കോഴിക്കോട്: ”കിടക്കപ്പായയില് നിന്ന് തലയുയര്ത്താന് കഴിയാത്തതിനാല് തിങ്കളാഴ്ചകളില് പണിക്ക് പോകാന് കഴിഞ്ഞിരുന്നില്ല. തലേ ദിവസത്തെ കിക്ക് ഒഴിഞ്ഞുപോയിരുന്നില്ല”. ഒളവണ്ണ സ്വദേശിയായ സോ മില് തൊഴിലാളി ആയ 61 കാരന് പറയുന്നു. ആല്ക്കഹോളിക് അനോനിമസ് (എഎ) ആയതിനാല് പേര് വെളിപ്പെടുത്തരുതെന്ന അപേക്ഷയോടെ അയാള് പറഞ്ഞുതുടങ്ങി. ”ഒരു നാടക കമ്പനിയില് ചേര്ന്നതോടെയാണ് അല്പ്പാല്പ്പമായി മദ്യവുമായി കൂട്ടുതുടങ്ങിയത്. അത് പിന്നീട് ദിവസവും എന്ന നിലക്കായി. പിന്നീട് മദ്യപിക്കാതെ ജീവിക്കാനാവില്ലെന്ന അവസ്ഥ വന്നു. അതോടെ ജോലിയും നാടകവുമൊക്കെ മദ്യത്തിന് വഴിമാറി. ജീവിതം തകര്ന്നു തുടങ്ങിയിരുന്നു. മദ്യപിക്കാതിരിക്കുമ്പോള് ശരീരം മൊത്തം വിറയലനുഭവപ്പെട്ടപ്പോഴാണ് ഭാര്യ ആശുപത്രിയിലെത്തിച്ചത്. അവിടെ നിന്നാണ് മദ്യപിക്കാത്തവരുടെ കൂട്ടായ്മയെക്കുറിച്ച് മനസ്സിലായത്. മാറണമെന്നുണ്ടായിരുന്നു. ഇങ്ങനെ അവരുടെ കൂട്ടായ്മയില് ഒരാളായി. 21 വര്ഷങ്ങളായി മദ്യത്തോട് വിട പറഞ്ഞിട്ട്”. അദ്ദേഹം പറഞ്ഞു.
വീട്ടിലും നാട്ടിലും വേണ്ടാത്തവനായ സോമില് തൊഴിലാളി നാട്ടിലെ മാന്യനായി മാറി. വീട്ടില് സ്വസ്ഥത തിരിച്ചുവന്നു. ഭാര്യയും രണ്ടു മക്കളുമടങ്ങുന്ന കുടുംബത്തിലേക്ക് സന്തോഷം തിരിച്ചുവന്നു. ആരോഗ്യവും സാമ്പത്തിക സ്ഥിതിയും മാന്യതയും തിരിച്ചുവന്നതോടെ ഈ കൂട്ടായ്മക്ക് കരുത്തു പകരാനുള്ള തീരുമാനവുമായി ആല്ക്കഹോളിക് അനോനിമസിന്റെ പ്രവര്ത്തനത്തില് അദ്ദേഹം പങ്കു ചേര്ന്നു. ജില്ലയില് 124 എഎ ഗ്രൂപ്പുകളാണ് പ്രവര്ത്തിക്കുന്നത്. മൂവായിരത്തിലേറെ ആളുകള് ആഴ്ചയില് ഒരുമിച്ചുകൂടുന്നു. അനുഭവവും ശക്തിയും പ്രതീക്ഷയും കൈമാറിക്കൊണ്ട് അവര് മദ്യമുക്തരാവുന്നു.
”14 വയസ്സുകാരന് മുതല് ഈ ഗ്രൂപ്പില് അംഗമായുണ്ട്.വിദ്യാര്ത്ഥിയായിരിക്കുമ്പോള് തന്നെ മദ്യത്തിനടിപ്പെട്ടതാണ്. കോഴിക്കോട് ജില്ലയില് നാല് സ്ത്രീകള് ഗ്രൂപ്പില് ചേര്ന്നിട്ടുണ്ട്. സ്ത്രീകളും മദ്യത്തിനടിമയാകുന്ന ദുരന്തമാണ് സമൂഹം നേരിടാന് പോകുന്നത്. പലരും ഒളിച്ചുവെക്കാന് ഇഷ്ടപ്പെടുകയാണ്. മദ്യത്തിനടിമകളായ നിരവധി യുവാക്കള് ജീവിതത്തിലേക്ക് തിരിച്ചുവരാന് തുടങ്ങിയിട്ടുണ്ട് എന്നതാണ് പ്രതീക്ഷ നല്കുന്നത്.” അദ്ദേഹം പറഞ്ഞു. നഗരത്തിലുണ്ടായിരുന്ന ആല്ക്കഹോളിക് അനോനിമസിന്റെ ഓഫീസ് കെട്ടിടം പൊളിച്ചതു കാരണം കുണ്ടൂപ്പറമ്പിലേക്ക് മാറ്റിയിരിക്കുകയാണ്. കോഴിക്കോട് ഗ്രൂപ്പിന്റെ 24-ാം വാര്ഷികം നാളെ മലബാര് ക്രിസ്ത്യന് കോളജില് വെച്ച് നടക്കും. ഉച്ചക്ക് 2 മണിക്ക് നടക്കുന്ന ചടങ്ങില് ഡോ. പി. എന്. സുരേഷ്കുമാര് ക്ലാസുകള് എടുക്കും. ആരോഗ്യ രംഗത്തെ പ്രമുഖരും സാമൂഹ്യ പ്രവര്ത്തകരും എഎ ഗ്രൂപ്പിലെ പഴമക്കാരും അനുഭവങ്ങളും പാഠങ്ങളും കൈമാറും. വൈകിട്ട് ആറു മുതല് എട്ടുവരെ കലാപരിപാടികളും നടത്തും.
1957 ല് മുംബൈയില് പ്രവര്ത്തനമാരംഭിച്ച ആഗോള സന്നദ്ധ സംഘടന 1970 ലാണ് കേരളത്തില് പ്രവര്ത്തനമാരംഭിക്കുന്നത്. സ്കൂളുകള്, ആരാധനാലയങ്ങള്, മറ്റു പൊതുസ്ഥാപനങ്ങള് എന്നിവിടങ്ങളിലാണ് എഎ യോഗം ചേരുന്നത്. മദ്യപാനം നിര്ത്തണമെന്നുള്ള ആര്ക്കും ഇതില് ഒത്തുചേരാം. അംഗമാകാനും സഹകരിക്കാനും താല്പ്പര്യമുള്ളവര്ക്ക് 9349510022 , 9349610022 എന്നീ ഫോണ് നമ്പരുകളില് ബന്ധപ്പെടാവുന്നതാണ്.
