thanneermukkom nallennakkavala-munduchirakkal roadil paalathinte approach road thakarnnu marinja trailer lorry
ചേര്ത്തല: മൂന്ന് വര്ഷം മുന്പ് നിര്മാണം പൂര്ത്തിയാക്കിയ പാലത്തിന്റെ അപ്രോച്ച്റോഡ് തകര്ന്ന് ട്രെയ്ലര്ലോറി മറിഞ്ഞു. നിര്മാണത്തിലെ ക്രമക്കേടാണ് അപകടത്തിന് കാരണമെന്ന് നാട്ടുകാര് ആരോപിച്ചു. കെ.സി. വേണുഗോപാല് എംപിയുടെ പ്രാദേശി വികസനഫണ്ടില് നിന്ന് 30 ലക്ഷം രൂപ ചെലവഴിച്ച് നിര്മിച്ച തണ്ണീര്മുക്കം പഞ്ചായത്തിലെ മുണ്ടുചിറക്കല് പാലത്തിന്റെ അപ്രോച്ച് റോഡാണ് തകര്ന്നത്.
ഇന്നലെ പുലര്ച്ചെയായിരുന്നു അപകടം. ബംഗളൂരുവില്നിന്ന് ഗ്രാനൈറ്റുമായെത്തിയ ട്രെയ്ലര് പാലംകയറുന്നതിനിടെയാണ് അപകടത്തില്പെട്ടത്. അപ്രോച്ച്റോഡും പിച്ചിങ്ങും തകര്ന്ന് സമീപത്തെ തോട്ടിലേക്ക് മറിയുകയായിരുന്നു. ഡ്രൈവര് ഷംസുദീനും ക്ലീനര് ഷാഫിയും പരിക്കേല്ക്കാതെ രക്ഷപ്പെട്ടു.
പാലത്തോടു ചേര്ന്ന് പടിഞ്ഞാറുഭാഗത്ത് അപ്രോച്ച്റോഡ് മൂന്ന് മീറ്ററോളവും, പിച്ചിങ് 15 മീറ്ററോളവും തകര്ന്നു. ട്രെയിലറിന്റെ പിന്ചക്രം കയറിയ ഭാഗത്താണ് ഒന്നരമീറ്ററോളം വീതിയില് റോഡ് തകര്ന്നത്. ഇതോടെ പിച്ചിങ്ങും തകര്ന്ന് ട്രെയിലര് തോട്ടിലേക്ക് പതിക്കുകയായിരുന്നു. ഗതാഗതത്തിരക്കേറിയ റോഡിലാണ് പാലം സ്ഥിതിചെയ്യുന്നത്. റോഡ് പണിയുന്ന ഘട്ടത്തില് നിര്മാണത്തിലെ അപാകതകള് ചൂണ്ടിക്കാട്ടി പ്രദേശവാസികള് ഉന്നത അധികാരികള്ക്കടക്കം പരാതി നല്കിയെങ്കിലും ഇതെല്ലാം മറികടന്ന് ചില രാഷ്ട്രീയനേതാക്കളുടെ ഇടപെടലിലൂടെ നിര്മാണം പൂര്ത്തിയാക്കുകയായിരുന്നു.
റോഡിന് സുരക്ഷയേകാന് പിച്ചിങ് നിര്മിച്ചത് ചരിവില്ലാതെ കുത്തനെയാണെന്നും ഇതാണ് ബലക്ഷയത്തിന് കാരണമായതെന്നും വിമര്ശനം ഉയര്ന്നിട്ടുണ്ട്. പരാതികളെല്ലാം പഞ്ചായത്ത് അധികൃതര് അവഗണിക്കുകയായിരുന്നുവെന്ന് ആക്ഷേപം വ്യാപകമായി. റോഡ് തകര്ന്നതിനെ കുറിച്ച് വിജിലന്സ് അന്വേഷണം നടത്തണമെന്നാണ് നാട്ടുകാരുടെ ആവശ്യം.
