കണ്ണൂര്‍: ജില്ലയിലെ പാതയോരങ്ങളില്‍ കാല്‍നടയാത്രക്കാര്‍ക്കും വാഹനങ്ങള്‍ക്കും ഭീഷണിയായി വന്‍മരങ്ങള്‍. അപകടാവസ്ഥയിലുളള വൃക്ഷങ്ങള്‍ മുറിച്ചു മാറ്റണമെന്ന ആവശ്യം ശക്തം. കാലപഴക്കം പിടിപ്പെട്ടതും പുഴുകുത്തു കാരണവും മറ്റും നശിച്ച നിരവധി മരങ്ങളാണ് ജില്ലയിലെ പല റോഡരികുകളിലും ഉളളത്. കാലവര്‍ഷവും കാറ്റും ഇത്തരം മരങ്ങള്‍ കടപുഴകി വീഴാന്‍ കാരണമാകുമെന്നതിനാല്‍ പല റോഡുകളിലും വാഹനങ്ങളും കാല്‍നടയാത്രക്കാരും ഭയപ്പാടോടെയാണ് കടന്നു പോകുന്നത്. മലയോര ഹൈവേ, സംസ്ഥാന പാതകളായ തലശ്ശേരി-ഇരിട്ടി, തളിപ്പറമ്പ്-ഇരിട്ടി, വിവിധ മലയോര റോഡുകള്‍ക്കരികിലുമാണ് അപകടവസ്ഥയില്‍ ഏറ്റവും കൂടുതല്‍ വടവൃക്ഷങ്ങള്‍ നിലകൊളളുന്നത്. കഴിഞ്ഞ വര്‍ഷം സംസ്ഥാനത്തിന്റെ വിവിധ ഭാഗങ്ങളില്‍ മരങ്ങള്‍ കടപുഴകി വീണ് അപകടങ്ങള്‍ ഉണ്ടായ പശ്ചാത്തലത്തില്‍ അപകട ഭീഷണിയുയര്‍ത്തുന്ന പഴക്കം ചെന്ന മരങ്ങള്‍ സംസ്ഥാന സര്‍ക്കാറിന്റെ നിര്‍ദ്ദേശ പ്രകാരം പല മേഖലകളിലും മുറിച്ചു നീക്കിയിരുന്നു. എന്നാല്‍ പല മേഖലയിലും ഈ പ്രകിയ നടന്നിരുന്നില്ല. മാത്രമല്ല കാലപ്പഴക്കം ചെന്ന മരങ്ങള്‍ രോഗങ്ങള്‍ ബാധിച്ചും കീടബാധ കാരണവും മറ്റും കൊല്ലംതോറും നശിക്കുകയാണ്. ഇത്തരം മരങ്ങള്‍ കണ്ടെത്തി വര്‍ഷാവര്‍ഷം മുറിച്ചു നീക്കണമെന്ന ആവശ്യം ശക്തമാണ്.
പിഞ്ചു വിദ്യാര്‍ത്ഥികള്‍ സ്‌ക്കൂളിലേക്ക് നടന്നു പോകുന്ന ഇടങ്ങളിലും ചില സ്‌ക്കൂളുകളുടെ പരിസരങ്ങളിലും അപകട ഭീഷണിയുയര്‍ത്തി നില്‍ക്കുമ്പോഴും ഇവ മുറിച്ചു മാറ്റാന്‍ സ്‌ക്കൂള്‍ അധികൃതരോ സര്‍ക്കാരോ തയ്യാറാകുന്നില്ലെന്ന പരാതി വ്യാപകമാണ്. സ്‌ക്കൂള്‍ വിദ്യാര്‍ത്ഥികളേയും വഹിച്ച നിരവധി വാഹനങ്ങളാണ് ഇത്തരം അപകടവസ്ഥയിലുളള മരങ്ങള്‍ ഇരുവശങ്ങളിലും സ്ഥിതി ചെയ്യുന്ന റോഡുകളിലൂടെ ഇരുവശങ്ങളിലേക്കും ദിനം പ്രതി സഞ്ചരിക്കുന്നത്. അടിയന്തിരമായി അപകടാവസ്ഥയിലായ മരങ്ങള്‍ മുറിച്ചുമാറ്റിയില്ലെങ്കില്‍ കാലവര്‍ഷം ശക്തി പ്രാപിക്കുന്നതോടെ അപകടങ്ങള്‍ക്ക് വഴിയൊരുക്കും. ദുരന്തങ്ങള്‍ വിളിച്ചു വരുത്തലാവും ഫലം.
