ഹൈദരാബാദ്: ഐഎസിന്റെ ഭാരത ഘടകം നഗരത്തില് നടത്താന് പദ്ധതിയിട്ടിരുന്ന ഭീകരാക്രമണം ദേശീയ അന്വേഷണ ഏജന്സി (എന്ഐഎ) തകര്ത്തു.
ഭീകര സംബന്ധമായ പ്രവര്ത്തനങ്ങള് നടക്കുന്നെന്ന സൂചനയെ തുടര്ന്ന് ഹൈദരാബാദിലെ വിവിധ പ്രദേശങ്ങളിലായി എന്ഐഎയും ഹൈദരാബാദ് പോലീസും സംയുക്തമായി തെരച്ചില് നടത്തുകയായിരുന്നു. തെരച്ചിലിനിടെ സംശയകരമായ സാഹചര്യത്തില് പതിനൊന്ന് പേരെയാണ് പിടികൂടിയത്. ഇവരില് ആറ് പേരുടെ അറസ്റ്റ് രേഖപ്പെടുത്തിയിട്ടുണ്ട്. ഇവര്ക്ക് ഭാരതത്തിലുടനീളം ആക്രമണം നടത്താന് പദ്ധതിയുണ്ടായിരുന്നു. അതിനായി സിറിയയിലുള്ള ഐഎസ് അംഗങ്ങളുമായി നിരന്തരമായി ഇവര് ബന്ധപ്പെടുന്നുണ്ടായിരുന്നു.
ഹൈദരാബാദിലെ മോഗാല്പുര, ഭവാനിനഗര് എന്നിവിടങ്ങളിലാണ് തെരച്ചില് നടത്തിയത്. തെരച്ചിലില് ഇവരുടെ പക്കല് നിന്നും തോക്കുകള്, മറ്റ് യുദ്ധസാമഗ്രഹികള്, പതിനഞ്ചു ലക്ഷം രൂപയുടെ കറന്സി എന്നിവ കണ്ടെത്തിയിട്ടുണ്ട്. ഇവര്ക്ക് ഇത്രയും പണവും ലാപ്പ്ടോപ്പുകളും എവിടെ നിന്നു ലഭിച്ചു എന്ന് ചോദ്യം ചെയ്തു വരികയാണ്.
നഗരത്തില് മൂന്നാഴ്ചയായി നീണ്ടു നില്ക്കുന്ന അഭിഭാഷകരുടെ ഉപരോധത്തിനിടയിലാണ് തെരച്ചില് നടന്നത്. പ്രദേശത്ത് നിരോധനാജ്ഞ പ്രഖ്യാപിച്ചിട്ടുണ്ട്. കൂടുതല് തെരച്ചിലുകള് തുടരുകയാണ്. ഈ വര്ഷം തുടക്കം മുതല് എന്ഐഎ നടത്തുന്ന ഭീകരവിരുദ്ധ നീക്കങ്ങളില് രാജ്യത്തെ വിവിധയിടങ്ങളില് നിന്ന് ഐഎസ് പ്രീണനമുള്ള 14 പേരെയാണ് പിടികൂടിയത്.
