ന്യൂദല്ഹി: ഇടത് വിദ്യാര്ത്ഥി പ്രസ്ഥാനത്തില് നിന്നും സംഘ ശാഖയിലെത്തിയ ‘തെറ്റിന്’ ഇരുകാലുകളും നഷ്ടപ്പെട്ട ദുരനുഭവം സദാനന്ദന് മാസ്റ്റര് വിവരിക്കുമ്പോള് കേരളത്തിലെ മാര്ക്സിസ്റ്റ് ഭീകരത കണ്മുന്നില് കാണുകയായിരുന്നു ദല്ഹിയിലെ സദസ്സ്. ഗുരുവായൂര് ശ്രീകൃഷ്ണ കോളേജ് ചെയര്മാനായതിന് എബിവിപി പ്രവര്ത്തകന് സനൂപിന് ഇല്ലാതായത് ഇടത് കണ്ണിന്റെ കാഴ്ചയായിരുന്നു. ഒരക്രമത്തിനും സംഘപ്രവര്ത്തനത്തില് നിന്നും തന്നെ പിന്തിരിപ്പിക്കാനാകില്ലെന്ന് കണ്ണട നീക്കി ഇരുള് മുടിയ ഇടത് കണ്ണ് വ്യക്തമാക്കി സനൂപ് പ്രഖ്യാപിച്ചപ്പോള് ആ നിശ്ചയദാര്ഢ്യം സദസ്സും ഏറ്റുവാങ്ങി.
അമ്മ ബിജെപി സ്ഥാനാര്ത്ഥിയായതിന് സിപിഎം അക്രമികളുടെ വെട്ടേറ്റുവാങ്ങിയ ഏഴ് വയസ്സുകാരന് കാര്ത്തിക്, പ്രതീകാത്മക കുഴിമാടമൊരുക്കിയ ഇടത് വിദ്യാര്ത്ഥികളുടെ ഗുരുഹത്യക്കിരയായ പാലക്കാട് വിക്ടോറിയ കോളേജ് റിട്ട.പ്രിന്സിപ്പല് ഡോ.ടി.എന്.സരസു, എസ്എഫ്ഐ നേതാക്കളുടെ അപവാദ പ്രചാരണത്തെ തുടര്ന്ന് ആത്മഹത്യക്ക് ശ്രമിച്ച തൃപ്പൂണിത്തുറ ആര്എല്വി കോളേജിലെ ദളിത് വിദ്യാര്ത്ഥിനി ശ്രുതിമോള്, കണ്ണൂരിലെ മാര്ക്സിസ്റ്റ് ഭീകരതയെക്കുറിച്ച് ഡോക്യുമെന്ററി ചെയ്തതിന് ഭീഷണി നേരിടുന്ന സംവിധായിക അദ്വൈത കല എന്നിവര് തങ്ങളുടെ അനുഭവങ്ങള് അനാവൃതമാക്കിയപ്പോള് കേരളത്തിലെ സിപിഎം അസഹിഷ്ണുതയുടെ ആഴം തിരിച്ചറിയുകയായിരുന്നു ദല്ഹി.
കേരളത്തിലെ സിപിഎം അക്രമങ്ങള്ക്കെതിരെ സാംസ്കാരിക സംഘടനയായ നവോദയം സംഘടിപ്പിച്ച സെമിനാറാണ് ഇരകളുടെ സംഗമമായി മാറിയത്. റെട്രോസിറ്റി എന്ന് പേരിട്ട സെമിനാര് കേരളത്തിലെ സിപിഎം ഭീകരതയെ ദേശീയ തലത്തില് തുറന്നുകാട്ടി.
സെമിനാര് കേന്ദ്ര ആഭ്യന്തര സഹമന്ത്രി കിരണ് റിജിജു ഉദ്ഘാടനം ചെയ്തു. സിപിഎം അക്രമം കേരളത്തിന് മാത്രമല്ല രാജ്യത്തിന് തന്നെ കളങ്കമാണെന്ന്് അദ്ദേഹം പറഞ്ഞു. ഇടത് അധ്യാപകരുടെ രാഷ്ട്രീയ താത്പര്യങ്ങള്ക്ക് വഴങ്ങാതിരുന്നതിന്റെ പ്രതികാരമാണ് തനിക്കെതിരെ ഉണ്ടായതെന്ന് ഡോ.സരസു പറഞ്ഞു.
