പേട്ട: കരിക്കകത്ത് ഇറിഗേഷന് വകുപ്പ് പാര്വ്വതി പുത്തനാറില് നടത്തുന്ന നവീകരണം പ്രദേശവാസികളെ ദുരിതത്തിലാക്കുന്നു. ആറ്റില് നിന്നും റോഡിലേയ്ക്ക് വാരിയിടുന്ന കുളവാഴയുള്പ്പെടെയുളള മാലിന്യങ്ങള് റോഡില് നിന്നും നീക്കം ചെയ്യാത്തതാണ് പ്രദേശവാസികളെ ദുരിതത്തിലാക്കിയിരിക്കുന്നത്.
കഴിഞ്ഞ ഏതാനും ആഴ്ചകള്ക്ക് മുമ്പാണ് നവീകരണം തുടങ്ങിയത്. ചാക്ക മുതല് വെണ്പാലവട്ടം വാഴവിളക്കടത്ത് വരെയുളള വൃത്തിയാക്കലില് ആറ്റിന്റെ ഇരുകരയിലേയും റോഡില് കുളവാഴയും മറ്റ് ജൈവമാലിന്യങ്ങളും വാരിയിട്ട് പ്രദേശത്ത് മാലിന്യ കൂമ്പാരങ്ങളാണ് സൃഷ്ടിച്ചിരിക്കുന്നത്. ഇതോടെ ഗതാഗത തടസത്തിന് പുറമെ രാത്രിയില് ഇരുചക്ര വാഹനങ്ങള് മാലിന്യകൂനയിലേയ്ക്ക് ഇടിച്ച് കയറി അപകടത്തിലാകുന്നതും നിത്യ സംഭവമാണ്. ഇത്തരത്തില് അപകടങ്ങള്ക്ക് വഴിതെളിക്കുന്ന ചവര്കൂന നീക്കം ചെയ്യാന് അധികൃതര് തയ്യാറാവുന്നില്ല എന്നതാണ് വാസ്തവം. ഇത് സംബന്ധിച്ച് നിരവധി പരാതികള് കരാറുകാരനെയും ഇറിഗേഷന് വകുപ്പിനെയും അറിയിച്ചെങ്കിലും നടപടികളെടുത്തിട്ടില്ല. കുന്ന്കൂട്ടിയിട്ടിരിക്കുന്ന മാലിന്യം റോഡില് നിന്നും നീക്കം ചെയ്യണമെന്നാവശ്യപ്പെട്ട് ബിജെപി കൗണ്സിലര് ഹിമ സിജി എഇയെ സമീപിച്ചെങ്കിലും നീക്കം ചെയ്ത മാലിന്യങ്ങള് ഉണക്കാന് ഇട്ടിരിക്കുകയാണെന്നാണ് ശുചീകരണ ചുമതല വഹിക്കുന്ന എഇ അജയന് അറിയിച്ചത്. അടിയന്തിരമായി ചവര്കൂന നീക്കം ചെയ്തില്ലെങ്കില് ശക്തമായ പ്രതിഷേധം സംഘടിപ്പിക്കുമെന്ന് ബിജെപിയും മുന്നറിയിപ്പ് നല്കി. അതേസമയം പാര്വ്വതി പുത്തനാറിന്റെ നവീകരണം ശരിയായ വിധത്തില് നടക്കുന്നില്ലെന്ന ആക്ഷേവും വ്യാപകമായിട്ടുണ്ട്. കഴിഞ്ഞ സര്ക്കാരാണ് തിരുവല്ലം ഇടയാര് പ്രശ്നവുമായി ബന്ധപ്പെട്ട് പാര്വ്വതി പുത്തനാറിന്റെ നവീകരണത്തിന് തുടക്കം കുറിച്ചത്. ഒരു കോടിയാണ് പദ്ധതിയ്ക്കായി അനുവദിച്ചത്. 68 ലക്ഷത്തിനാണ് കരാര് നല്കിയതായി പറയുന്നത്. ഇടയാറിലെ അടഞ്ഞ് കിടന്ന പുത്തനാറിലെ മണ്ണ് നീക്കുന്നതിന് പുറമെ തിരുവല്ലം മുതല് ആക്കുളം വരെ ആറ്റില് നിറഞ്ഞ് കിടക്കുന്ന മരച്ചില്ലകളും കുളവാഴയും മറ്റ് മാലിന്യങ്ങളും നീക്കം ചെയ്യുകയെന്നതാണ് പദ്ധതിയില്പ്പെടുത്തിയിരിക്കുന്നത്. എന്നാല് പദ്ധതിയില് നിന്നും വ്യതിചലിച്ച് പ്രഹസനമാക്കികൊണ്ടുളള നവീകരണമാണ് നടത്തുന്നത്. തിരുവല്ലം മുതല് ചാക്കവരെ യാതൊരു നവീകരണവും നടത്താതെ കരിക്കകം പ്രദേശത്ത് മാത്രമാണ് ഏതാനും ആഴ്ചകളായി കുളവാഴ നീക്കം ചെയ്യുന്നത്. എന്നാല് ആറ്റില് വീണ് കിടക്കുന്ന മരച്ചില്ലകള് നീക്കം ചെയ്യുന്നില്ലെന്ന പരാതിയാണ് വ്യാപകമായിട്ടുളളത്. ക്രമക്കേട് നിറഞ്ഞ നവീകരണം ജനങ്ങളുടെ കണ്ണില് പൊടിയിടലാണെന്നും ബിജെപി ജില്ലാ സമിതിഅംഗം ഡി.ജി. കുമാരന് പറഞ്ഞു.
