ന്യൂദല്ഹി: യുപിയില് കാലാകാലങ്ങളായി എസ്പിയും ബിഎസ്പിയും ദളിതരുടെ പേരില് രാഷ്ട്രീയം കളിക്കുകയാണെന്ന് ബിജെപി ദേശീയ അധ്യക്ഷന് അമിത് ഷാ പറഞ്ഞു. ഉത്തര്പ്രദേശില് സമാജ്വാദി പാര്ട്ടി അധികാരത്തിലെത്തുമ്പോഴെല്ലാം ദളിത് ജനവിഭാഗത്തിനു നേരെയുള്ള അക്രമങ്ങള് വര്ദ്ധിക്കുകയാണ്. ദളിതരേപ്പറ്റി എസ്പി സര്ക്കാര് ഓര്ക്കാറേയില്ല. ബിഎസ്പിയുടെ ഭരണം സംസ്ഥാനത്ത് വരുമ്പോള് അവരുടെ ആവശ്യങ്ങള്ക്ക് ദളിതരെ ഉപയോഗിക്കുകയാണെന്നും അദ്ദേഹം പറഞ്ഞു. ഉത്തര്പ്രദേശിലെ കാസഗഞ്ചില് ബിജെപി ബൂത്ത്തല പ്രവര്ത്തകരുടെ യോഗത്തില് പ്രസംഗിക്കുകയായിരുന്നു അമിത് ഷാ.
ദളിതരും ദുര്ബലരും പീഡിതരും വഞ്ചിതരുമായ സമൂഹത്തിന്റെ ഉന്നമനത്തിനാണ് ബിജെപിയുടെ പ്രവര്ത്തനം. എല്ലാവര്ക്കുമൊപ്പം എല്ലാവരുടേയും വികസനം എന്നതാണ് ബിജെപിയുടെയും ബിജെപി സര്ക്കാരുകളുടേയും മുദ്രാവാക്യം.
അഖിലേഷ് യാദവ് സര്ക്കാരിന്റെ ഭരണം സംസ്ഥാനത്തെ ക്രമസമാധാന നില തകരാറിലാക്കിയിരിക്കുകയാണ്. സമാജ്വാദി സര്ക്കാരിന്റെ ഭരണം മൂുലം നരേന്ദ്രമോദി സര്ക്കാരിന്റെ ഭരണനേട്ടങ്ങള് യഥാസമയം യുപിയിലെ ജനങ്ങളിലേക്ക് എത്തുന്നില്ല. ജനങ്ങള്ക്ക് ക്ഷേമകരമായ പ്രവൃത്തികള് ചെയ്യണമെന്ന പ്രാഥമിക ബോധം പോലും അഖിലേഷ് സര്ക്കാരിന് നഷ്ടമായിരിക്കുകയാണ്. മാന്യതയുടെ രാഷ്ട്രീയം അല്്പ്പമെങ്കിലും അഖിലേഷ് യാദവില് ബാക്കിയുണ്ടെങ്കില് കേന്ദ്രവികസന പദ്ധതികള് സംസ്ഥാനത്ത് നടപ്പാക്കണം.
അഴിമതിയും ഗുണ്ടാഭരണവും നിറഞ്ഞ ഭരണമാണ് എസ്പി സര്ക്കാര് യുപിയില് നടപ്പാക്കുന്നത്.
പ്രധാനമന്ത്രി നരേന്ദ്രമോദിയുടെ ദേശ-വിദേശങ്ങളിലെ പ്രശസ്തിയാണ് പ്രതിപക്ഷ പാര്ട്ടികളുടെയെല്ലാം വിരോധത്തിന് കാരണം. അന്തരീക്ഷത്തിലും ആകാശത്തിലും ഭൂമിയിലും ജലത്തിലും പാതാളത്തിലും വരെ കോണ്ഗ്രസുകാര് അഴിമതി നടത്തി. എന്നാല് കഴിഞ്ഞ രണ്ടുവര്ഷം കേന്ദ്രഭരണത്തില് നിന്നും അഴിമതിയെ ഇല്ലാതാക്കാന് സാധിച്ചു. പ്രധാനമന്ത്രിയുടെ നേതൃത്വത്തില് മുഴുവന് രാഷ്ട്രവും വികസനപാതയില് മുന്നോട്ടു നീങ്ങുകയാണ്. വികസനത്തിന് വേണ്ടിയുള്ള ഈ യാത്രയില് യുപിയും ഉടന് ഭാഗഭാക്കാകുമെന്നും അമിത് ഷാ പറഞ്ഞു.
