എടത്വ: വീട്ടില് പാചകത്തിന് എത്തിയ ആള് കുട്ടിയുടെ മാല മോഷ്ടിച്ച് കടന്നു. മാലമോഷ്ടാവിനെ മണിക്കൂറുകള്ക്കകം എടത്വ പോലീസ് പിടികൂടി. നിരണം കള്ളിയ്ക്കല് പടിഞ്ഞാറേതില് അബ്ദുള് സലാം (ഷിബു-42) ആണ് പിടിയിലായത്. തലവടി പരുമൂട്ടില് ആന്റണിയുടെ വീട്ടിലെ ബര്ത്തഡേ പാര്ട്ടിയുടെ ആഘോഷത്തിന്റെ ഭാഗമായി പാചകത്തിന് എത്തിയതായിരുന്നു ഷിബു.
ആന്റണിയുടെ മകള് എലന ഡൈനിങ് ഹാളിലെ മേശപുറത്ത് ഊരിവച്ച നാലരപവന്റെ മാല കാണതായതിനെ തുടര്ന്ന് എടത്വ പോലീസില് പരാതി നല്കുകയായിരുന്നു. എടത്വ പ്രിന്സിപ്പല് എസ്ഐ എസ്. ശ്രീകുമാറിന്റെ നേതൃത്വത്തില് പോലീസ് സ്ഥലത്തെത്തി സംശയമുള്ളവരെ ചോദ്യം ചെയ്യുകയ്യുകയും ചോദ്യചെയ്യലിനിടെ ഷിബു കുറ്റം സമ്മതിക്കുകയുമായിരുന്നു. ഷിബുവിന്റെ വീടിന് സമീപത്തായി റോഡരികില് അടയാളം വച്ച ശേഷം കുഴിച്ചിട്ടിരുന്ന സ്വര്ണ്ണം ഇന്നലെ 3.30ന് പോലീസ് കണ്ടെടുത്തു. സീനിയര് സിപിഒ മാരായ ജയചന്ദ്രന്, പ്രേംജിത്ത്, നൈനാന് എന്നിവര് എസ്ഐക്കൊപ്പമുണ്ടായിരുന്നു. ജില്ലാ പോലീസ് മേധാവിയുടെ നിര്ദ്ദേശപ്രകാരം മറ്റ് കുറ്റകൃത്യങ്ങളില് പ്രതി ഉള്പെട്ടിട്ടുണ്ടോ എന്ന് അറിയാന് കൂടുതല് ചോദ്യം ചെയ്തശേഷം ഷിബുവിനെ ഇന്ന് കോടതിയില് ഹാജരാക്കും.
