ന്യൂയോര്ക്ക്: മരിക്കുമ്പോള് പ്രിയപ്പെട്ട സ്വന്തം ഓമനമൃഗങ്ങളെയും ഇനി മുതല് ഇവിടെയുളളവര്ക്ക് ഒപ്പം കൊണ്ടുപോകാം. ഇത് സംബന്ധിച്ച ബില് സംസ്ഥാന നിയമനിര്മാണസഭ പാസാക്കി. ഇനി ഗവര്ണറുടെ അംഗീകാരം കൂടി ലഭിച്ചാല് ഇത് നിയമമാകും. സംസ്ഥാന സെനറ്റ് മാര്ച്ചില് തന്നെ ബില്ലിനെ ഐകകണ്ഠേന അംഗീകരിച്ചിരുന്നു.
ഉടമയും മൃഗവും ഒരേ സമയം മരിയ്ക്കുകയാണെങ്കില് ഇരുവരെയും ഒരേ ശ്മശാനത്തില് തന്നെ അടക്കാനാകും. അതേസമയം മത ശ്മശാനങ്ങളില് ഇത് അനുവദനീയമല്ലെന്നും ബില്ല് വ്യവസ്ഥ ചെയ്യുന്നുണ്ട്.
രാജ്യത്തെ വളരെ കുറച്ച് സംസ്ഥാനങ്ങള് മാത്രമാണ് മൃഗങ്ങളെയും മനുഷ്യരെയും ഒന്നിച്ച് അടക്കാന് അനുമതി നല്കുന്നുളളൂ. ഫ്ളോറിഡയില് ഇത്തരത്തില് ഓമന ജന്തുക്കളുടെ അടക്കം ചെയ്ത ജഡാവശിഷ്ടങ്ങള് തിരികെയെടുത്ത് ഉടമയ്ക്കൊപ്പം അടക്കം ചെയ്യാന് അനുവദിക്കുന്നുണ്ട്.
ന്യൂജഴ്സിയില് ഉടമയ്ക്ക് മൃഗത്തെ അടക്കം ചെയ്തിട്ടുളള ശ്മശാനത്തില് അന്ത്യനിദ്രയാകാം. 2014ല് ന്യൂയോര്ക്കിലും സമാന നിയമം നിലവില് വന്നിട്ടുണ്ട്. ഒറിഗോണില് മനുഷ്യ ശ്മശാനത്തില് മൃഗത്തിന്റെ അവശിഷ്ടങ്ങള് അടക്കാന് അനുവദിക്കുന്നുണ്ട്.
പെന്സില്വാനിയയില് 2006 മുതല് ശ്മശാനങ്ങളില് മനുഷ്യനും വളര്ത്ത് മൃഗങ്ങള്ക്കും വെവ്വേറെയും രണ്ടും പേര്ക്കും ഒന്നിച്ചും ഇടമൊരുക്കിയിട്ടുണ്ട്.
വെര്ജിനീയയില് 2014ല് മനുഷ്യനെയും വളര്ത്ത് മൃഗങ്ങളെയും ഒന്നിച്ച് സംസ്കരിക്കുന്നതിന് നിയമം കൊണ്ടുവന്നിട്ടുണ്ട്. എന്നാല് വളര്ത്ത് മൃഗത്തോടൊപ്പം ഒരു മൃഗം കൂടി കൂട്ടായി ഉണ്ടായിരിക്കണമെന്നും ഇവയെ ഒരേ ശവപ്പെട്ടിയില് അടക്കം ചെയ്യണമെന്നുമാണ് വ്യവസ്ഥ.
മസാച്യുസെറ്റ്സില് 2015ല് ഇതിനായി അനുമതിതേടി പൊതുജനാരോഗ്യ പഠന സമിതിയ്ക്ക് റിപ്പോര്ട്ട് നല്കിയിരുന്നു.
ഇവര് അനുകൂല നടപടിയാണ് കൈക്കൊണ്ടത്. ശ്മശാനത്തില് വളര്ത്തുമൃഗങ്ങള്ക്കും ഉടമയ്ക്കും ഒന്നിച്ച് അന്ത്യവിശ്രമത്തിനുളള പ്രത്യേക ഇടമൊരുക്കാനുളള ബില് ലൂസിയാനയും പരിഗണിച്ച് വരികയാണ്. എന്നാല് ഇക്കൊല്ലത്തെ സമ്മേളനം അവസാനിച്ചിട്ടും ഇക്കാര്യത്തില് നടപടിയായില്ല.
പലയിടങ്ങളിലും ഓമന നായ്ക്കളുടെയും പൂച്ചകളുടെയും മറ്റും സംസ്കരിച്ചതിന്റെ ചാരം ഉടമകളുടെ ശവപ്പെട്ടിയില് നിക്ഷേപിക്കാറുണ്ട്.
