പഴയങ്ങാടി: പഴയങ്ങാടി മേഖലയില് കടല്ഭിത്തി നിര്മാണം എങ്ങുമെത്താതെ നീളുമ്പോള് തീരദേശവാസികള് ആശങ്കയുടെ മുള്മുനയില്. കഴിഞ്ഞ കാലവര്ഷത്തില് പഴയങ്ങാടി, പുതിയങ്ങാടി മേഖലയിലെ കടല്ഭിത്തികള് വ്യാപകമായി തകര്ന്നിരുന്നു. പുതിയങ്ങാടി നീരൊഴുക്കുംചാല്, ചൂട്ടാട്, കക്കാടന്ചാല്, അരിയില്ചാല് എന്നിവിടങ്ങളിലാണു കടല്ഭിത്തി തകര്ന്നത്. ഇതേത്തുടര്ന്നു വ്യാപകമായ നാശനഷ്ടം ഉണ്ടായിരുന്നു.
പിന്നീട് ഈമേഖലകളില് കടല്’ിത്തി നിര്മാണത്തിനായി 65 ലക്ഷം രൂപ നീക്കിവച്ചുവെങ്കിലും കടല്ഭിത്തിനിര്മാണം നടന്നില്ല. ഈവര്ഷവും കാലവര്ഷം കനക്കുന്നതിനു മുമ്പേ മാടായി-മാട്ടൂല് തീരദേശമേഖലകളില് പല സ്ഥലങ്ങളിലും കടല്ഭിത്തി തകര്ന്നു വ്യാപകമായ നാശനഷ്ടങ്ങള് ഉണ്ടായിരുന്നു.
എന്നാല് അധികൃതര് തിരിഞ്ഞുനോക്കിയതുപോലുമില്ലെന്നാണു പ്രദേശവാസികളുടെ ആരോപണം. കടല്ക്ഷോഭം തടയുവാനായി വനംവകുപ്പ് അധികൃതര് നട്ടുവളര്ത്തിയ കാറ്റാടി മരങ്ങള് സ്വകാര്യ വ്യക്തികള് വ്യാപകമായി മുറിച്ചുമാറ്റിയതായും ആക്ഷേപമുണ്ട്. കടല്ഭിത്തി നിര്മിക്കാന് അടിയന്തര നടപടികള് സ്വീകരിച്ചില്ലെങ്കില് മാടായി, മാട്ടൂല് പഞ്ചായത്തുകളില് കൂടുതല് നാശനഷ്ടങ്ങള് ഉണ്ടാകുമെന്ന ഭീതിയിലാണ് തീരദേശവാസികള്.
