ലഖ്നൗ: ദളിത്-ബ്രാഹ്മണ പിന്തുണ ഒരേ സമയം നേടി ഒരിക്കല് തെരഞ്ഞെടുപ്പു വിജയം കണ്ട ബിഎസ്പി നേതാവ് മായാവതി ഉത്തര്പ്രദേശില് മുസ്ലിം-ദളിത് ഐക്യം പറഞ്ഞ് വോട്ടു നേടാന് ലക്ഷ്യമിട്ട് പുതിയ നീക്കം നടത്തുന്നു. ഇതിന്റെ ഭാഗമായി മായാവതി ചില ചുവടുവെയ്പ്പുകള് നടത്തുകയും ചെയ്തു.
ബുദ്ധപൂര്ണിമ ദിനത്തില് ലഖ്നൗവിലെ ബുദ്ധവിഹാരത്തില് പ്രാര്ത്ഥന നടത്താന് ബുദ്ധമതത്തില് ചേര്ന്ന ദളിതുകളെ അനുഗമിക്കാന് പാര്ട്ടിയിലെ പ്രധാന മുസ്ലിം നേതാവായ നസീമുദ്ദീന് സിദ്ദിഖിയെ നിയോഗിച്ചു. മായാവതിയെ കാണാനായി ചില ബിഎസ്പി നിയമസഭാ അംഗങ്ങള്ക്കൊപ്പം ദല്ഹിയിലുണ്ടായിരുന്ന സിദ്ദിഖി മായാവതിയുടെ നിര്ദ്ദേശം ലഭിച്ച ഉടന് തന്നെ ലഖ്നൗവില് എത്തി. ശനിയാഴ്ച രാവിലെതന്നെ ലഖ്നൗവിലെ ബുദ്ധവിഹാരത്തിലെത്തി സിദ്ധിഖിയും പ്രാര്ത്ഥനകളില് പങ്കുചേര്ന്നു. ബുദ്ധന് പുഷ്പാര്ച്ചന നടത്തുകയും ചെയ്തു. അവിടെ നിന്ന് തൈര് പ്രസാദവും സ്വീകരിച്ചു.
സിദ്ദിഖി ക്ഷേത്രത്തിലെത്തിയെന്നും ആഘോഷാനുഷ്ഠാനങ്ങളില് പങ്കെടുക്കുകയും ചെയ്തതായി ബിഎസ്പി ലഖ്നൗ ജില്ലാ കോര്ഡിനേറ്റര് ഹരികൃഷ്ണ ഗൗതം സമ്മതിച്ചു. എന്നാല്, ഇതൊരു പാര്ട്ടി പരിപാടി ആയിരുന്നില്ലെന്നും അദ്ദേഹം വിശദീകരിച്ചു. ബുദ്ധമതത്തിലേക്ക് മാറിയവര് വര്ഷങ്ങളായി ഇവിടെ പ്രാര്ത്ഥനകള് നടത്താറുണ്ട്. ഇത്തവണ അവരുടെ പരിപാടിയില് പങ്കെടുക്കാന് സിദ്ധിഖികൂടി എത്തിയെന്നേ ഉളളൂവെന്നും മറ്റൊരു പാര്ട്ടി നേതാവ് പറഞ്ഞു.
പക്ഷേ, മുസ്ലിങ്ങളും ദളിതരും തനിക്ക് പിന്നില് ഉറച്ച് നില്ക്കുന്നുവെന്ന സന്ദേശം ജനങ്ങളിലെത്തിക്കാനുളള മായാവതിയുടെ ബോധപൂര്വ്വമായ ശ്രമമാണിതെന്നാണ് രാഷ്ട്രീയ കേന്ദ്രങ്ങള് വിലയിരുത്തുന്നത്. അടുത്ത നിയമസഭാ തെരഞ്ഞെടുപ്പ് ലക്ഷ്യമിട്ടാണിതെന്നും വിലയിരുത്തുന്നു. ബുദ്ധന് വേണ്ടി പല സ്മാരകങ്ങളും തന്റെ ഭരണകാലത്ത് നിര്മിച്ചതായി അവര് അവകാശപ്പെടുന്നു. ഒരു സര്വകലാശാലയ്ക്കും ജില്ലയ്ക്കും പോലും അദ്ദേഹത്തിന്റെ പേര് നല്കി.
ജാതിയുടെ പേരിലുളള വിവേചനത്തെ ശക്തമായി എതിര്ക്കുന്ന വിശ്വാസമാണ് ബുദ്ധമതമെന്നും മായാവതി അഭിപ്രായപ്പെടുന്നു. വെറുപ്പും വര്ഗീയതയും വളര്ന്ന് വരുന്ന ഈ കാലത്ത് ബുദ്ധമതത്തിന്റെ പ്രാധാന്യം വര്ദ്ധിച്ചിരിക്കുന്നുവെന്നും മായാവതി ചൂണ്ടിക്കാട്ടുന്നു.
