കട്ടപ്പന: കട്ടപ്പന ഗവണ്‍മെന്റ് ട്രൈബല്‍ ഹയര്‍ സെക്കണ്ടറി സ്‌കൂളിന്റെ അന്യാധീനപ്പെട്ട സ്ഥലം വീണ്ടെടുക്കാന്‍ പട്ടിക ജാതി പട്ടിക വര്‍ഗ്ഗ കമ്മീഷന്‍ ഉത്തരവായി. മന്നാന്‍ സമുദായ നേതാവ് രാജപ്പന്‍ വാഴപ്പറമ്പില്‍ നല്‍കിയ പരാതിയിലാണ് ഉത്തരവ്. 1958-ല്‍ വെളളചാമി നാരായണന്‍ സൗജന്യമായി നല്‍കിയ അഞ്ച് ഏക്കര്‍ സ്ഥലത്താണ് സ്‌കൂള്‍ ആരംഭിക്കുന്നത്. പിന്നീട് 1968-ല്‍ വെളളചാമി ഗോപാലന്‍ അര ഏക്കര്‍ സ്ഥലവും സ്‌കൂളിന് നല്‍കി. ഇതോടെ അഞ്ചര ഏക്കര്‍ സ്ഥലമാണ് സ്‌കൂളിന് വന്നുചേര്‍ന്നത്. ഈ വസ്തു കാലക്രമേണ പലരും കയ്യേറി. ഇപ്പോള്‍ സ്‌കൂളിന്റെ ആസ്തി വെറും 86 സെന്റ് ആയി. സ്‌കൂളിന്റെ അന്യാധീനപ്പെട്ട സ്ഥലം വീണ്ടെടുക്കാന്‍ നടപടി സ്വീകരിക്കണമെന്ന് ആദിവാസി മന്നാന്‍ സമുദായം കളക്ടറോട് ആവശ്യപ്പെടുകയായിരുന്നു. അന്നത്തെ ഇടുക്കി ജില്ലാ കളക്ടറായിരുന്ന ഡോ.ഡി.ബാബുപോള്‍ 1975-ല്‍ ഈ വിഷയത്തിലിടപെടുകയും ഏതാനും കയ്യേറ്റക്കാരെ ഒഴിപ്പിക്കുകയും ചെയ്ത് സ്ഥലത്തിന്റെ വിസ്തൃതി രണ്ടേക്കര്‍ ആറ് സെന്റായി ഉയര്‍ത്തി സ്‌കൂളിനെ ഏല്‍പിക്കുകയും ചെയ്തിരുന്നു. അതിന് ശേഷം 1982-ല്‍ ദേവികുളം സബ്കളക്ടറായി ചാര്‍ജെടുത്ത അല്‍ഫോന്‍സ് കണ്ണന്താനം കുറെ കയ്യേറ്റക്കാരെ കൂടി ഒഴിപ്പിക്കുകയും ഭൂമിയുടെ വിസ്തൃതി മൂന്നര ഏക്കര്‍ ആയി വര്‍ദ്ധിപ്പിക്കുകയും ചെയ്തു. പിന്നീടുള്ള രണ്ടേക്കറോളം സ്ഥലം നിലവില്‍ ഒന്‍പത് വ്യക്തികളുടെ പക്കലാണ്. റവന്യൂ ഉദ്യോഗസ്ഥരുടെ സഹായത്തോടെ ഈ ഭൂമിക്ക് പട്ടയം സമ്പാദിക്കുകയും ചെയ്തിട്ടുളളതായി പറയപ്പെടുന്നു. ഈ സ്ഥലങ്ങളില്‍ ഇപ്പോള്‍ കെട്ടിടങ്ങളും, മറ്റ് സ്ഥാപനങ്ങളും പ്രവര്‍ത്തിക്കുകയും ചെയ്യുന്നുണ്ട്. വിവിധ മേഖലകളില്‍ നിന്നുള്ള കൈയ്യേറ്റം മൂലം സ്‌കൂളിനുള്ള സ്ഥലം നാമമാത്രമായി ചുരുങ്ങി. ഈ സ്ഥലം എത്രയും പെട്ടെന്ന് തിരിച്ചുപിടിച്ച് സ്‌കൂള്‍ അധികൃതരെ ഏല്‍പ്പിക്കണമെന്നാണ് കേരള സംസ്ഥാന എസി/എസ്ടി ചെയര്‍മാന്‍ ഉത്തരവട്ടിരിക്കുന്നത്. ഇത് സംബന്ധിച്ച് ഉത്തരവ് ഇടുക്കി ആര്‍.ടി.ഒ., ജില്ലാ പഞ്ചായത്ത,്‌ഡെപ്യൂട്ടി ഓഫീസര്‍ വിദ്യാഭ്യാസം തൊടുപുഴ എന്നിവര്‍ക്ക് ഉത്തരവിന്റെ കോപ്പി നല്‍കിയതായിട്ട് അറിയിച്ചു. കയ്യേറ്റക്കാര്‍ക്കെതിരെ നിയമ നടപടി സ്വീകരിക്കണമെന്ന് ആവശ്യവും ശക്തമാണ്.
കട്ടപ്പന ഗവണ്‍മെന്റ് ട്രൈബല്‍ സ്‌കൂളിന്റെ രണ്ടേക്കര്‍ സ്ഥലം വീണ്ടെടുക്കാന്‍ ഉത്തരവ്
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.