രഞ്ജിത്ത് എബ്രാഹം തോമസ്
പെരിന്തല്മണ്ണ: അര്പ്പണമാണ് ഒരു കലാകാരനെ സൃഷ്ടിക്കുന്നതെങ്കില് അതിന് ഏറ്റവും വലിയ ഉദാഹരണമാണ് ജബ്ബാര് പെരിന്തല്മണ്ണ എന്ന യുവകലാകാരന്. വിസ്മൃതിയിലേക്ക് മറയുന്ന ഏകാംഗ നാടകം എന്ന കലയുമായില് വിസ്മയം സൃഷ്ടിക്കുകയാണ് ഈ മുപ്പത്താറുകാരന്.
2002 മുതല് നാടകവേദികളിലെ സ്ഥിരം സാന്നിധ്യമായിരുന്ന ജബ്ബാര് മൂന്നുവര്ഷം മുമ്പാണ് ഏകാംഗ നാടകത്തില് ശ്രദ്ധ കേന്ദ്രീകരിക്കുന്നത്. സ്വന്തമായി തിരക്കഥ എഴുതിയ ‘ഭ്രാന്ത്’ എന്ന ആവിഷ്കാരവുമായി ജബ്ബാര്വേദിയിലെത്തി. ചിരിപ്പിച്ചും കരയിച്ചും ആദ്യ വേദിയില് തന്നെ കാഴ്ചക്കാരെ കയ്യിലെടുത്ത ജബ്ബാറിന് പിന്നെ തിരിഞ്ഞു നോക്കേണ്ടി വന്നിട്ടില്ല. മൂന്ന് വര്ഷത്തിനുള്ളില് 50 വേദികള്. അമ്പതാമത് വേദിയായതാകട്ടേ, കേരള കലാമണ്ഡലവും. ഇതിനിടെ, വള്ളുവനാട് സാംസ്കാരിക വേദി, എരവിമംഗലം സാംസ്കാരിക വേദി, ശാന്തപുരം അല്ജാമിയ കോളേജ് തുടങ്ങി നിരവധി വേദികളില് ജബ്ബാറിന്റെ പ്രതിഭ മിന്നി മറഞ്ഞു. രണ്ട് വര്ഷം മുമ്പ് അന്താരാഷ്ട്ര നാടകോത്സവം കോഴിക്കോട് നടന്നപ്പോള്, അതിന്റെ പ്രചരണാര്ത്ഥം കോഴിക്കോട് നഗരത്തിന്റെ വിവിധ ഭാഗങ്ങളില് ജബ്ബാര് ‘ഭ്രാന്ത് ‘ അഭിനയിച്ചു കാണിച്ചു. ജബ്ബാറിന്റെ പ്രകടനം നേരില് കണ്ടിട്ടുള്ള ഏതൊരാളും ഈ കലാകാരന്റെ കഴിവിനെ വാനോളം പുകഴ്ത്തും. കാരണം, വര്ഷങ്ങളുടെ പരിശീലനം നേടിയ ഒരു പ്രതിഭയുടെ ചടുലതയോടെയാണ് ജബ്ബാര് വേദികളെ കയ്യിലെടുക്കുന്നത്. നിമിഷാര്ധങ്ങള്ക്കുള്ളില് നവരസങ്ങള് മിന്നിമറയുന്ന മുഖത്ത് വിടരുന്നത് ഈശ്വരന് കൈയ്യൊപ്പ് ചാര്ത്തിയ വരപ്രസാദം തന്നെയാണെന്നാണ് സുഹൃത്തുക്കള് പറയുന്നു. ഈ തിരക്കുകള്ക്കിടയിലും ഏഴോളം നാടകങ്ങള് തിരക്കഥയെഴുതി സംവിധാനം ചെയ്ത് വേദികളിലെത്തിച്ചു. കൂടാതെ , യുവജനോത്സവവേദികളില് ആവശ്യമായ പരിശീലനം നല്കി വിദ്യാര്ത്ഥികളെ അരങ്ങിലെത്തിക്കാനും ജബ്ബാറിന്റെ സഹായം തേടി അദ്ധ്യാപകരെത്തി. കഴിഞ്ഞ വര്ഷം ‘ഹെഡ്ലൈന്സ് ‘ എന്ന പേരില് ഒരു ഹൃസ്വ ചിത്രവും ജബ്ബാറിന്റേതായി പുറത്തു വന്നു. ഇത് സോഷ്യല് മീഡിയയില് നിരവധിയാളുകളാണ് ഷെയര് ചെയ്തത്. സിനിമയോട് വല്ലാത്ത അഭിനിവേശം ഉണ്ടെങ്കിലും അത് നാടകത്തോളം വരില്ലെന്നാണ് ജബ്ബാര് പറയുന്നത്. എന്നിരുന്നാലും അവസരം കിട്ടിയാല് ഇരുകൈയ്യും നീട്ടി സിനിമയെ സ്വീകരിക്കും. ജ്യേഷ്ഠ സഹോദരനൊപ്പം പെരിന്തല്മണ്ണയില് സ്വര്ണ്ണാഭരണ നിര്മ്മാണശാല നടത്തുകയാണ് ജബ്ബാര്. ആഭരണങ്ങള് നിര്മ്മിക്കുന്നതും രൂപഭംഗി വരുത്തുന്നതും ഇരുവരും ചേര്ന്നാണ്. പാതിവഴിയില് പ്രീഡിഗ്രി പഠനം മുടങ്ങിയെങ്കിലും ഓപ്പണ് സ്കൂള് വഴി പ്ലസ്ടു എഴുതിയെടുത്ത ജബ്ബാര് ഇപ്പോള് കാലിക്കറ്റ് യൂണിവേഴ്സിറ്റിയില് വിദൂര വിദ്യാഭ്യാസം വഴി മലയാളത്തില് ബിരുദം നേടാനുള്ള ഒരുക്കത്തിലാണ്. ഷാഹിനയാണ് ഭാര്യ. മെഹ്ജബിന്, ബിന്യാമിന്, ഇഷാ റിഹാം എന്നിവര് മക്കളും. പെരിന്തല്മണ്ണ കീഴാറ്റൂരാണ് താമസം.
