ന്യൂദൽഹി: രാജ്യത്തിന്റെ സാമ്പത്തിക ഉപദേഷ്ടാവ് അരവിന്ദ് സുബ്രഹ്മണ്യത്തിൽ സർക്കാരിന് പരിപൂർണ്ണ വിശ്വാസമാണെന്ന് കേന്ദ്രധനമന്ത്രി അരുൺ ജെയ്റ്റ്ലി പറഞ്ഞു. സമയാസമയങ്ങളിൽ കൃത്യമായ ദിശയിൽ സമ്പദ് ഘടനയെ നയിക്കാൻ അദ്ദേഹത്തിന്റെ നിരീക്ഷണങ്ങൾക്ക് സാധിച്ചിട്ടുണ്ടെന്നും ജെയ്റ്റ്ലി പറഞ്ഞു.
അരവിന്ദ് സുബ്രഹ്മണ്യത്തിനെതിരെ സുബ്രഹ്മണ്യൻ സ്വാമി ആരോപണങ്ങളുമായി രംഗത്തെത്തിയ പശ്ചാത്തലത്തിലായിരുന്നു കേന്ദ്രസർക്കാരിന്റെ വിശദീകരണം.
സുബ്രഹ്മണ്യൻ സ്വാമിയുടെ നിലപാടല്ല ബിജെപിക്കെന്ന് ദേശീയ സെക്രട്ടറി ശ്രീകാന്ത് ശർമ്മയും വ്യക്തമാക്കിയിട്ടുണ്ട്.
യുപിഎ സർക്കാരിനോടും സോണിയാഗാന്ധിയോടും വിധേയത്വം പുലർത്തുന്ന വിവിധ മന്ത്രാലയങ്ങളിലെ 27 ഉന്നത ഉദ്യോഗസ്ഥരുടെ പട്ടിക തന്റെ കൈവശമുണ്ടെന്നും പി. ചിദംബരമാണ് അവരെയെല്ലാം തൽസ്ഥാനങ്ങളിൽ നിയമിച്ചിരിക്കുന്നതെന്നും സ്വാമി പറഞ്ഞു. നേരത്തെ റിസർവ് ബാങ്ക് ഗവർണ്ണർ രഘുറാം രാജനെതിരെയും സ്വാമി രംഗത്തെത്തിയിരുന്നു.
