ദിനേശ് മോഹാനിയയെ പോലീസ് അറസ്റ്റു ചെയ്തു കൊണ്ടുപോകുന്നു.
ന്യുദല്ഹി: ആംആദ്മി പാര്ട്ടി എംഎല്എ ദിനേശ് മോഹാനിയയെ ദല്ഹി പോലീസ് അറസ്റ്റു ചെയ്തു. പീഡനശ്രമം അടക്കം രണ്ടു കേസുകളിലാണ് അറസ്റ്റ്.
പരാതി പറയാനെത്തിയ വീട്ടമ്മമാരോട് മോശമായി പെരുമാറി, പൊതുസ്ഥലത്തു വച്ച് അറുപതുകാരന്റെ കരണത്തിന് അടിച്ചു എന്നീ കേസുകളിലാണ് സംഗംവിഹാറില് നിന്നുള്ള ആപ്പ് എംഎല്എ ദിനേശ് മോഹാനിയയെ വാര്ത്താസമ്മേളനത്തിനിടെ പൊലീസ് അറസ്റ്റ് ചെയ്തത്.
വെള്ളിയാഴ്ച്ചയാണ് കുടിവെള്ള പ്രശ്നത്തെ കുറിച്ച് പരാതി പറയുവാനെത്തിയ സ്ത്രീകളോട് മോശമായി പെരുമാറിയത്. ഇവര് പോലീസില് പരാതിപ്പെട്ടതിനെത്തുടര്ന്ന് വെള്ളിയാഴ്ച തന്നെ ഇയാള്ക്ക് എതിരെ കേസ് എടുത്തിരുന്നു. ഇത് ജാമ്യമില്ലാക്കുറ്റമാണ്. ലൈംഗികമായി പെരുമാറിയതിന് ഐപിസി 354, 354 എ 354 ബി എന്നീ വകുപ്പുകള് പ്രകാരവും സ്ത്രീകളുടെ അന്തസ് ഇടിക്കും വിധത്തില് പെരുമാറിയതിന് 506, 509 വകുപ്പുകള് പ്രകാരവുമാണ് കേസ് എടുത്തത്.
നിലവില് ദല്ഹി ജലഅതോറിറ്റിയുടെ വൈസ് ചെയര്മാനാണ് മോഹാനിയ. തെക്ക് കിഴക്കന് ദല്ഹിയിലെ രാകേഷ് കുമാര് എന്ന അറുപതുകാരന് നല്കിയ പരാതിയിലും എംഎല്എക്കെതിരെ കേസ് രജിസ്റ്റര് ചെയ്തിരുന്നു. ഗോവിന്ദപുരിയിലെ കോളനിയില് സന്ദര്ശനത്തിനെത്തിയ എംഎല്എയോട് പ്രദേശത്തെ അസൗകര്യങ്ങളെ കുറിച്ച് പരാതി പറഞ്ഞ രാകേഷ് കുമാറിനെ അദ്ദേഹം അടിച്ചുവെന്നാണ് പരാതി.
രാകേഷ് കുമാറിനെ തല്ലുകയും തള്ളിമാറ്റുകയും ചെയ്ത മോഹാനിയ സംഭവശേഷം അനുയായികളോടൊപ്പം സ്ഥലംവിട്ടു.
അതേസമയം എംഎല്എയുടെ അറസ്റ്റിനെതിരെ പോലീസിനും കേന്ദ്ര സര്ക്കാരിനുമെതിരെ കടുത്ത വിമര്ശനവുമായി ദല്ഹി മുഖ്യമന്ത്രി അരവിന്ദ് കേജ്രിവാള് രംഗത്തെത്തി. മോദി ദല്ഹിയില് അടിയന്തരാവസ്ഥ പ്രഖ്യാപിച്ചിരിക്കുകയാണെന്നാണ് കേജ്രിവാളിന്റെ ആരോപണം.അറസ്റ്റ് ചെയ്യല്, റെയ്ഡ്, ഭീഷണിപ്പെടുത്തല്, കള്ളക്കേസുകള് ചുമത്തുക ഇതെല്ലാമാണ് ദല്ഹി സര്ക്കാരിനെതിരെ മോദി ചെയ്തുകൊണ്ടിരിക്കുന്നതെന്ന് കേജ്രി ആരോപിക്കുന്നു.
അഴിമതിക്കേസുകളിലും ആരോപണങ്ങളിലും പെട്ട് നട്ടം തിരിയുന്നതിനിടെയാണ് ആപ്പ് സര്ക്കാരിന് പുതിയ പുതിയ പ്രഹരം. പീഡനശ്രമക്കേസില് എംഎല്എ അറസ്റ്റിലായത് കേജ്രിക്കും പാര്ട്ടിക്കും വലിയ നാണക്കേടാണ് ഉണ്ടാക്കിയിരിക്കുന്നത്.
ആപ്പ് എംഎല്എമാരുടെ സ്ത്രീവിരുദ്ധ സ്വഭാവമാണ് മോഹാനിയയുടെ അറസ്റ്റോടെ വെളിവായതെന്ന് ബിജെപി ചൂണ്ടിക്കാട്ടി. ദല്ഹിയില് കുടിവെള്ള പ്രശ്നം വളരെ രൂക്ഷമാണെന്നും ഇത് തെളിയിക്കുന്നു. ബിജെപി ദല്ഹി ഘടകം അധ്യക്ഷന് സതീഷ് ഉപാധ്യായ പറഞ്ഞു.
