ആലപ്പുഴ: ശക്തമായ മഴ താഴ്ന്ന പ്രദേശങ്ങളെ വെള്ളത്തിലാഴ്ത്തി. കനത്ത മഴ മൂലം ഉയര്ന്ന വെള്ളം ഒഴുകിപ്പോകാന് ആവശ്യമായ സൗകര്യങ്ങളില്ലാത്തത് പലയിടങ്ങളിലും വെള്ളക്കെട്ടിന്റെ പ്രതീതിയാണു ഉണ്ടാക്കിയിരിക്കുന്നത്.
അമ്പലപ്പുഴ താലൂക്കിലാണ് വെള്ളക്കെട്ടുകള് കൂടുതല് രൂപപ്പെട്ടിരിക്കുന്നത്. മഴയോടൊപ്പമുണ്ടായ കാറ്റില് മരങ്ങള് മറിഞ്ഞും അപകടങ്ങളുണ്ടായിട്ടുണ്ട്. പലയിടങ്ങളിലും ഇത്തരത്തില് മരങ്ങള് റോഡിലേക്കു വീണത് ഗതാഗത തടസത്തിനും വൈദ്യുതി ബന്ധം നിലയ്ക്കുന്നതിനും ഇടയാക്കിയിരുന്നു. വീടുകള്ക്കു ചുറ്റും വെള്ളം കെട്ടിക്കിടക്കുന്നത് ജലജന്യരോഗ ഭീഷണിയുയര്ത്തുന്നു.
പലയിടങ്ങളിലും വെള്ളം ഒഴുകിപ്പോയ്ക്കൊണ്ടിരുന്ന നീര്ച്ചാലുകളും ഇടത്തോടുകളും നികത്തിയതാണ് വെള്ളക്കെട്ടിന് കാരണം. ഇത്തരത്തില് നികത്തിയ നീര്ച്ചാലുകള് തുറക്കണമെന്ന ആവശ്യം നാട്ടിന്പുറങ്ങളില് പലയിടങ്ങളിലും നേരിയ വാക്കുതര്ക്കങ്ങള്ക്കും സംഘര്ഷങ്ങള്ക്കുമിടയാക്കുന്നു.
നഗരത്തിന്റെ തെക്കുപടിഞ്ഞാറന് ഭാഗങ്ങളിലെ വാര്ഡുകള് പലതും വെള്ളത്തിലാണ്. ഫയര്ഫോഴ്സിന്റെ സഹായം തേടിയാണ് പലയിടങ്ങളിലും വെള്ളക്കെട്ട് ഒഴിവാക്കിയത്. കാനകളില് അടിഞ്ഞുകൂടിയ മാലിന്യങ്ങള് യഥാസമയം നീക്കം ചെയ്യാതിരുന്നതിനാല് ഇവയിലൂടെയുള്ള ഒഴുക്കു നിലച്ചിരിക്കുകയാണ്.
പലയിടങ്ങളിലും കാനയില് നിന്നുള്ള മാലിന്യങ്ങള് റോഡിലെ വെള്ളക്കെട്ടില് കലരുന്നുണ്ട്. തീരമേഖലകളിലെ റോഡുകള് പലതും വെള്ളത്തില് തന്നെയാണ്. മഴ മൂലം ദേശീയപാതയിലെ അറ്റകുറ്റപ്പണികളും കനത്ത മഴ പെയ്യുമ്പോള് റോഡിലെ കുഴികളില് വെള്ളം നിറഞ്ഞുകിടക്കുന്നതിനാല് കുഴിയേത്, റോഡേത് എന്നറിയാത്ത സ്ഥിതിയുമാണ്. കാലവര്ഷത്തിനു മുമ്പുതന്നെ കാനകള് ശുചീകരിക്കാതിരുന്നതാണ് ആലപ്പുഴ നഗരഹൃദയത്തിലടക്കം വെള്ളക്കെട്ട് രൂക്ഷമാകാന് കാരണം. മഴ തുടങ്ങിയശേഷമാണ് കാന ശുചീകരണം ആരംഭിച്ചത്.
