തലശ്ശേരി: കനത്ത മഴയില്‍ ജില്ലയില്‍ രണ്ടിടങ്ങളിലായി വീടുകള്‍ തകര്‍ന്ന് മൂന്നുപേര്‍ക്ക് പരിക്കേറ്റു. തലശ്ശേരി കോടിയേരി ഇരിങ്ങയില്‍ പീടികയിലും ചെറുപുഴ പെരിങ്ങോം പയ്യങ്കാനത്തുമാണ് വീടുകള്‍ തകര്‍ന്നത്.
കോടിയേരി ഇരിങ്ങയില്‍പീടികയിലെ കുനിയില്‍ പടിക്കല്‍ ശാന്തയുടെ വീട് ഇന്നലെ ഉച്ചയോടെയാണ് കനത്ത കാറ്റിലും മഴയിലും തകര്‍ന്നു വീണത്. അപകടത്തില്‍ ശാന്തക്കും അനുജത്തി സതിക്കും പരിക്കേറ്റു. ഇരുവരെയും തലശ്ശേരി ജനറല്‍ ആശുപത്രിയില്‍ പ്രവേശിപ്പിച്ചു.
ചെറുപുഴ പെരിങ്ങോം പയ്യങ്കാനത്ത് വീട് തകര്‍ന്ന് യുവതിക്ക് പരിക്കേറ്റു. പയ്യങ്കാനത്തെ തറമ്മല്‍ നബീസയുടെ ഓടിട്ട വീടിന്റെ മേല്‍ക്കൂരയാണ് ഇന്നലെ ഉച്ചക്ക് പന്ത്രണ്ടോടെ തകര്‍ന്നുവീണത്. വീട്ടിലുണ്ടായിരുന്ന നബീസയുടെ ബന്ധു ജസീന(26)ക്കാണ് പരിക്കേറ്റത്. ഇവരെ പയ്യന്നൂരില സ്വകാര്യാശുപത്രിയില്‍ പ്രവേശിപ്പിച്ചു.
കാലവര്‍ഷാരംഭത്തോടെ കനത്ത കാറ്റിലും മഴയിലും വ്യാപകമായ നാശനഷ്ടങ്ങളുണ്ടായിട്ടുണ്ട്. നിരവധി റോഡുകളും കനത്ത മഴയില്‍ തകര്‍ന്നു. കാര്‍ഷികവിളകള്‍ക്കും വ്യാപകമായ നാശമുണ്ടായിട്ടുണ്ട്. നിരവധി താഴ്ന്ന പ്രദേശങ്ങളില്‍ വെള്ളം കയറി.
