കണ്ണൂര്‍: കേരളത്തിലെ കോര്‍പ്പറേഷന്‍ & മുനിസിപ്പല്‍ ജീവനക്കാരെ കേരളത്തില്‍ അങ്ങോളമിങ്ങോളം തലങ്ങും വിലങ്ങും സ്ഥലം മാറ്റി. സ്‌കൂള്‍ വര്‍ഷം ആരംഭിച്ചതിനാല്‍ കുട്ടികളുടെ വിദ്യാഭ്യാസത്തെപ്പോലും സാരമായി ബാധിക്കുന്ന വിധത്തിലാണ് സ്ഥലമാറ്റ ഉത്തരവ് ഇറങ്ങിയിരിക്കുന്നത്. സ്ഥലമാറ്റത്തില്‍ പരിഗണന ലഭിക്കേണ്ട വികലാംഗര്‍, മിശ്രവിവാഹിതര്‍, രോഗികള്‍, ബുദ്ധിമാന്ദ്യമുള്ള കുട്ടികളുടെ മാതാപിതാക്കള്‍, വിധവകള്‍, പട്ടികജാതി പട്ടികവര്‍ഗ്ഗ വിഭാഗത്തില്‍ ഉള്‍പെട്ടവര്‍ എന്നിവരെ വിദൂര സ്ഥലങ്ങളിലേക്കാണ് സ്ഥലംമാറ്റി നിയമിച്ചിരിക്കുന്നത്. 15 മുതല്‍ 20 വര്‍ഷംവരെ ഒരേ നിയമസഭയില്‍ ജോലിചെയ്തുവരുന്ന ഇടതു സംഘടനയില്‍പ്പെട്ട ജീവനക്കാരെ നിലനിര്‍ത്തി വളറെ കുറഞ്ഞ സര്‍വ്വീസുള്ള അസോസിയേഷന്‍ അംഗങ്ങളെയാണ് മാറ്റിനിയമിച്ചിരിക്കുന്നത്. ഭരണാനുകൂല സംഘടനയിലെ ജീവനക്കാരെ ഉദ്യോഗക്കയറ്റം നല്‍കി ഇതേ നഗരസഭകളില്‍ തന്നെ നിയമിച്ചപ്പോള്‍ ഇതര സംഘടനകളില്‍പ്പെട്ട ജീവനക്കാരെ യാതൊരു മാനദണ്ഡവും ഇല്ലാതെ സ്ഥലംമാറ്റിയാണ് ഉത്തരവ് നല്‍കിയിരിക്കുന്നത്.
സ്ഥലം മാറ്റത്തിനുവേണ്ടി അപേക്ഷ പോലും നല്‍കാത്തവരെ അപേക്ഷനല്‍കിയെന്ന് വ്യാജമായി കാണിച്ച് സ്ഥലം മാറ്റുകയും ഇടത് സംഘടനകള്‍ക്ക് ഇഷ്ടമില്ലാത്തവരെ ഭരണപരമായ സൗകര്യം എന്ന് രേഖപ്പെടുത്തിക്കൊണ്ടാണ് ഈ അനീതി നടപ്പിലാക്കിയത്. മുഖ്യമന്ത്രി വിളിച്ചുചേര്‍ത്ത സര്‍വ്വീസ് സംഘടനകളുടെ യോഗത്തില്‍ യാതൊരുവിധ രാഷ്‌ട്രീയ പ്രേരിതമായ സ്ഥലമാറ്റങ്ങളും ഉണ്ടാവില്ലെന്ന ഉറപ്പാണ് ഇതോടെ ലംഘിക്കപ്പെട്ടിരിക്കുന്നത്. നൂറുകണക്കിന് ജീവനക്കാരാണ് ഇതുമൂലം ദ്രോഹിക്കപ്പെടുന്നത്.
മഴക്കാല രോഗ പ്രതിരോധ പ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന ഒട്ടനവധി ആരോഗ്യ വിഭാഗം ജീവനക്കാരെ സ്ഥലം മാറ്റിയത് പ്രതിരോധ പ്രവര്‍ത്തനങ്ങള്‍ താളംതെറ്റിച്ചിരിക്കുകയാണ്. 2016-17 വര്‍ഷത്തെ പദ്ധതി നടപ്പിലാക്കി വരുന്ന സാഹചര്യത്തില്‍ ഇത്തരത്തിലുള്ള സ്ഥലംമാറ്റങ്ങള്‍ നഗരസഭകളുടെ പദ്ധതി പ്രവര്‍ത്തനത്തെ സാരമായി ബാധിക്കും എന്ന കാര്യത്തില്‍ തര്‍ക്കമില്ല. പല നഗരസഭകളിലും ആവശ്യമായ ജീവനക്കാരില്ലാത്തപ്പോഴാണ് ഇത്തരത്തിലുള്ള പ്രതികാര നടപടികളുമായി സര്‍ക്കാര്‍ മുന്നോട്ട് പോകുന്നത്. ഒരേ തസ്തികയിലുള്ള ജീവനക്കാരെയാണ് കാസര്‍കോട്ടുനിന്നും നെയ്യാറ്റിന്‍കരയിലേക്കും അതുപോലെ തന്നെ തിരിച്ചും മാറ്റിനിയമിച്ചിരിക്കുന്നത്. 2007ലെ ഇടത് സര്‍ക്കാര്‍ കൊണ്ടുവന്ന നിലിവിലുള്ള മാനദണ്ഡങ്ങള്‍ എല്ലാം കാറ്റിപറത്തികൊണ്ടാണ് ഇപ്പോഴത്തെ സ്ഥലമാറ്റം.
അടിയന്തരമായി സര്‍ക്കാര്‍ പ്രശ്‌നത്തില്‍ ഇടപെട്ട് കേരള മുനിസിപ്പല്‍ ആന്റ് കോര്‍പ്ഫരേഷന്‍ സ്റ്റാഫ് അസോസിയേഷന്‍ സംസ്ഥാന പ്രസിഡണ്ട് ബി.ശശികുമാര്‍, ജനറല്‍ സെക്രട്ടറി പി.ഐ.ജേക്കബ്‌സണ്‍ എന്നിവര്‍ പ്രസ്താവനയില്‍ ആവശ്യപ്പെട്ടു. പ്രശ്‌നങ്ങള്‍ പരിഹരിച്ചില്ലെങ്കില്‍ കെഎംസിഎസ്എ അംഗങ്ങളും അവരുടെ കുടുംബാംഗങ്ങളും ചേര്‍ന്ന് കേരളത്തിലെ മന്ത്രി മന്ദിരങ്ങളിലേക്ക് മാര്‍ച്ച് നടത്തുമെന്നും നേതാക്കള്‍ പറഞ്ഞു.
