ധാക്ക: വിവാദ മതപ്രഭാഷകന് സക്കീര് നായിക്ക് നേതൃത്വം നല്കുന്ന പീസ് ടിവിക്ക് ബംഗ്ലാദേശില് നിരോധനം ഏര്പ്പെടുത്തി. മുംബൈ ആസ്ഥാനമായ ഇസ്ലാമിക് റിസര്ച്ച് ഫൗണ്ടേഷന്റെ ഉടമസ്ഥതയിലുള്ളതാണു പീസ് ടിവി.
ക്രമസമാധാനവുമായി ബന്ധപ്പെട്ട് നടന്ന പ്രത്യേക മന്ത്രിസഭാ യോഗത്തിലായിരുന്നു പീസ് ടിവിക്ക് നിരോധനം ഏര്പ്പെടുത്തുന്നതായ തീരുമാനം കൈക്കൊണ്ടതെന്ന് ബംഗ്ലാദേശ് വ്യവസായ മന്ത്രി ആമിര് ഹുസൈന് അമ്മു വ്യക്തമാക്കി.
വെള്ളിയാഴ്ച്ച പ്രാര്ത്ഥനയോടനുബന്ധിച്ച് ഏതെങ്കിലും തരത്തില് പ്രകോപനപരമായ പ്രഭാഷണങ്ങള് നടക്കുന്നുണ്ടോയെന്ന് നിരീക്ഷിക്കാനും മുതിര്ന്ന മന്ത്രിമാരും ഉന്നത സുരക്ഷാ ഉദ്യോഗസ്ഥരും പങ്കെടുത്ത യോഗത്തില് തീരുമാനിച്ചെന്ന് മന്ത്രി പറഞ്ഞു.
ഭീകരവാദത്തെയും തീവ്രവാദത്തെയും തള്ളി പറയുന്ന പ്രഭാഷണങ്ങളെ സ്വീകരിക്കാനും ബംഗ്ലാദേശ് സര്ക്കാര് രാജ്യത്തെ ജനങ്ങളോട് പറഞ്ഞു.
ധാക്ക ഭീകരാക്രമണ പശ്ചാത്തലത്തില് പീസ് ടിവിക്ക് നിരോധനം ഏര്പ്പെടുത്താന് ബിജെപിയും കൊല്ക്കത്തയില് ആഹ്വാനം ചെയ്തിരുന്നു. ധാക്ക ഭീകരാക്രമണത്തിന് ഭീകരര്ക്ക് ഉത്തേജനമേകിയത് സക്കീറിന്റെ മതപ്രഭാഷണങ്ങളാണെന്ന് റിപ്പേര്ട്ടുകളും സൂചിപ്പിക്കുന്നു.
സക്കീര് നായിക്കിന്റെ പീസ് ടിവിക്ക് ഭാരതത്തില് നിരോധനമുണ്ടെങ്കിലും ചില കേബിള് ടിവി ഓപ്പറേറ്റര്മാര് ഇതു ലഭ്യമാക്കുന്നുണ്ടെന്നു രഹസ്യാന്വേഷണ ഏജന്സികള്ക്കു സൂചന ലഭിച്ചിട്ടുണ്ട്. ഇവര്ക്കെതിരേ ശക്തമായ നടപടിക്കൊരുങ്ങുകയാണ് കേന്ദ്ര ആഭ്യന്തരമന്ത്രാലയം. ബ്രിട്ടനിലും കാനഡയിലും പ്രവേശനവിലക്കുള്ള നായിക്കിന്റെ പ്രസംഗത്തിനു മലേഷ്യയില് നിരോധനമുണ്ട്.
അതേസമയം സക്കീറിന്റെ പ്രഭാഷണങ്ങളെ വിലയിരുത്താന് ബംഗ്ലാദേശ് സര്ക്കാര് മഹാരാഷ്ട്ര സര്ക്കാരിനോട് ആവശ്യപ്പെട്ടിരുന്നു.
തുടര്ന്ന് മഹാരാഷ്ട്ര മുഖ്യമന്ത്രി ദേവേന്ദ്ര ഫട്നാവിസ് മുംബൈ പോലീസിനോട് സക്കീറിനെതിരെ അന്വേഷണം നടത്താന് നിര്ദ്ദേശിച്ചിരുന്നു.
സക്കീറിന്റെ പ്രഭാഷണങ്ങളും സമൂഹ മാധ്യമങ്ങളിലെ പോസ്റ്റുകളും ഉള്പ്പെടുത്തി അന്വേഷണം നടത്തണമെന്നാണ് ഫട്നാവിസ് നിര്ദ്ദേശിച്ചിരിക്കുന്നത്.
