കണ്ണൂര്: കണ്ണൂര് ജില്ലയിലെ കുറിച്ച്യസമുദായത്തിന്റെ ഉന്നമനത്തിന് വേണ്ടി സാമൂഹ്യ ക്ഷേമകേന്ദ്രം സ്ഥാപിക്കുന്നത് കേന്ദ്രസര്ക്കാരിന്റെ പരിഗണനയില്. നെടുംപൊയിലില് സാമൂഹ്യക്ഷേമ കേന്ദ്രം സ്ഥാപിക്കണമെന്നാവശ്യപ്പെട്ട് കുറിച്ച്യ മുന്നേറ്റസമിതി ജില്ലാ പ്രസിഡണ്ട് എന്.സുശാന്ത് കേന്ദ്രസാമൂഹ്യ ക്ഷേമവകുപ്പ് മന്ത്രിക്ക് നിവേദനം നല്കിയിരുന്നു. നെടുംപൊയിലില് കുറിച്ച്യമുന്നേറ്റസമിതിക്ക് സ്വന്തമായുള്ള സ്ഥലത്ത് കേന്ദ്രം സ്ഥാപിക്കുന്നതിനാണ് അപേക്ഷ നല്കിയിരിക്കുന്നത്. കേരള സര്ക്കാരിന്റെ 2011 ലെ സെന്സസ് പ്രകാരം 4,84,339 പേര് ട്രൈബല് കമ്മ്യൂണിറ്റിയിലുണ്ടെന്നാണ് കണക്ക്. മൊത്തം ജനസംഖ്യയുടെ 1.45 ശതമാനമാണിത്. ഇതില് 35,171 പേര് കുറിച്ച്യ വിഭാഗത്തിലാണ്. കണ്ണൂര്, കാസര്കോട്, വയനാട് ജില്ലകളിലാണ് പ്രധാനമായും ഇവര് താമസിക്കുന്നത്. വീരപഴശ്ശിക്കൊപ്പം ബ്രിട്ടീഷുകാര്ക്കെതിരെ പോരാടിയ തലക്കല് ചന്തുവിന്റെ പിന്മുറക്കാരാണ് കേരളത്തിലെ കുറിച്ച്യ വിഭാഗം. കുറിച്ച്യ വിഭാഗത്തില്പ്പെട്ട ഏകദേശം പതിനായിരത്തോളം പേര് യുദ്ധത്തില് വീരമൃത്യു വരിച്ചുവെന്നാണ് ചരിത്രരേഖകള് പറയുന്നത്. എന്നാല് ഇന്ത്യ സ്വാതന്ത്ര്യം നേടിയിട്ട് വര്ഷങ്ങളായെങ്കിലും കുറിച്ച്യ സമുദായം ഇപ്പോഴും സാമൂഹികമായും, സാമ്പത്തികമായും വിദ്യാഭ്യാസ പരമായും ഏറെ പിന്നിലാണ്. കുറിച്ച്യസമുദായത്തില്പ്പെട്ട സംരംഭകര്ക്ക് തൊഴില് പരിശീലനം നല്കുക, വിദ്യാഭ്യാസപരമായ സഹായങ്ങള് നല്കുക, ആവശ്യമായ നിയമസഹായം നല്കുക തുടങ്ങിയ ലക്ഷ്യത്തോടെയാണ് കേന്ദ്രം ആരംഭിക്കുന്നത്. സാമൂഹ്യകേന്ദ്രം ആരംഭിക്കുന്നോടെ സമുദായത്തില്പ്പെട്ടവര്ക്ക് ഏകീകൃത സ്വഭാവത്തില് സഹായമെത്തിക്കാന് സാധിക്കും. സ്വാതന്ത്ര്യാനന്തര ഭാരതത്തില് കേന്ദ്ര സംസ്ഥാന സര്ക്കാരുകളുടെ അവഗണനക്ക് വിധേയമായ കുറിച്ച്യ സമുദായത്തെ മുഖ്യധാരയിലേക്ക് ഉയര്ത്തിക്കൊണ്ടുവരുവാന് പുതിയ പദ്ധതികൊണ്ട് സാധിക്കും.
കുറിച്ച്യ സമുദായത്തിന് സാമൂഹ്യ ക്ഷേമ കേന്ദ്രം: കേന്ദ്രസര്ക്കാര് പരിഗണനയില്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.