കുട്ടനാട്: ആലപ്പുഴ-ചങ്ങനാശ്ശേരി റോഡില് മങ്കൊമ്പ് ഒന്നാംകരയില് വീടിന് സമീപം നിന്ന ദളിത് യുവാവിനെ എക്സെസുകാര് ക്രൂരമായി മര്ദ്ദിച്ചെന്ന് പരാതി. ഒന്നാംകര സജിഭവനില് പരേതനായ കെ.ചെല്ലപ്പന്റെ മകന് സി.സജിക്കാണ് മര്ദ്ദനമേറ്റത്.
വീട്ടിന് സമീപമുള്ള കുട്ടനാട് എക്സെസ് റേഞ്ച് ഓഫീസിലെ ഇന്സ്പെക്ടറും, രണ്ട് ഉദ്യോഗസ്ഥരും ചേര്ന്നാണ് മര്ദ്ദിച്ചതെന്നാണ് ജില്ലാ പോലീസ് ചീഫിന് നല്കിയ പരാതിയില് പറയുന്നത്. പരാതി ഇപ്രകാരമാണ് : ചൊവ്വാഴ്ച രാത്രി പത്തോടെ വീടിന് എതിര് വശത്തുള്ള കടവില് കൈകഴുകിയ ശേഷം തിരികെ വരുന്നതിനിടെ സജി ഒരു വെളുത്ത കാര് ചങ്ങനാശ്ശേരി ഭാഗത്ത് നിന്നും വരുന്നതായി കണ്ടു. എക്സെസ് ഓഫീസിന് സമീപം നിന്ന കാറില് നിന്നും മൂന്ന് പ്രാവശ്യം ഹോണടിക്കുന്ന ശബ്ദവും കേട്ടു. ഈ സമയം എക്സെസ് ഓഫീസിലെ ലൈറ്റുകള് അണഞ്ഞു.
സംഭവം കണ്ട സജി സമീപത്തേക്ക് ടോര്ച്ചടിച്ച് നോക്കി. തുടര്ന്നാണ് കാറില് നിന്നും സിവില് ഡ്രസ്സിലിറങ്ങിയ ഇന്സ്പെക്ടര് സജിയെ മര്ദ്ദിച്ചത്. പെട്ടെന്ന് ഓഫീസില് നിന്നും രണ്ട് ഉദ്യോഗസ്ഥരും സ്ഥലത്തെത്തിയിരുന്നു. മൂന്ന് പേരും ചേര്ന്ന് യുവാവ് മര്ദ്ദിച്ച ശേഷം വലിച്ചിഴച്ച് ഓഫീസിലെത്തിക്കുകയായിരുന്നു.
അടച്ചിട്ട മുറയില് വീണ്ടും മര്ദ്ദനം നടന്നതായാണ് പരാതിയില് പറയുന്നത്. ബഹളം കേട്ട് യുവാവിന്റെ അമ്മയും, സഹോദരിയും ഓഫീസിലെത്തിയെങ്കിലും അകത്തേക്ക് കടക്കാന് ഉദ്യോഗസ്ഥര് അനുവദിച്ചില്ല. പ്രായമായ മാതാവും, സഹോദരിയും ഉദ്യോഗസ്ഥര്ക്ക് മുന്നില് ഏറെ നേരം കരഞ്ഞ് അപേക്ഷിച്ചിട്ടും സജിയെ വിട്ടയയ്ക്കാന് തയ്യാറായില്ല. തുടര്ന്ന് രാത്രി 11 മണിയോടെ വെള്ള പേപ്പറില് ഒപ്പീടിച്ച ശേഷമാണ് യുവാവിനെ പുറത്തു വിട്ടത്.
ശരീരമാസകലം നീര്ക്കെട്ട് ബാധിച്ച യുവാവിനെ തുടര്ന്ന് ബന്ധുക്കളും, അയല്ക്കാരും ചേര്ന്ന് പുളിങ്കുന്ന് താലൂക്ക് ആസ്പത്രിയിലെത്തിക്കുകയായിരുന്നു. സംഭവത്തില് കേസ് പിന്വലിക്കാന് തങ്ങള്ക്ക് മേല് സമ്മര്ദ്ദമുള്ളതായി യുവാവിന്റെ സഹോദരങ്ങള് പറഞ്ഞു.
വിഷയത്തില് എക്സെസ് കമ്മീഷണര്ക്കും പരാതി നല്കിയിട്ടുണ്ട്. ആശുപത്രിയില് പ്രവേശിപ്പിച്ച സജിക്ക് മര്ദ്ദനമേറ്റത്തിന്റെ എല്ലാ ലക്ഷണങ്ങളുമുണ്ടെന്ന് പുളിങ്കുന്ന് താലൂക്ക് ആശുപത്രി സൂപ്രണ്ട് കെ. പ്രകാശന് പറഞ്ഞു. മുഖത്തിന്റെ ഇടത് ഭാഗത്തും, നെഞ്ചിനും ക്ഷതമേറ്റിട്ടുണ്ട്.
യുവാവിന് മൂന്ന് ദിവസം കൂടി ആശുപത്രിയില് ചികിത്സയില് കഴിയേണ്ടി വരുമെന്നും സൂപ്രണ്ട് പറഞ്ഞുഓഫീസ് പരിസരത്ത് സംശയാസ്പദമായ സാഹചര്യത്തില് കണ്ടയാളോട് കാര്യം തിരക്കുക മാത്രമാണ് ചെയ്തതെന്നാണ് എക്സെസ് ഇന്സ്പെക്ടര് പറയുന്നത്. യുവാവ് മദ്യപിച്ചിരുന്നതായി സംശയിക്കുന്നതായും ഓഫീസില് അതിക്രമിച്ച് കയറിയതിന് പരാതി നല്കിയിട്ടുണ്ടെന്നും അദ്ദേഹം പറഞ്ഞു.
