ന്യൂദല്ഹി: അഫ്ഗാന് തലസ്ഥാനമായ കാബൂളിലെ വിവിധ സ്ഥലങ്ങളില് ഭീകരര് നടത്തിയ സ്ഫോടനങ്ങളില് രണ്ട് ഭാരതീയരുള്പ്പടെ 25 പേര് കൊല്ലപ്പെട്ടു. ആക്രമണം വിദേശകാര്യ മന്ത്രാലയം സ്ഥിരീകരിച്ചിട്ടുണ്ട്. ഡറാഡൂണില് നിന്നുള്ള ഗണേഷ് താപ്പ, ഗോവിന്ദ് സിങ് എന്നിവരാണ് മരിച്ച ഭാരതീയര്.
രണ്ട് സ്ഥലങ്ങളിലാണ് ഭീകരര് ആക്രമണം നടത്തിയത്. ജലാലാബാദില് മിനി ബസിനുനേര്ക്കുണ്ടായ ചാവേര് ആക്രമണത്തിലാണ് രണ്ട് ഭാരതീയരടക്കം 16 പേര് മരിച്ചത്. മരിച്ച 14 പേര് നേപ്പാളില് നിന്നുള്ള സുരക്ഷാ ഗാര്ഡുകളാണ്.
വടക്കന് പ്രവിശ്യയായ ബദക്ഷാനില് ആണ് രണ്ടാമത് സ്ഫോടനമുണ്ടായത്. മാര്ക്കറ്റില് നിര്ത്തിയിട്ട മോട്ടോര് ബൈക്കില് ഘടിപ്പിച്ച റിമോട്ട് നിയന്ത്രിത ബോംബാണ് പൊട്ടിയത്. സ്ഫോടനത്തില് എട്ടുപേര് കൊല്ലപ്പെടുകയും 18 പേര്ക്ക് പരിക്കേല്ക്കുകയും ചെയ്തു. ഈ ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല.
അഫ്ഗാനില് അടിച്ചമര്ത്തല് നടത്തുന്ന ശക്തികള്ക്കെതിരായ ആക്രമണമാണിതെന്ന് ആദ്യ സ്ഫോടനത്തിന്റെ ഉത്തരവാദിത്തമേറ്റെടുത്ത് താലിബാന് ട്വിറ്ററില് കുറിച്ചു.
