പുനലൂര്: അര്യങ്കാവില് നിയന്ത്രണം വിട്ട ചരക്ക് ലോറി കടയിലേക്ക് പാഞ്ഞുകയറി രണ്ടുപേര് മരിച്ചു. ഇന്നലെ ഉച്ചക്ക് 1.40നാണ് അപകടം.
ആര്യങ്കാവ് ചെക്ക് പോസ്റ്റിന് മുന്നില് കമ്പ്യൂട്ടര് സെന്റര് നടത്തുന്ന കരിമ്പിന്തോട്ടം കാര്ത്തിക ഭവനില് അനില്കുമാര്(41), സുഹൃത്ത് കരവാളൂര് സതീഷ്ഭവനില് സതീഷ്(32) എന്നിവരാണ് മരണപ്പെട്ടത്. തമിഴ്നാട്ടില് നിന്നും കേരളത്തിലേക്ക് സിമന്റുമായി വന്ന ടോറസാണ് അപകടം വരുത്തിയത്. കോട്ടവാസല് ഭാഗത്ത് നിന്നും വന്ന ലോറി നിയന്ത്രണം വിട്ട് ചെക്ക്പോസ്റ്റ് ക്യാബിനും തകര്ത്ത ശേഷം കമ്പ്യൂട്ടര് സെന്ററിലേക്ക് പാഞ്ഞു കയറുകയായിരുന്നു. ഈ സമയം കടയിലുള്ളിലായിരുന്ന അനില്കുമാറിനെയും സതീശിനെയും ഇടിച്ചുതെറിപ്പിച്ച ശേഷമാണ് ലോറി നിന്നത്. ലോറിയുടെ വരവ് കണ്ട ആളുകള് ഓടി രക്ഷപ്പെടുകയായിരുന്നു.
അപകടമുണ്ടായ സമയം തന്നെ ഓടികൂടിയവര് ഇരുവരെയും പുനലൂര് താലൂക്ക് ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. അപകടം നടന്നയുടന് തന്നെ ലോറി ഡ്രൈവര് ഓടി രക്ഷപ്പെട്ടു.
രാജിയാണ് മരിച്ച അനില്കുമാറിന്റെ ഭാര്യ. സതീഷ് അവിവിവാഹിതനാണ്. അമ്മ കോമള. സിന്ധു, സതി എന്നിവര് സഹോദരിമാരാണ്. തെന്മല പോലീസ് കേസെടുത്തു.
