ലണ്ടൻ: ലോക മൂന്നാം നമ്പർ താരവും സ്വിസ് ഇതിഹാസവുമായ റോജർ ഫെഡററെ അട്ടിമറിച്ച് കനേഡിയൻ താരം ആറാം സീഡ് മിലോസ് റാവോനിക്ക് വിംബിൾഡൺ ടെന്നീസ് ചാമ്പ്യൻഷിപ്പിന്റെ പുരുഷ സിംഗിൾസ് ഫൈനലിൽ.
ഏറെ ആവേശകരമായ മത്സരത്തിൽ അഞ്ച് സെറ്റ് നീണ്ട പോരാട്ടത്തിനൊടുവിലാണ് റാവോനിക്ക് ഫെഡററെ അട്ടിമറിച്ചത്. ഗ്രാൻഡ് സ്ലാമിന്റെ ചരിത്രത്തിൽ റാവോനിക്കിന്റെ ആദ്യ ഫൈനലാണിത്. മൂന്നുമണിക്കൂറും 24 മിനിറ്റും നീണ്ടുനിന്ന പോരാട്ടത്തിനൊടുവിൽ 6-3, 6-7 (3-7), 4-6, 7-5, 6-3 എന്ന സ്കോറിനായിരുന്നു റാവോനിക്കിന്റെ അട്ടിമറി വിജയം.
ആദ്യ സെറ്റ് റാവോനിക്ക് അനായാസം നേടിയെങ്കിലും രണ്ടും മൂന്നും സെറ്റ് ഫെഡറർ സ്വന്തമാക്കി. എന്നാൽ നാലാം സെറ്റ് റാവോനിക്ക് വിജയിച്ചതോടെ കളി അഞ്ചാം സെറ്റിലേക്ക് നീണ്ടു. അഞ്ചാം സെറ്റിൽ മൂന്ന് ഗെയിം മാത്രം വിട്ടുകൊടുത്ത് കനേഡിയൻ താരം മത്സരവും ഫൈനൽ ബർത്തും സ്വന്തമാക്കി.
