മുംബൈ: ബോളിവുഡ് ഏറെപ്രതീക്ഷയോടെ കാത്തിരിക്കുന്ന ‘മദാരി’ പുറത്തിറങ്ങാന് ദിവസങ്ങള് മാത്രം. അതിനിടെ റംസാനെയും മുഹറത്തെയും കുറിച്ച് പരാമര്ശം നടത്തി വിവാദത്തിലായിരിക്കുകയാണ് മദാരി നായകന് ഇര്ഫാന് ഖാന്. റംസാന് ഉപവസിക്കുന്നതിനു പകരം ജനങ്ങള് ആത്മപരിശോധന നടത്തുകയാണ് വേണ്ടത്. മുഹറത്തിന് ഖുര്ബാനി (ത്യാഗം) യുടെ പേരില് മൃഗങ്ങള് കൊല ചെയ്യപ്പെടുകയാണ്.
മുഹറം ശോകപൂര്ണ്ണമായ അവസ്ഥയെ സൂചിപ്പിക്കുന്നു. പക്ഷേ നമ്മള് ചെയ്യുന്നതോ? ഘോഷയാത്ര നടത്തുന്നു.’ ഇര്ഫാന്റെ ഈ പരാമര്ശങ്ങളാണ് വിവാദമായിരിക്കുന്നത്. മുസ്ലിങ്ങള് എന്തുകൊണ്ട് തീവ്രവാദത്തിനെതിരെ ശബ്ദിക്കുന്നില്ലെന്നും ഇര്ഫാര് ചോദ്യമുയര്ത്തുന്നു.
അഭിനയശേഷിയില് ഇന്ത്യന് സിനിമ ഏറെ പ്രകീര്ത്തിച്ചിട്ടുള്ള, ഹോളിവുഡിലും പ്രതിഭ തെളിയിച്ച ഇര്ഫാന്റെ ചോദ്യങ്ങള് സ്വന്തം നാടായ ജയ്പൂരിലെ മുസ്ലിം മതപണ്ഡിതരെ കുറച്ചൊന്നുമല്ല ചൊടിപ്പിച്ചിരിക്കുന്നത്.
അദ്ദേഹം സിനിമാ അഭിനയത്തില് ശ്രദ്ധ കേന്ദ്രീകരിക്കുന്നതാണ് നല്ലത്. അല്ലാതെ മതത്തില് ഇടപെടേണ്ടതില്ല. പുതിയ സിനിമയുടെ ജനപ്രീതിയ്ക്കു വേണ്ടിയാണ് അദ്ദേഹം ഇതെല്ലാം ചെയ്യുന്നതെന്ന് ജമാ അത്തെ ഉലമ ഹിന്ദ് സംസ്ഥാന സെക്രട്ടറി മൗലാനാ അബ്ദുള് വാഹിദ് ഖത്രി കുറ്റപ്പെടുത്തി. മതത്തെക്കുറിച്ച് ഒന്നും അദ്ദേഹത്തിന് അറിയില്ല. വായടച്ച് ഇരിക്കുന്നതാണ് ഭംഗിയെന്നാണ്് മറ്റൊരു പണ്ഡിതന്റെ വിലയിരുത്തല്.
നിഷികാന്ത് കമ്മത്ത് സംവിധാനം ചെയ്ത മദാരി ജൂലൈ 15ന് പ്രദര്ശനത്തിനെത്തും.
