ന്യൂദൽഹി: പോർട്ട് ബ്ലയർ യാത്രക്കിടെ കാണാതായ ഇന്ത്യൻ വ്യോമ സേനയുടെ വിമാനം നിയന്ത്രിച്ചവരുടെ പേരു വിവരങ്ങൾ പുറത്ത് വിട്ടു. ക്യാപ്റ്റൻ ലഫ്. കേണൽ ബഡ്സാര, ഫ്ലൈറ്റ് ലഫ്റ്റനൻറ് കുനാൽ, കോ പൈലറ്റ് നന്ദ എന്നിവരുടെ വിവരങ്ങളാണ് പുറത്തുവിട്ടത്.
വെള്ളിയാഴ്ച രാവിലെ എട്ടിനാണ് 29 യാത്രക്കാരുമായി ചെന്നൈയിലെ താംബരത്ത് നിന്നും പോർട്ട് ബ്ലയറിലേക്ക് പുറപ്പെട്ട ഇന്ത്യൻ വ്യോമസേനയുടെ എ.എൻ32 വിമാനം കാണാതായത്. കര, നാവിക, തീരസംരക്ഷണ സേനകളിലെ ഒാരോ അംഗങ്ങളും അഞ്ച് വ്യോമസേനാ ഉദ്യോഗസ്ഥരും എട്ട് സിവിലിയൻമാരും ആറ് ജീവനക്കാരുമാണ് കാണാതായ വിമാനത്തിലുണ്ടായിരുന്നത്. റഡാറിൽ നിന്ന് അപ്രത്യക്ഷമാകുമ്പോൾ വിമാനം 23,000 അടി ഉയരത്തിലായിരുന്നുവെന്ന് പറയുന്നു.
വിമാനം കാണാതായതിനെ തുടർന്ന് നാവികസേനയുടെയും തീര സംരക്ഷണസേനയുടെയും 12 കപ്പലുകളും ഒരു അന്തർ വാഹിനിയും വിമനത്തിന്റെ അവശിഷ്ടങ്ങൾ കണ്ടെത്തുന്നതിനായി ബംഗാൾ ഉൾക്കടലിൽ തെരച്ചിൽ നടത്തുകയാണ്.
