ഡാറസ് സലാം: എല്ലായ്പ്പോഴും വിശ്വസിക്കാന് സാധിക്കുന്ന ഏക രാഷ്ട്രം ഭാരതം മാത്രമാണെന്ന് താന്സാനിയന് പ്രസിഡന്റ് ജോണ് ജോസഫ് മുഗുഫുലി. ഭാരതം എപ്പോഴും, ഭാവിയിലും താന്സാനിയയുടെ വികസനകാര്യത്തില് വിശ്വസിക്കാവുന്ന പങ്കാളിയാണ്, നരേന്ദ്രമോദിക്ക് നല്കിയ സ്വീകരണ പരിപാടിയില് സംസാരിക്കുകയായിരുന്നു അദ്ദേഹം.
ഉജ്ജ്വല സ്വീകരണമാണ് പ്രധാനമന്ത്രി നരേന്ദ്രമോദിക്ക് താന്സാനിയ നല്കിയത്. വിമാനത്താവളത്തില് നേരിട്ടെത്തി പ്രസിഡന്റ് ജോണ് ജോസഫ് മോദിയെ സ്വീകരിച്ചു. ആഫ്രിക്കന് ഭൂഖണ്ഡത്തിലെ പ്രധാന സാമ്പത്തിക ശക്തിയാണ് താന്സാനിയയെന്നും വാണിജ്യ, നിക്ഷേപ മേഖലകളിലെ സഹകരണം ഇരുരാജ്യങ്ങളും ശക്തിപ്പെടുത്തണമെന്നും നരേന്ദ്രമോദി പറഞ്ഞു. ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം കൂടുതല് സജീവമാക്കും.
പ്രധാന വികസന കാര്യങ്ങളിലും പൊതു സുരക്ഷാ വിഷയങ്ങളിലും സഹകരണം ശക്തമാക്കും. 21-ാം നൂറ്റാണ്ടിന്റെ നിര്മ്മാണത്തിനുതകുന്ന സഹകരണം ഇരുരാജ്യങ്ങളും തമ്മിലുണ്ടാകും, മോദി പറഞ്ഞു.
താന്സാനിയയുടെ കൃഷി, വിദ്യാഭ്യാസം, ആരോഗ്യം, വ്യവസായം, യുവാക്കളിലെ നൈപുണ്യം, സാമൂഹ്യ സുരക്ഷിതതത്വം തുടങ്ങിയ മേഖലകളില് ഭാരതം ഒരു നല്ല സുഹൃത്തായി പ്രവര്ത്തിക്കും. ഭാരതത്തിന്റെ പരിചയ സമ്പത്തും വിദഗ്ധരേയും സാങ്കേതിക സംവിധാനങ്ങളും താന്സാനിയയ്ക്ക് നല്കും. താന്സാനികയ്ക്ക് ആവശ്യമായ കാര്യങ്ങള് മുന്ഗണന നല്കി കൈമാറുമെന്നും മോദി പറഞ്ഞു.
ഡാറസ് സലാം എന്ന വാക്കിന്റെ അര്ത്ഥം സമാധാനത്തിന്റെ വാസസ്ഥാനം എന്നാണെന്നും താന്സാനിയയുടെ സന്തോഷമാണ് ഭാരതത്തിന്റെയും ആഗ്രഹമെന്നും മോദി പറഞ്ഞു. ഇന്ത്യന് മഹാസമുദ്രമാണ് ഇരു രാജ്യങ്ങളേയും ബന്ധിപ്പിക്കുന്നത്. ഇരുരാജ്യങ്ങളും ശക്തമായ സമുദ്രബന്ധങ്ങളുള്ളതാണെന്നും മോദി കൂട്ടിച്ചേര്ത്തു.
വിവിധ ആഫ്രിക്കന് രാജ്യങ്ങളിലെ ഗ്രാമീണ മേഖലകളില് നിന്നുള്ള സോളാര് എഞ്ചിനീയര്മാരായ സ്ത്രീകളുമായി മോദി കൂടിക്കാഴ്ച നടത്തി. സോളാര് അമ്മമാരുമായുള്ള മോദിയുടെ കൂടിക്കാഴ്ചയെന്നാണ് വിദേശകാര്യമന്ത്രാലയം പരിപാടിയെ വിശേഷിപ്പിച്ചത്. രാജസ്ഥാനിലെ ബേര്ഫൂട്ട് കോളേജില് നിന്നും പരിശീലനം നേടിയ സ്ത്രീകളുമായാണ് മോദി കൂടിക്കാഴ്ച നടത്തിയത്.
താന്സാനിയയില് നിന്നും കെനിയയിലെത്തിയ മോദി ഭാരതവുമായി ചരിത്രപരമായ ബന്ധമുള്ള സുഹൃദ് രാഷ്ട്രമാണ് കെനിയയെന്ന് പ്രസ്താവിച്ചു. ഇസ്രയേലി പ്രധാനമന്ത്രി ബെഞ്ചമിന് നെതന്യാഹുവിന്റെ മൂന്നു ദിവസം നീണ്ട കെനിയന് പര്യടനത്തിന് പിന്നാലെയാണ് മോദി കെനിയയിലെത്തിയത്. കെനിയന് പ്രസിഡന്റ് കെനിയാത്തയുമായി ചര്ച്ച നടത്തിയ മോദിക്കൊപ്പം 80ഓളം പ്രമുഖ ബിസിനസുകാരുമുണ്ട്.
ഇരു രാജ്യങ്ങളും തമ്മിലുള്ള ഉഭയകക്ഷി ബന്ധം കൂടുതല് ശക്തമാക്കുകയാണ് മോദിയുടെ സന്ദര്ശന ലക്ഷ്യം. വാണിജ്യം, വ്യാപാരം, സാംസ്ക്കാരിക മേഖലകളിലെ സഹകരണം ശക്തിപ്പെടുത്തുമെന്ന് കെനിയയിലെ ഭാരത ഹൈക്കമ്മീഷണര് സുത്ചിത്ര ദുരൈ പറഞ്ഞു.
