ന്യൂദൽഹി: പാക് അധിനിവേശ കശ്മീർ ഭാരതത്തിന്റെ ഭാഗമാണെന്ന് പ്രധാനമന്ത്രി നരേന്ദ്ര മോദി. കശ്മീർ വിഷയത്തിൽ കേന്ദ്ര സർക്കാർ വിളിച്ചുചേർത്ത സർവ്വകക്ഷി യോഗത്തിൽ പ്രസംഗിക്കവെയാണ് അദ്ദേഹം പാക് അധിനിവേശ കശ്മീർ വിഷയത്തിൽ നിലപാട് വ്യക്തമാക്കിയത്.
ഹിസ്ബുൾ മുജാഹിദ്ദീൻ അംഗം ബുർഹാൻ വാനിയുടെ മരണത്തെ തുടർന്ന് കശ്മീരിൽ തുടരുന്ന സംഘർഷങ്ങൾക്ക് രാഷ്ട്രീയ പരിഹാരം തേടിയാണ് കേന്ദ്ര സർക്കാർ സർവ്വകക്ഷി യോഗം വിളിച്ചത്. രാജ്യ സുരക്ഷയുടെ കാര്യത്തിൽ ഒരു വിട്ടുവീഴ്ചയുമില്ലെന്ന് വ്യക്തമാക്കിയ പ്രധാനമന്ത്രി കശ്മീരിലെ ജനങ്ങളുടെ വിശ്വാസം നേടിയെടുക്കേണ്ടതുണ്ടെന്നും പറഞ്ഞു.
എന്നാൽ എംപിമാരുടെ സർവ്വകക്ഷി സംഘത്തെ കശ്മീരിലേക്കയക്കണമെന്ന് പ്രതിപക്ഷ പാർട്ടികളുടെ ആവശ്യം കേന്ദ്ര സർക്കാർ തള്ളി. നിലവിലെ സാഹചര്യത്തിൽ സർവ്വകക്ഷി സംഘത്തെ കശ്മീരിലേക്ക് അയക്കാൻ സാധിക്കില്ലെന്ന് കേന്ദ്ര സർക്കാർ വ്യക്തമാക്കുകയും ചെയ്തു.
