ന്യൂദല്ഹി: പ്രധാനമന്ത്രി നരേന്ദ്രമോദിയുടെ ആഫ്രിക്കന് പര്യടനത്തിന് തുടക്കമായി. ഇന്നലെ രാവിലെ മൊസാംബിക്കിലെത്തിയ മോദിയെ മപൂട്ടോ വിമാനത്താവളത്തില് ആചാരങ്ങളോടു കൂടിയ സ്വീകരണം നല്കി വരവേറ്റു. മൂന്നര പതിറ്റാണ്ടിനു ശേഷമാണ് ഒരു ഭാരത പ്രധാനമന്ത്രി മൊസാംബിക്കിലെത്തുന്നത്.
മൊസാംബിയന് പ്രസിഡന്റ് ഫിലിപ്പ് ന്യൂസിയുമായി മോദി നടത്തിയ ചര്ച്ചകള്ക്ക് ശേഷമാണ് പ്രധാന മൂന്നു കരാറുകളില് ഭാരതം ഒപ്പുവെച്ചത്. ദീര്ഘകാലത്തേക്ക് പയറുവര്ഗ്ഗങ്ങള് ഇറക്കുമതി ചെയ്യുന്നതും അനധികൃത മയക്കുമരുന്നു വ്യാപാരം തടയുന്നതും കായിക മേഖലയിലെ സഹകരണവുമാണ് കരാറുകള്. നിലവില് മൊസാംബിക്കില് നിന്നും ഇറക്കുമതി ചെയ്യുന്ന പയറുവര്ഗ്ഗങ്ങളുടെ അളവ് അഞ്ചുവര്ഷത്തിനുള്ളില് ഒരുലക്ഷം ടണ്ണില് നിന്നും രണ്ടുലക്ഷമാക്കി വര്ദ്ധിപ്പിക്കും.
ഭീകരവാദം ആഗോളസമൂഹം നേരിടുന്ന വലിയ വെല്ലുവിളിയാണെന്ന് പ്രധാനമന്ത്രി പറഞ്ഞു. മൊസാംബിക് അടക്കമുള്ള ആഫ്രിക്കന് രാജ്യങ്ങളുടെ ആരോഗ്യ മേഖലയിലെ പുരോഗതിക്കായി കുറഞ്ഞ ചിലവില് മരുന്നുകള് നല്കാന് ഭാരതം തയ്യാറാകും. എയിഡ്സ് അടക്കമുള്ള മാരക രോഗങ്ങള് പ്രതിരോധിക്കുന്നതിനുള്ള മാര്ഗ്ഗങ്ങളും ഭാരതത്തിന്റെ സഹായത്തോടെ ലഭ്യമാക്കും. ഇന്ത്യന് മഹാസമുദ്രത്തിലൂടെ ഇരു രാജ്യങ്ങളും തമ്മില് ബന്ധപ്പെടാനാവുന്നതും ഇതുവഴിയുണ്ടാകുന്ന സുരക്ഷാ പ്രശ്നങ്ങളും മോദി മൊസാംബിക് പ്രസിഡന്റുമായി ചര്ച്ച ചെയ്തു. മൊസാംബിക്കന് സുരക്ഷാ ഏജന്സികള്ക്ക് പരിശീലനത്തിനും ആധുനിക ഉപകരണങ്ങളുടെ ലഭ്യതയ്ക്കും സഹായിക്കാമെന്നും മോദി ഉറപ്പുനല്കി. ചൈനയുമായി അടുപ്പം വെച്ചുപുലര്ത്തുന്ന രാജ്യമായ മൊസാംബിക്കിലെ മോദിയുടെ സന്ദര്ശനം തന്ത്രപ്രധാനമായിരുന്നു.
മൊസാംബിക്കില് നിന്നും ദക്ഷിണാഫ്രിക്കയിലേക്ക് യാത്ര തിരിച്ച മോദി പ്രിട്ടോറിയയിലും ജോഹന്നാസ്ബര്ഗിലും ഡര്ബനിലും വിവിധ പരിപാടികളില് പങ്കെടുക്കും. മോദിയുടെ സന്ദര്ശനം ഇരുരാജ്യങ്ങളും തമ്മിലുള്ള ബന്ധം കൂടുതല് ദൃഢമാക്കുമെന്ന് ദക്ഷിണാഫ്രിക്കന് വിദേശകാര്യമന്ത്രി പറഞ്ഞു. എന്എസ്ജി അംഗത്വ വിഷയത്തില് ചൈനയ്ക്കൊപ്പം ഭാരതത്തെ എതിര്ത്ത രാജ്യമാണ് ദക്ഷിണാഫ്രിക്ക. എന്എസ്ജി വിഷയത്തിലെ എതിര്പ്പ് ഇല്ലാതാക്കാനും മോദിയുടെ സന്ദര്ശനത്തിലൂടെ ലക്ഷ്യമിടുന്നുണ്ട്. നെല്സണ് മണ്ടേലയുടെ സ്മൃതിമണ്ഡപത്തില് സന്ദര്ശനം നടത്തുന്ന മോദി ദക്ഷിണാഫ്രിക്കന് പ്രസിഡന്റ് ജേക്കബ് സുമയുമായും വൈസ് പ്രസിഡന്റ് സിറില് രമഫോസയുമായും കൂടിക്കാഴ്ച നടത്തും.ഭാരത-ദക്ഷിണാഫ്രിക്ക വ്യവസായസംഗമത്തിലും മോദി പ്രസംഗിക്കും.
ശനിയാഴ്ച താന്സാനിയയിലേക്ക് പോകുന്ന മോദി പ്രസിഡന്റ് ഡോ. ജോണ് മഗുഫുലിയുമായും താന്സാനിയയിലെ ഭാരത സമൂഹവുമായും കൂടിക്കാഴ്ച നടത്തും. തുടര്ന്ന് ഞായറാഴ്ച കെനിയയിലെത്തുന്ന മോദി കെനിയന് പ്രസിഡന്റ് കെന്യാതയുമായി ചര്ച്ച നടത്തും. ഭാരത-കെനിയ സാമ്പത്തിക സഹകരണം ശക്തിപ്പെടുത്തുക, ഇരുരാജ്യങ്ങളിലേയും ജനങ്ങള് തമ്മിലുള്ള ബന്ധം കൂടുതല് ദൃഢമാക്കുക എന്നിവയാണ് സന്ദര്ശന ലക്ഷ്യം.
