ബിര്സ്റ്റാള് (ലണ്ടന്): ബ്രിട്ടീഷ് വനിതാ എംപിയെ അക്രമി വെടിവച്ചുകൊന്നത് ബ്രിട്ടനെ ഞെട്ടിച്ചു. ലേബര് പാര്ട്ടി എംപിയായ ജോ കോക്സ്(41) ആണ് കൊല്ലപ്പെട്ടത്. വെസ്റ്റ് യോര്ക്ഷയറിലെ ബിര്സ്റ്റാളിലാണ് സംഭവം. റോഡ് സൈഡില് രക്തത്തില് കുളിച്ചു കിടന്ന ജോ കോക്സിനെ അക്രമി ചവിട്ടുകയും തൊഴിക്കുകയും ചെയ്തു. ഇവരെ കുത്തിപ്പരിക്കേല്പിച്ചതായും റിപ്പോര്ട്ടുണ്ട്.
ആശുപത്രിയില് പ്രവേശിപ്പിച്ചെങ്കിലും കോക്സിന്റെ ജീവന് രക്ഷിക്കാനായില്ല. അക്രമിയെന്നു സംശയിക്കുന്ന 52കാരനെ അറസ്റ്റു ചെയ്തതായി ബിര്സ്റ്റാള് പോലീസ് അറിയിച്ചു. ബ്രിട്ടന് ആദ്യം എന്ന് ആക്രോശിച്ചുകൊണ്ടാണ് അക്രമി വനിതാ എംപിക്കു നേരേ പാഞ്ഞടുത്തത്. മൂന്നുതവണ അക്രമി വെടിയുതിര്ക്കുകയായിരുന്നു.
ജോ കോക്സിന് ദാരുണമായ കൊലപാതകത്തില് ലേബര് പാര്ട്ടിയും ലേബര് കുടുംബവും മുഴുവന് രാജ്യവും ഞെട്ടല് രേഖപ്പെടുത്തുന്നതായി ലേബര് പാര്ട്ടി നേതാവ് ജെര്മി കോര്ബൈന് പറഞ്ഞു. കോക്സിന്റെ മരണത്തിലൂടെ വലിയൊരു പ്രതിഭയുടെ നഷ്ടമാണ് ഉണ്ടായിരിക്കുന്നതെന്ന് പ്രധാനമന്ത്രി ഡേവിഡ് കാമറോണ് പറഞ്ഞു.
2008ല് യുഎസ് പ്രസിഡന്റ് ബരാക്ക് ഒബാമയുടെ പ്രചാരണവിഭാഗത്തില് അംഗമായിരുന്ന അവര് വിവാഹിതയും രണ്ടുകുട്ടികളുടെ അമ്മയുമാണെന്നും അദ്ദേഹം അനുസ്മരിച്ചു.
യൂറോപ്യന് യൂണിയനില് ബ്രിട്ടനെ നിലനിര്ത്തണമെന്നു വാദിക്കുന്ന എംപിയാണ് ജോ കോക്സ്, ബ്രിട്ടന് യൂറോപ്യന് യൂണിയനില് തുടരണമോ പുറത്തുപോകണമോ എന്നതു സംബന്ധിച്ച് ഈ മാസം 23നു ഹിതപരിശോധന നടക്കാനിരിക്കെയാണ് ദാരുണ സംഭവം അരങ്ങേറിയത്.
ബ്രിട്ടന് യൂറോപ്യന് യൂണിയന് അംഗത്വം തുടരണമെന്നു വാദിക്കുകയും അതിനായി പ്രചാരണം നടത്തുകയും ചെയ്ത ജോ കോക്സിന്റെ കൊലപാതകം ഗുരുതര പ്രത്യാഘാതത്തിനിടയാക്കും. പ്രചാരണ പരിപാടികള് ഒരു ദിവസത്തേക്കു നിര്ത്തിവയ്ക്കുകയാണെന്നു ബ്രിട്ടന് യൂറോപ്യന് യൂണിയന് വിടരുതെന്നു വാദിക്കുന്നവരുടെ സംഘടന അറിയിച്ചു.
ജിബ്രാള്ട്ടറില് നടത്താനിരുന്ന പ്രചാരണ റാലി റദ്ദാക്കിയതായി ബ്രിട്ടീഷ് പ്രധാനമന്ത്രി ഡേവിഡ് കാമറോണ് പറഞ്ഞു.
വടക്കന് ഇംഗഌണ്ടിലെ യോര്ക്ഷയറിലെ ബാറ്റ്ലി ആന്ഡ് സ്പെന് മണ്ഡലത്തില്നിന്നുള്ള പ്രതിപക്ഷ ലേബര്പാര്ട്ടി എംപിയാണു 41കാരിയായ ജോ കോക്സ്. കേംബ്രിഡ്ജില്നിന്ന് ബിരുദം നേടിയശേഷമാണു രാഷ്ട്രീയത്തിലേക്ക് ഇറങ്ങിയത്. കഴിഞ്ഞവര്ഷമാണ് എംപിയായി തെരഞ്ഞെടുക്കപ്പെട്ടത്.
സിറിയയിലെ ആഭ്യന്തരയുദ്ധത്തിനു പരിഹാരം കാണുന്നതിനു മുന്ഗണന നല്കണമെന്നു നിര്ദേശിച്ച കോക്സ് ഐഎസിനെതിരേ പോരാടാന് ബ്രിട്ടീഷ് സൈന്യത്തെ അയയ്ക്കണമെന്നും ആവശ്യപ്പെട്ടിരുന്നു. സംഭവത്തില് 77 കാരനായ ഒരാള്ക്കുകൂടി പരിക്കേറ്റിരുന്നുവെന്നും എന്നാല് ഇയാളുടെ നിലഗുരുതരമല്ലെന്നും പോലീസ് പറഞ്ഞു.
