നബീസാ ബീവിയെ ബിജെപി വാമനപുരം പഞ്ചായത്ത് കമ്മിറ്റി അംഗങ്ങളുടെയും മെമ്പര്മാരുടെയും നേതൃത്വത്തില് കിളിമാനൂര് പുതിയകാവിലെ ചക്കുളത്തുകാവ് സഞ്ജീവനി ട്രസ്റ്റിന്റെ വൃദ്ധസദനത്തില് എത്തിച്ചപ്പോള്
വെഞ്ഞാറമൂട്: ആശ്രയമില്ലാതെ കഷ്ടപ്പെട്ട വൃദ്ധ മാതാവിന് ബിജെപി പ്രവര്ത്തകര് തണലൊരുക്കി. വാമനപുരം താളിക്കുഴി കമുകിന്കുഴി ചരുവിള പുത്തന്വീട്ടില് നബീസാ ബീവി (66)യെയാണ് ബിജെപി വാമനപുരം പഞ്ചായത്ത് കമ്മിറ്റി അംഗങ്ങളുടെയും മെമ്പര്മാരുടെയും നേതൃത്വത്തില് കിളിമാനൂര് പുതിയകാവിലെ ചക്കുളത്തുകാവ് സഞ്ജീവനി ട്രസ്റ്റിന്റെ വൃദ്ധസദനത്തിലെത്തിച്ചത്.
നബീസാ ബീവിയുടെ ഭര്ത്താവ് നൂഹുക്കണ്ണിന് മാനസികാസ്വാസ്ഥ്യമുണ്ടായിരുന്നു. 7 വര്ഷംമുമ്പ് ഭര്ത്താവിനെ കാണാതായി. അതിനുശേഷം നബീസാ ബീവി ഇളയ മകള് റഷീദയ്ക്കൊപ്പമായിരുന്നു താമസം. രണ്ടു പെണ് മക്കള് ഉള്പ്പെടെ മൂന്ന് പേരാണ് നബീസയ്ക്കുള്ളത്. അതില് മകന് നസീറുദ്ദീ
ന് 9 വര്ഷം മുമ്പ് ജീവനൊടുക്കി. തിരുവനന്തപുരം മെഡിക്കല് കോളേജ് ആശുപത്രിയില് നഴ്സായിരുന്ന മൂത്ത മകള് നസീമ എവിടെയാണെന്ന് അറിയില്ല. വര്ഷങ്ങളായി അനവധി രോഗങ്ങളുമായാണ് നബീസ കഴിഞ്ഞിരുന്നത്. തലച്ചോറിലെ ഓപ്പറേഷനെക്കൂടാതെ പ്രമേഹരോഗം കലശലാവുകയും കാലിന്റെ വിരല് മുറിച്ചു മാറ്റി. നാളുകളോളം വിവിധ ആശുപത്രിയില് ചികില്സതേടി.
ഇതിനിടയില് നബീസയെ പരിചരിച്ചിരുന്ന ഇളയ മകള് റഷീദയ്ക്ക് നട്ടെല്ലിന് രോഗം ബാധിച്ചതോടെ അവശയായ മാതാവിനെ ശാരീരികമായി സഹായിയ്ക്കുവാന് കഴിയാതെയായി. റഷീദയുടെ മകനായിരുന്നു പിന്നീട് നബീസയെ പരിചരിച്ചത്. എന്നാല് രോഗം മൂര്ഛിക്കുകയും ശരീരത്തില് പുഴുവരുകയും ചെയ്തതോടെ ഇവരും നിസ്സഹാരായി.
സംഭവം ശ്രദ്ധയില്പെട്ടതിനെത്തുടര്ന്ന് ബിജെപി പഞ്ചായത്ത് പ്രസിഡന്റ് കുറ്ററ അനില്, വാര്ഡ് മെമ്പര്മാരായ ദീപു, സതി രാജ്, ജയകുമാര്, താലൂക്ക് കാര്യ വാഹ് രതീഷ് കണിച്ചോട്, പ്രതീഷ് എന്നിവര് ചേര്ന്ന് കിളിമാനൂരിലുള്ള വൃദ്ധസദനത്തില് എത്തിച്ചു ട്രസ്റ്റ് പ്രസിഡന്റ് കിളിമാനൂര് രവിന്ദ്രന് ഏറ്റെടുത്തു. നബീസയ്ക്ക് ഇനി വേണ്ടി വരുന്ന മേജര് ഓപ്പറേഷന്റെ ചെലവ് പാര്ട്ടി ഏറ്റെടുക്കുമെന്നും തിരുവനന്തപുരത്തെ ഒരു ഹോസ്പിറ്റലില് നടത്തി കൊടുക്കുമെന്നും പ്രവര്ത്തകര് പറഞ്ഞു.
