എൽമോണ്ട്: ഒരു ലക്ഷത്തിഇരുപതിനായിരം ഡോളർ സമ്മാനത്തുകയുള്ള യുഎസ് ഓപ്പൺ ഗ്രാൻഡ് പ്രീ ബാഡ്മിന്റണിൽ ഇന്ത്യൻ താരങ്ങൾ പ്രീ ക്വാർട്ടറിൽ. കഴിഞ്ഞയാഴ്ച കാനഡ ഓപ്പണിൽ വെന്നിക്കൊടി നാട്ടിയ ബി. സായ് പ്രണീത്, എച്ച്.എസ്. പ്രണോയ് എന്നിവർ അനായസ ജയത്തോടെ അവസാന പതിനാറിലിടം നേടി.
സായ് പ്ര ണീത് കാനഡയുടെ ബി.ആർ. സങ്കീർത്തിനെ കീഴടക്കി, സ്കോർ: 21-15, 21-7. പ്രീ ക്വാർട്ടറിൽ ജപ്പാന്റെ കസുമസ സകായി എതിരാളി. ഇന്ത്യൻ താരം ആർഎംവി ഗുരുസായിദത്തിനെ കീഴടക്കിയാണ് കസുമസ അവസാന പതിനാറിലിടം നേടിയത്, സ്കോർ: 21-17, 21-12. അഞ്ചാം സീഡ് എച്ച്.എസ്. പ്രണോയ് അയർലൻഡിന്റെ ജോഷ്വ മാഗീയെ കീഴടക്കി, സ്കോർ: 21-9, 21-8. കാനഡ ഓപ്പൺ ഫൈനലിസ്റ്റ് കൊറിയയുടെ ലീ ഹ്യുനൽ പ്രീ ക്വാർട്ടർ എതിരാളി.
വനിതകളിൽ തൻവി ലാഡിനും ജയം. ഗ്വാട്ടിമാലയുടെ നിക്തെ അലസാന്ദ്രയെ കീഴടക്കി തൻവി, സ്കോർ: 21-6, 21-9. അതേസമയം, ഋത്വിക ശിവാനി ഗദ്ദെ ജപ്പാന്റെ അയുമി മൈനോട് തോറ്റു, സ്കോർ: 19-21, 21-15, 18-21.
