കണ്ണൂര്: പൊതുമരാമത്ത് വകുപ്പിലുള്ള രണ്ടായിരം കോടി രൂപയുടെ സര്ക്കാര് കുടിശ്ശിക സംസ്ഥാനത്തെ നിര്മാണപ്രവൃത്തികളെ സാരമായി ബാധിക്കുന്നു. ഇറിഗേഷന്, റോഡ്സ്, ബില്ഡിങ് വിഭാഗങ്ങളിലായാണ് ഇത്രയും കുടിശ്ശികയുള്ളത്. ഭീമമായ സാമ്പത്തിക ബാധ്യതകാരണം കരാറുകാര്ക്ക് ഏറ്റെടുത്ത നിര്മ്മാണ പ്രവൃത്തികള് സമയബന്ധിതമായി പൂര്ത്തിയാക്കാനാകാത്ത സാഹചര്യമാണ് നിലവിലുള്ളത്. ബില് ഡിസ്കൗണ്ട് പ്രകാരം 2015 ഒക്ടോബര് വരെയുള്ള കുടിശ്ശികയാണ് കരാറുകാര്ക്ക് ഇതുവരെ നല്കിയിട്ടുള്ളത്. കരാറുകാര്ക്ക് നല്കാനുള്ള കുടിശ്ശിക സര്ക്കാര് ജാമ്യത്തില് ബാങ്കുകള് വായ്പയായി നല്കുന്നതാണ് ബില് ഡിസ്കൗണ്ട് സംവിധാനം. പത്ത് ശതമാനം പലിശയാണ് ബില് ഡിസ്കൗണ്ട് പ്രകാരം നല്കുന്ന തുകക്ക് ബാങ്കുകള് ഈടാക്കുന്നത്. ഇതില് അഞ്ച് ശതമാനം കരാറുകാരും അഞ്ച് ശമാനം സര്ക്കാരുമാണ് നല്കുന്നത്. അഞ്ച് ശതമാനം പലിശ കരാറുകാരില് നിന്ന് ഈടാക്കുന്നത് ഭീമമായ സാമ്പത്തിക ബാധ്യത വരുത്തുമെന്നതിനാല് പലിശയിനത്തില് നല്കുന്ന മുഴുവന് തുകയും സര്ക്കാര് തന്നെ വഹിക്കണമെന്നതാണ് കരാറുകാരുടെ ദീര്ഘകാലമായ ആവശ്യം. ഭീമമായ കുടിശ്ശിക ഏറെ ദോഷകരമായി ബാധിക്കുന്നത് ചെറുകിട കരാറുകാരെയാണ്. സ്വകാര്യ പണമിടപാടുകരില് നിന്നുള്പ്പടെ പണം സ്വരൂപിച്ചാണ് ഇവര് പൊതുമരാമത്ത് പ്രവൃത്തികള് പൂര്ത്തിയാക്കുന്നത്. സമയബന്ധിതമായി പണം ലഭിക്കാത്തതിനാല് ചെറുകിട കരാറുകാര് ഈ മേഖലയില് നിന്ന് അപ്രത്യക്ഷമാവുകയും വന്കിടക്കാര് കയ്യടക്കുകയും ചെയ്യും.
നിലവിലുള്ള ഭീമമായ കുടിശ്ശിക പുതിയ സര്ക്കാര് അനുഭാവപൂര്വ്വം പരിഗണക്കുമെന്നാണ് കരാറുകാരുടെ പ്രതീക്ഷ. പൊതുമരാമത്ത് വിഭാഗത്തിലെ ബില്തുക സമയബന്ധിമായി കുടിശ്ശികയില്ലാതെ നല്കണമെന്നാവശ്യപ്പെട്ട് യുഡിഎഫ് സര്ക്കാരിനെതിരെ നടത്തിയ സമരങ്ങള്ക്ക് ശക്തമായ പിന്തുണയുമായി രംഗത്തുണ്ടായിരുന്ന തോമസ് ഐസക്ക് ധനകാര്യ മന്ത്രിയായത് കരാറുകാര്ക്ക് പ്രതീക്ഷ നല്കുന്നുതാണെങ്കിലും കടുത്ത സാമ്പത്തിക പ്രതിസന്ധിയുണ്ടെന്ന ഇടതു സര്ക്കാരിന്റെ മുന്കൂര് ജാമ്യം നിരാശയുണ്ടാക്കുന്നതാണെന്നാണ് കരാറുകാര് പറയന്നത്. സിപിഎം നേതൃത്വത്തില് അധികാരത്തിലെത്തിയ പുതിയ സര്ക്കാരും കരാറുകാരുടെ കാര്യത്തില് മുന് സര്ക്കാര് സ്വീകരിച്ച നിലപാട് തന്നെയായിരിക്കും സ്വീകരിക്കുക എന്നതാണ് ഇപ്പോള് ലഭിക്കുന്ന സൂചന. സാമ്പത്തിക പ്രതിസന്ധി ചൂണ്ടിക്കാട്ടിയാണ് യുഡിഎഫ് സര്ക്കാര് കരാറുകാര്ക്ക് കോടികളുടെ കുടിശ്ശിക വരുത്തിയത്. പുതിയ സര്ക്കാരും തുടക്കത്തില്ത്തന്നെ ഇതേ നിലപാടാണ് സ്വീകരിക്കുന്നത്.
