഹിഷ്ണുത പയ്യന്നൂരിലെ ബിഎംഎസ് നേതാവ് സി.കെ.രാമചന്ദ്രനില് എത്തിനില്ക്കുന്നു. അക്രമത്തിലൂടെ ഭീതിപരത്തി തങ്ങളുടെ ആധിപത്യം സൃഷ്ടിക്കാമെന്ന മിഥ്യാധാരണയാണ് സിപിഎമ്മിനെ കൊലപാതകത്തിന് പ്രേരിപ്പിക്കുന്നത്. എന്നാല് ഓരോ ബലിദാനങ്ങളും ഓരോ സ്വയംസേവകനിലും പ്രവര്ത്തന സക്രിയത വര്ദ്ധിപ്പിക്കുകയാണ്.
മനോജിന്റെ ധീരബലിദാനം ദേശീയതലത്തിലും ഏറെ ചര്ച്ചയായി. ഇന്നു സിപിഎമ്മിനെതിരെ അങ്ങ് രാജ്യതലസ്ഥാനത്തടക്കം ഉയര്ന്നുകൊണ്ടിരിക്കുന്ന പ്രതിഷേധം ശുഭസൂചകമാണ്. മനോജ് വധം സിബിഐ അന്വേഷിച്ചതും കൊലപാതകത്തിലെ സൂത്രധാരനെ മണിച്ചിത്രത്താഴിട്ടു പൂട്ടിയതും നീതിനിഷേധിക്കപ്പെട്ട എത്രയോ കുടുംബങ്ങള്ക്ക് ആശ്വാസവും പ്രതീക്ഷയും നല്കുന്നതായിരുന്നു. മനോജിനെ കൊലപ്പെടുത്തിയവര് പ്രതിസന്ധിയിലേക്ക് കൂപ്പുകുത്തി സമൂഹത്തില് അപഹാസ്യമാക്കപ്പെടുന്നതും സമൂഹം കണ്ടുകൊണ്ടിരിക്കുകയാണ്. കഴിഞ്ഞ വര്ഷം മനോജ് കൊലചെയ്യപ്പെട്ട ദിനത്തില് കൊന്നസ്ഥലത്ത് നായയെ കെട്ടിതൂക്കി സിപിഎം തങ്ങളുടെ സംസ്ക്കാരം എന്തെന്നു കാണിച്ചു. കൊലപാതകത്തിന് നേതൃത്വം നല്കിയ സിപിഎം നേതാവിന്റെ മകന് നവമാധ്യമങ്ങളില് കൊലയാളികള്ക്ക് അഭിവാദ്യമര്പ്പിച്ചും തരംതാണു. എന്നാല് കണ്ണൂരിലെ സ്വയംസേവകര് സഹനത്തിന്റെ പാതയില് നാടിന്റെ സമാധാനത്തിനായി നല്ല നാളെയുടെ പുലരിക്കായി കൈകോര്ത്തിരിക്കുന്നു.
മനോജ് ബലിദാനദിനത്തില് സേവനപ്രവര്ത്തനങ്ങളില് ശ്രദ്ധകൊടുത്ത് പ്രണാമം അര്പ്പിക്കുകയാണ് സ്വയംസേവകര്. കഴിഞ്ഞ വര്ഷം നേത്രദാനം നടത്തി മാതൃകയായ സ്വയം സേവകര് നാളെ തലശേരി ജനറല് ആശുപത്രിയില് രക്തദാനം നല്കും. രാവിലെ 7ന് ഡയമണ്ട് മുക്കിലെ മനോജിന്റെ ബലികുടീരത്തില് പുഷ്പാര്ച്ചന നടക്കും. തുടര്ന്ന് നടക്കുന്ന അനുസ്മരണ പരിപാടിയില് ആര്എസ്എസ് അഖിലഭാരതീയ സഹപ്രചാര് പ്രമുഖ് ജെ.നന്ദകുമാര് പ്രഭാഷണം നടത്തും.