കോളേജിലെ നിയമം തങ്ങള്ക്ക് ബാധകമല്ലെന്നാണ് ഇടത് വിദ്യാര്ത്ഥികളുടെയും അധ്യാപകരുടെയും നിലപാട്. കേരളത്തിലെ മാര്ക്സിസ്റ്റ് ഭീകരതയില് ദേശീയ മാധ്യമങ്ങള് നിശബ്ദത പുലര്ത്തുകയാണെന്ന് അദ്വൈതകല ചൂണ്ടിക്കാട്ടി. സ്ഥാപനങ്ങള് സ്വന്തമാക്കാനും ഭരിക്കാനും എന്തും ചെയ്യാന് മടിക്കാത്തവരാണ് സിപിഎമ്മെന്ന് റെഡ്ക്രോസ് പിടിച്ചെടുക്കാന് പാര്ട്ടി നടത്തിയ ശ്രമങ്ങള് വിവരിച്ച് റെഡ്ക്രോസ് മുന് ചെയര്മാന് സുനില് സി കുര്യന് പറഞ്ഞു.
ജനാധിപത്യ വിരുദ്ധമായ സിപിഎമ്മില് നേതാക്കന്മാര്ക്കെതിരെ ശബ്ദമുയര്ത്തുന്നത് പാപമാണെന്ന് സിഎംപി നേതാവ് സി.പി.ജോണ് അഭിപ്രായപ്പെട്ടു. പാര്ട്ടിക്കുള്ളില് സിപിഎം പുലര്ത്തുന്ന അസഹിഷ്ണുതയുടെ ഇരയായിരുന്നു താന്. രാഷ്ട്രീയ എതിരാളികളെ മാത്രമല്ല സ്വന്തം പാര്ട്ടിക്കാരെപ്പോലും കൊന്നൊടുക്കുന്ന പാരമ്പര്യം മാര്ക്സിസ്റ്റ് പാര്ട്ടിക്കുണ്ട്. സിപിഎമ്മിന്റെ അസഹിഷ്ണുത ഇതര രാഷ്ട്രീയ പാര്ട്ടികള് അനുകരിച്ചാല് കേരളത്തിലും ബംഗാളിലുമല്ലാതെ സിപിഎമ്മിന് പ്രവര്ത്തിക്കാന് സാധിക്കില്ലെന്നും മാര്ക്സിസ്റ്റ് അക്രമത്തിനിരയാകുന്നവരോട് രാഷ്ട്രീയ വ്യത്യാസമില്ലാതെ ഐക്യപ്പെടുമെന്നും സി.പി.ജോണ് വ്യക്തമാക്കി.
മനുഷ്യാവകാശങ്ങളെക്കുറിച്ചും ജനാധിപത്യത്തെക്കുറിച്ചും ദല്ഹിയില് സംസാരിക്കുന്ന സിപിഎം നേതാക്കള് പാര്ട്ടിക്ക് സ്വാധീനമുള്ള സ്ഥലങ്ങളില് ഇത് നിഷേധിക്കുകയാണെന്ന് മോണിക്ക അറോറ ചൂണ്ടിക്കാട്ടി. സ്വന്തം പാര്ട്ടിയിലുള്ളവരെ ഭീഷണിപ്പെടുത്തി കൂടെനിര്ത്താനാണ് സിപിഎം കൊലപാതകങ്ങള് നടത്തുന്നതെന്ന് ബിജെപി ദേശീയ നിര്വ്വാഹക സമിതി അംഗം വി.മുരളീധരന് പറഞ്ഞു.
റിച്ചാര്ഡ് ഹെ എംപി, ബിജെപി ദേശീയ നിര്വ്വാഹക സമിതി അംഗം അല്ഫോണ്സ് കണ്ണന്താനം, ഡോ.ബാലശങ്കര്, നവോദയം ഭാരവാഹികളായ അഡ്വ.കൈലാസ്നാഥ പിള്ള, വി.ആര്.രാമന്, അഡ്വ.മിഥുന്, എസ്.പ്രജോബ് എന്നിവര് സംസാരിച്ചു.
