ബെംഗളൂരു: ബെംഗളൂരുവിലെ നിയമസഭാ സാമാജികര്ക്കുള്ള ഹോസ്റ്റല് ഇടനാഴി കഴിഞ്ഞദിവസം അതിക്രൂരമായൊരു മര്ദ്ദനത്തിന് സാക്ഷിയായി. കര്ണാടകത്തില് മുഡിഗെരെയിലെ മുന് എംഎല്എ കുമാരസ്വാമി ഭാര്യ സവിതയെ തല്ലുന്ന കാഴ്ച്ചയ്ക്കാണ് പോലീസുകാരുള്പ്പെടെയുള്ളവര് നോക്കുകുത്തികളായത്.
ഹാസനിലെ ഒരു യുവതിയുമായി കുമാരസ്വാമിയ്ക്കുള്ള അവിഹിത ബന്ധം വ്യക്തമാക്കുന്ന ഓഡിയോ ക്ലിപ്പിങ് ആറുമാസം മുമ്പ് പരസ്യപ്പെടുത്തിയിരുന്നു. ഇതേത്തുടര്ന്ന് അദ്ദേഹവും ഭാര്യയും വേര്പെട്ടാണ് കഴിഞ്ഞിരുന്നത്. എംഎല്എ ഹോസ്റ്റലിലെ ഗസ്റ്റ് ഹൗസില് താമസിക്കുന്ന കുമാരസ്വാമിയെ കൊണ്ടുപോകാന് ഭാര്യ സവിത പോലീസുമായെത്തിയതാണ് കലഹത്തിന് വഴിയൊരുക്കിയത്
. ഭാര്യയെ കണ്ടതോടെ കുമാരസ്വാമി ഓടി കാറില് കയറാന് ശ്രമിച്ചു. ഇതുകണ്ട് സവിത കാറിന്റെ താക്കോല് വലിച്ചൂരിയെടുത്തു. പ്രകോപിതനായ കുമാരസ്വാമി സവിതയെ നിര്ദ്ദയം മര്ദ്ദിക്കാന് തുടങ്ങി.
പോലീസ് ഇരുവരെയും പിടിച്ചുമാറ്റിയിട്ടും പിന്മാറാതെ അദ്ദേഹം ഭാര്യയെ തല്ലുന്നത് തുടര്ന്നു. തല്ലുകൊണ്ടെങ്കിലും ഭര്ത്താവിന്റെ മര്ദ്ദനം സാരമില്ല, അത് ഞങ്ങളുടെ കുടുംബ പ്രശ്നമാണ്, പരാതിയില്ല, ‘അപര’യെ ഭര്ത്താവില് നിന്നകറ്റണമെന്നേയുള്ളൂ എന്ന നിലപാടാണ് സര്ക്കാര് സര്വ്വീസില് എക്സിക്യൂട്ടീവ് എഞ്ചിനീയറായ സവിതയ്ക്ക്.
