വാഷിങ്ടണ്: ലോകത്തെ നടുക്കിയ 9/11 ഭീകരാക്രമണവുമായി സൗദി രാജകുടുംബാംഗത്തിന് ബന്ധമെന്നു സൂചിപ്പിക്കുന്ന റിപ്പോര്ട്ട് പുറത്ത്. 1983 മുതല് 2005 വരെ യുഎസില് സൗദിയുടെ അംബാസഡറായിരുന്ന ബന്ദര് ബിന് സുല്ത്താന് രാജകുമാരനെതിരെയാണ് പരാമര്ശം. ഭീകരാക്രമണത്തില് പങ്കെടുത്തവരുമായി ബന്ധമുള്ള അല് ഖ്വയ്ദയുടെ യുഎസിലെ റിക്രൂട്ടിങ് ഏജന്റ് അബു സുബൈദയുമായും, മറ്റൊരു സഹായി ഒസാമ ബസ്സനനുമായും അടുപ്പമെന്നാണു കണ്ടെത്തല്. യുഎസ് കോണ്ഗ്രസിന് നല്കാന് എഫ്ബിഐ തയാറാക്കിയ 28 പേജുള്ള റിപ്പോര്ട്ടിലാണ് ഈ വിവരങ്ങള്. ഇതേക്കുറിച്ച് പ്രതികരിക്കാന് എഫ്ബിഐയോ സൗദി എംബസിയോ തയാറായിട്ടില്ല.
2002ല് പാക്കിസ്ഥാനില് നിന്നാണ് അബു, എഫ്ബിഐയുടെ പിടിയിലായത്. ഒസാമ ബിന് ലാദന്റെ അടുത്തയാളായിരുന്ന ഇയാളുടെ ഫോണ് ബുക്കില് നിന്ന് ബന്ദറുടെ ഫോണ് നമ്പര് ലഭിച്ചു. ആരെന്നു രേഖപ്പെടുത്താതെയാണ് സൂക്ഷിച്ചിരുന്നത്. മറ്റൊരു നമ്പര് കൂടി ഇത്തരത്തില് കിട്ടി. കൊളറാഡൊയിലെ ആസ്പെനില് ബന്ദറിന്റെ ഉടമസ്ഥതയിലുള്ള എസ്റ്റേറ്റിലെ മാനേജരുടെ നമ്പറായിരുന്നു ഇതെന്ന് സെനറ്റിനായി റിപ്പോര്ട്ട് ക്രോഡീകരിച്ച കോണ്ഗ്രസ് കമ്മീഷന് അംഗം ബോബ് ഗ്രഹാം പറഞ്ഞു.
യുഎസിലെ സൗദി വംശജര് 9/11 നു പിന്നില് പ്രവര്ത്തിച്ചവരെ സഹായിച്ചെന്നും റിപ്പോര്ട്ടില് പറയുന്നു. അത്തരത്തിലൊരാളാണ് ഒസാമ ബസ്സനന്. സൗദി വിദ്യാഭ്യാസ വകുപ്പിന്റെ വാഷിങ്ടണിലെ ഉദ്യോഗസ്ഥനായിരുന്ന ഇയാള്ക്ക്, രാജകുമാരനും ഭാര്യയും വലിയൊരു തുക നല്കി. പെന്റഗണ് ആക്രമിച്ച വിമാനം തട്ടിയെടുത്ത നവാഫ് അല് ഹസ്മി, ഖാലിദ് മിഹധര് എന്നിവരുടെ സാന് ഡീഗോയിലെ അയല്വാസിയായിരുന്നു ഇയാള്. ഇവരെ സഹായിച്ച കാര്യം ബസ്സനന് എഫ്ബിഐക്കു മുന്നില് സമ്മതിച്ചു. അതേസമയം, ആക്രമണവുമായി ബന്ദറിന് ഏതെങ്കിലും തരത്തിലുള്ള ബന്ധമുണ്ടെന്നതിന് തെളിവില്ലെന്നാണ് റിപ്പോര്ട്ട് ഉപസംഹരിച്ച് സിഐഎയും എഫ്ബിഐയും വ്യക്തമാക്കിയിട്ടുള്ളത്.
സൗദി രാജകുടുംബത്തിലെ സുല്ത്താന് ബിന് അബ്ദുള് അസീസിന് എതോപ്യക്കാരിയായ അടിമ ഖിസിറാനില് 1949 മാര്ച്ച് രണ്ടിന് ജനനം. വിദ്യാഭ്യാസത്തിനു ശേഷം സൈനിക സേവനം. 1978ല് രാജാവിന്റെ പ്രത്യേക ദൂതനായി. സൗദിക്ക് എഫ്-15 വിമാനങ്ങള് നല്കാന് യുഎസ് കോണ്ഗ്രസിനെക്കൊണ്ട് സമ്മതിപ്പിച്ചത് ബന്ദറിന്റെ മിടുക്ക്.
1983 ഒക്റ്റോബറില് യുഎസിലെ അംബാസഡറായി. റൊണാള്ഡ് റീഗന്, ജോര്ജ് ബുഷ് സീനിയര്, ബില് ക്ലിന്റണ്, ജോര്ജ് ബുഷ് ജൂനിയര് തുടങ്ങിയ പ്രസിഡന്റുമാരുമായി ബന്ധം. ഇറാഖ് യുദ്ധം, ബുഷ് സീനിയറുമായി അടുത്ത സൗഹൃദത്തിനു കാരണമായി. 2005ല് അംബാഡര് പദവിയൊഴിഞ്ഞു. ശേഷം 2015 വരെ ദേശീയ സുരക്ഷാ കൗണ്സില് ചെയര്മാനായി. ഇതിനിടെ 2012 മുതല് 2014 വരെ സിഐഎക്കു സമാനമായ ജനറല് ഇന്റലിജന്സിന്റെ തലവനുമായി. 2014 ജൂലൈ ഒന്നു മുതല് 2015 ജനുവരി 29 വരെ സൗദി രാജാവിന്റെ പ്രത്യേക ദൂതനായി.
