വാഷിങ്ടണ്: ഭാരത സമ്പദ്വ്യവസ്ഥ ലോകത്തിനു സമ്മാനിക്കുന്നത് ഒട്ടേറെ നേട്ടങ്ങളെന്ന് പ്രധാനമന്ത്രി നരേന്ദ്ര മോദി. വികസനത്തിന് പുതിയ എന്ജിനുകള് ആവശ്യമുണ്ട്. അത് ജനാധിപത്യ എന്ജിനുകളെങ്കില് ഏറെ നന്നായേനെയെന്നും മോദി പറഞ്ഞു. യുഎസില് ഭാരത-യുഎസ് ബിസിനസ് കൗണ്സിലിന്റെ വാര്ഷിക സമ്മേളനത്തില് സംസാരിക്കുകയായിരുന്നു മോദി.
ഭാരതത്തെ പരിവര്ത്തനം ചെയ്യുന്നതിനുള്ള യാത്രയിലാണ് ഞങ്ങള്. ഭാരത സമ്പദ് വ്യവസ്ഥ ഇന്ന് ലോകത്തിന്റെ വളര്ച്ചയ്ക്ക് ചാലകശക്തിയാകുന്നു. ഏറ്റവും വേഗതയില് വളരുന്ന സമ്പദ് വ്യവസ്ഥയാണ് ഭാരതത്തിന്റേത്. അമേരിക്കന് വ്യാവസായി സമൂഹം ഭാരതത്തില് നിക്ഷേപത്തിനു സജ്ജരാകണം. കേവലമൊരു വിപണിയല്ല ഭാരതം, വിശ്വസ്ത പങ്കാളിയാണ്. ലോക സമ്പദ്ഘടനയെ ഇനി നയിക്കുക ഭാരതമാകും- മോദി പറഞ്ഞു.
ഭാരതം വികസനത്തിന്റെ പാതയിലെന്നു വ്യക്തമാക്കിയ പ്രധാനമന്ത്രി യുഎസില്നിന്ന് ഒട്ടേറെ കാര്യങ്ങള് പഠിക്കാനുണ്ടെന്നും പറഞ്ഞു. യുഎസിലെ വ്യവസായ സംരംഭകത്വം, സാങ്കേതിക മുന്നേറ്റം തുടങ്ങിയവ ഭാരതത്തിനു മാതൃകയാക്കാം. അമേരിക്കയുടെ ഭൂതകാല പ്രൗഢിയിലല്ല, ആവേശകരമായ ഭാവിയിലാണ് എനിക്കു താത്പര്യം. ഭാരത-യുഎസ് സഹകരണം ഇരു രാജ്യങ്ങള്ക്കും നേട്ടമാകുമെന്നും മോദി ശുഭാപ്തി വിശ്വാസം പ്രകടിപ്പിച്ചു.
അഴിമതി തുടച്ചുനീക്കാന് കേന്ദ്ര സര്ക്കാര് നടപടികളെടുത്തുവെന്ന് മോദി പറഞ്ഞു. അച്ചടക്കവും വിവേകവുമുള്ള വിപുലമായ സാമ്പത്തിക നയങ്ങളാണ് സര്ക്കാര് ആവിഷ്കരിക്കുന്നത്. നിക്ഷേപാന്തരീക്ഷം മെച്ചപ്പെടുത്തുന്നതിനും വ്യവസായം തുടങ്ങുന്നതിനുമുള്ള നടപടികള് സ്വീകരിച്ചു. വ്യവസായം തുടങ്ങുന്നതിനുള്ള ലക്ഷ്യസ്ഥാനമെന്നതില്നിന്ന് വ്യവസായം എളുപ്പത്തില് ചെയ്യുന്നതിനുള്ള കേന്ദ്രമെന്ന നിലയിലേക്ക് ഭാരതത്തെ മാറ്റി.
നികുതി സമ്പ്രദായം സുതാര്യമാക്കാന് നടപടിയെടുക്കുമെന്നും മോദി ഉറപ്പു നല്കി. പ്രതിരോധ രംഗം തുറന്നുകൊടുക്കുന്നതു തുടരുമെന്നു വ്യക്തമാക്കിയ പ്രധാനമന്ത്രി, സ്വകാര്യ മേഖലയില്നിന്ന് ആറ് ആണവ റിയാക്റ്ററുകള് വാങ്ങുന്നത് ആണവോര്ജ്ജ മേഖലയിലെ പുതു യുഗത്തിനു തുടക്കമെന്നും പറഞ്ഞു.
ഗംഗാ ശുചീകരണ പദ്ധതിയെക്കുറിച്ചും മോദി സംസാരിച്ചു. പദ്ധതിയിലൂടെ ഗംഗയെ അതിന്റെ പ്രൗഢമായ പാരമ്പര്യത്തിലേക്ക് തിരികെയെത്തിക്കുമെന്നും പ്രധാനമന്ത്രി.
