വാഷിങ്ടണ്: ഗണപതിഭഗവാന്റെ വെങ്കല ശില്പം, ജെയിനരുടെ ബാഹുബലി തുടങ്ങി ഭാരതത്തില് നിന്ന് പലപ്പോഴായി മോഷ്ടിക്കപ്പെട്ട 660 കോടിയോളം രൂപ വിലമതിക്കുന്ന സാംസ്കാരിക, കരകൗശല ഉല്പന്നങ്ങള് അമേരിക്കന് അധികൃതര് ഭാരതത്തിന് തിരികെ നല്കി. യുഎസില് സന്ദര്ശനം നടത്തുന്ന പ്രധാനമന്ത്രി നരേന്ദ്ര മോദിക്ക് ബ്ലെയര്ഹൗസില് നടന്ന ചടങ്ങിലാണ് ഇവ തിരികെ നല്കിയത്. വിഗ്രഹങ്ങള് ഉള്പ്പടെ ഇരുനൂറോളം വിലപിടിപ്പുള്ള വസ്തുക്കളാണ് തിരികെ നല്കിയത്.
ഭാരതത്തിന്റെ സാംസ്കാരിക പൈതൃകത്തെ മാനിച്ച് ഇവ തിരികെ നല്കിയതില് യുഎസ് സര്ക്കാരിനും പ്രസിഡന്റ് ഒബാമയ്ക്കും മോദി നന്ദി പറഞ്ഞു. പണത്തിന്റെ മൂല്യത്തില് മാത്രമല്ല ഈ വസ്തുക്കള് ഞങ്ങള്ക്ക് അതിലും വലുതാണ്. ഇത് ഞങ്ങളുടെ സംസ്കാരത്തിന്റെയും പാരമ്പര്യത്തിന്റെയും ഭാഗമാണ്. ഈ വസ്തുക്കള് ഭാവിയില് തങ്ങള്ക്ക് പ്രചോദനമേകുമെന്നും അദ്ദേഹം പറഞ്ഞു.
പൈതൃക വസ്തുക്കള് തിരിച്ചുനല്കിയതിലൂടെ ഇരുരാജ്യങ്ങളും കൂടുതല് അടുത്തതായും അദ്ദേഹം പറഞ്ഞു. കഴിഞ്ഞ രണ്ടുവര്ഷത്തിനിടയില് നിരവധി രാജ്യങ്ങള് ഭാരതത്തില് നിന്നും മോഷ്ടിക്കപ്പെട്ട പൈതൃക വസ്തുക്കള് തിരികെ നല്കിയിരുന്നു. ഇക്കാര്യത്തില് അമേരിക്കയോടുള്ള മഹത്തായ സ്നേഹവും ആദരവും ഭാരത ജനത അറിയിക്കുന്നതായി വിദേശകാര്യ വക്താവ് വികാസ് സ്വരൂപ് ട്വീറ്റ് ചെയ്തു. തിരികെ ലഭിച്ച വസ്തുക്കളുടെ ചിത്രങ്ങളും വികാസ് സ്വരൂപ് ട്വിറ്ററില് പോസ്റ്റ് ചെയ്തു.
കൊളംബിയന് ബഹിരാകാശ വാഹനം തകര്ന്ന് മരിച്ച ഭാരത വംശജയായ അമേരിക്കന് ശാസ്ത്രജ്ഞ കല്പ്പന ചൗളക്കും മരിച്ച യുഎസ് സൈനികര്ക്കും മോദി ആദരാഞ്ജലി അര്പ്പിച്ചു. കല്പ്പന ചൗളയുടെ കുടുംബത്തെ സന്ദര്ശിച്ച മോദി അവരെ ഭാരതത്തിലേക്ക് ക്ഷണിച്ചു. നാസ ശാസ്ത്രജ്ഞ സുനിതാ വില്യംസുമായി ചര്ച്ച നടത്തിയ മോദി അവരെയും ഭാരതത്തിലേക്ക് ക്ഷണിച്ചു.
