ബെംഗളൂരു: ഐപിഎല് വിരാട് കോഹ്ലിയുടെ അവിസ്മരണീയ പ്രകടനം തുടരുന്നു. സീസണിലെ നാലാം സെഞ്ചുറി നേടിയ കോഹ്ലി റണ് വേട്ടയില് സുരേഷ് റെയ്നയെ മറികടക്കുകയും ചെയ്തു. 136 മത്സരങ്ങളിലെ 128 ഇന്നിങ്സുകളില് നിന്നായി 4002 റണ്സാണ് കോഹ്ലിയുടെ സമ്പാദ്യം. 139 ഇന്നിങ്സുകളില് നിന്ന് 3985 റണ്സാണ് റെയ്ന നേടിയിട്ടുള്ളത്. ബുധനാഴ്ച രാത്രി കിങ്സ് ഇലവന് പഞ്ചാബിനെതിരെയായിരുന്നു കോഹ്ലി നേട്ടം കൈവരിച്ചത്. ഐപിഎല്ലില് 4000 റണ്സ് പിന്നിടുന്ന ആദ്യ താരമെന്ന ബഹുമതിയും ഇനി കോഹ്ലിക്ക് സ്വന്തം.
ഈ സീസണ് തുടങ്ങുന്നതിന് മുമ്പ് ഒരു ടി20 സെഞ്ചുറി പോലും കോഹ്ലിയുടെ പേരിലുണ്ടായിരുന്നില്ല. സീസണിലെ 13-ാം മത്സരം കഴിഞ്ഞപ്പോള് നാല് സെഞ്ചുറികളും സീസണില് ഇതുവരെ 865 റണ്സുമാണ് കോഹ്ലി സ്വന്തമാക്കിയത്. കോഹ്ലിയുടെ കരുത്തില് കിങ്സ് ഇലവനെ പരാജയപ്പെടുത്തി കോഹ്ലിയുടെ റോയല് ചലഞ്ചേഴ്സ് പ്ലേ ഓഫ് സാധ്യത സജീവമാക്കുകയും ചെയ്തു. വിജയതോതടെ 14 പോയിന്റുമായി രണ്ടാം സ്ഥാനത്ത് ഉയരുകയും ചെയ്തു. മഴ തടസ്സപ്പെടുത്തിയ കളിയില് ഡക്ക്വര്ത്ത് ലൂയിസ് നിയമപ്രകാരം 82 റണ്സിനാണ് റോയല് ചലഞ്ചേഴ്സ് വിജയിച്ചത്.
മഴ മൂലം 15 ഓവറാക്കി ചുരുക്കിയ മത്സരത്തില് ടോസ് നഷ്ടപ്പെട്ട് ബാറ്റിങ്ങിനിറങ്ങിയ ബാംഗ്ലൂരിന് അതിഗംഭീരമായ തുടക്കമാണ് ഓപ്പണര്മാരായ ഗെയ്ലും കോഹ്ലിയും ചേര്ന്ന് നല്കിയത്. 11 ഓവറില് ഇരുവരും ചേര്ന്ന് 147 റണ്സാണ് അടിച്ചുകൂട്ടിയത്. 32 പന്തില് നിന്ന് എട്ട് സിക്സും നാല് ഫോറുമടക്കം ഗെയ്ല് അടിച്ചുകൂട്ടിയത് 73 റണ്സ്. 50 പന്തുകളില് നിന്ന് 12 ഫോറുകളും എട്ട് സിക്സറുകളും അകമ്പടി സേവിച്ചാണ് കോഹ്ലി 113 റണ്സെടുത്തത്. ഇന്നിങ്സ് അവസാനിക്കുമ്പോള് 15 ഓവറില് മൂന്ന് വിക്കറ്റിന് 211 റണ്സാണ് കോഹ്ലിയും കൂട്ടരും ചേര്ന്ന് അടിച്ചുകൂട്ടിയത്.
മറുപടി ബാറ്റിങ്ങില് കൂറ്റന് വിജയലക്ഷ്യത്തെ പിന്തുടര്ന്ന കിങ്സ് ഇലവന് ഒരിക്കലും റോയല് ചലഞ്ചേഴ്സിനെ വെല്ലുവിളിക്കാന് കഴിഞ്ഞില്ല. 24 റണ്സ് നേടിയ സാഹയാണ് പഞ്ചാബ് നിരയിലെ ടോപ് സ്കോറര്. കൃത്യമായ ഇടവേളകളില് വിക്കറ്റ് നഷ്ടമായ പഞ്ചാബ് 14 ഓവറില് ഒന്പത് വിക്കറ്റ് നഷ്ടത്തില് 120 റണ്സ് എടുത്ത് നില്ക്കെ വീണ്ടും മഴയെത്തി. അതോടെ ഡെക്വര്ത്ത് ലൂയിസ് നിയമപ്രകാരം 82 റണ്സിന് ബാംഗ്ലൂര് മത്സരം ജയിച്ചു. ബെംഗളൂരുവിന് വേണ്ടി ചാഹല് നാലും ക്രിസ് ജോര്ദാന്, ഷെയ്ന് വാട്സണ് എന്നിവര് രണ്ട് വിക്കറ്റ് വീതം നേടി.
