ബാസല്: യൂറോപ്പി ലീഗ് കിരീടം സ്പാനിഷ് ക്ലബ് സെവിയക്ക്. ബാസലിലെ സെന്റ് ജേക്കബ് പാര്ക്കില് നടന്ന വാശിയേറിയ ഫൈനലില് പ്രീമിയര് ലീഗ് ടീം ലിവര്പൂളിനെ ഒന്നിനെതിരെ മൂന്ന് ഗോളുകള്ക്ക് തകര്ത്താണ് സെവിയ യൂറോപ്പിലെ ക്ലബുകളിലെ രാജാക്കന്മാരായത്. കോകെയുടെ ഇരട്ട ഗോളാണ് സെവിയക്ക് കിരീടം സമ്മാനിച്ചത്. ലിവര്പൂളിനായി ഡാനിയേല് സ്റ്ററിഡ്ജ് ലക്ഷ്യം കണ്ടപ്പോള് സെവിയയുടെ ആദ്യഗോള് കെവിന് ഗമെയ്റോയും നേടി.
തുടര്ച്ചയായ മൂന്നാം തവണയാണ് സെവിയ യൂറോപ്പ ലീഗ് കിരീടത്തില് മുത്തമിടുന്നത്. ഒരു ഗോളിന് പിന്നിട്ടുനിന്നശേഷമായിരുന്നു സ്പാനിഷ് ക്ലബിന്റെ കിരീടത്തിലേക്കുള്ള അസാമാന്യ കുതിപ്പ്. ടൂര്ണമെന്റിന്റെ ചരിത്രത്തിലെ അഞ്ചാം കിരീടമാണ് സെവിയ നേടിയത്. കിരീടനേട്ടത്തോടെ അടുത്തവര്ഷത്തെ ചാമ്പ്യന്സ് ലീഗിന് യോഗ്യത നേടാനും സെവിയ്യയ്ക്കായി. സ്പാനിഷ് ലാലിഗയില് ഏഴാംസ്ഥാനക്കാരായാണ് സെവിയ സീസണ് അവസാനിപ്പിച്ചിരുന്നത്. യൂറോപ്പിലെ പ്രധാന ചാമ്പ്യന്ഷിപ്പില് തുടര്ച്ചയായി മൂന്ന് കിരീടം നേടുന്ന രണ്ടാമത്തെ ടീമെന്ന ബഹുമതിയും സെവിയ സ്വന്തമാക്കി. 1974-76 കാലഘട്ടത്തില് ബയേണ് മ്യൂണിച്ച് യൂറോപ്യന് കപ്പ് തുടര്ച്ചയായി മൂന്ന് തവണ നേടിയിരുന്നു. യൂറോപ്യന് ക്ലബുകളിലെ ചക്രവര്ത്തിമാരെ നിശ്ചയിക്കുന്ന ചാമ്പ്യന്സ് ലീഗ് കിരീടവും ഇത്തവണ സ്പെയിനിലേക്കാണ്. സ്പാനിഷ് ക്ലബുകളായ അത്ലറ്റികോ മാഡ്രിഡും റയല് മാഡ്രിഡും തമ്മില് 28ന് ചാമ്പ്യന്സ് ലീഗിന്റെ ഫൈനലില് ഏറ്റുമുട്ടും.
ബാസലിലെ നിറഞ്ഞുകവിഞ്ഞ സ്റ്റേഡിയത്തില് നടന്ന പന്തടക്കത്തിലും ഷോട്ടുകള് ഉതിര്ക്കുന്നതിലും ലിവര്പൂളായിരുന്നു മുന്നില്. മികച്ച മുന്നേറ്റങ്ങളിലൂടെ തുടക്കത്തില് തന്നെ എതിരാളികളെ ഭയപ്പെടുത്താന് യുര്ഗാന് ക്ലോപ്പിന്റെ പിള്ളേര്ക്കായി. കളിയുടെ ഒഴുക്കിനൊത്തപോലെ 35ാം മിനിറ്റില് സ്റ്ററിഡ്ജ് ആദ്യം വലകുലുക്കുകയും ചെയ്തു. ഫിലിപ്പോ കുട്ടീഞ്ഞോയുടെ പാസില്നിന്നായിരുന്നു ഗോള്. ഒരു ഗോളിന് മുന്നിലെത്തിയതോടെ ലിവര്പൂള് താരങ്ങള് കൂടുതല് ആവേശത്തിലായി. ആദം ലല്ലാനയും ലോവറുമെല്ലാം ഗോളിയെ നിരന്തരം പരീക്ഷിച്ചെങ്കിലും ഗോള് വഴങ്ങാതെ ആദ്യ പകുതി പൂര്ത്തിയാക്കാന് സ്പാനിഷ് നിരയ്ക്കായി.
രണ്ടാംപകുതിയില് രണ്ടുംകല്പിച്ചിറങ്ങിയ സെവിയ്യയെയാണ് കണ്ടത്. കളി തുടങ്ങി വെറും ആദ്യമിനിറ്റില് തന്നെ അവര് സമനില പിടിക്കുകയും ചെയ്തു. മരിയാനോ രണ്ടു പ്രതിരോധക്കാരെ വെട്ടിച്ചു നല്കിയ പാസ് സ്വീകരിച്ച് ഗമെയ്റോ ക്ലോസ് റേഞ്ചില് നിന്ന് പായിച്ച ഷോട്ട് വലയില് കയറി. ഇതോടെ കളി ലിവര്പൂളിന്റെ കയ്യില് നിന്നും സെവിയയുടെ കൈകളിലെത്തി. തുടര്ന്ന് സെവിയ ആക്രമണം കടുപ്പിക്കുകയും ചെയ്തു.
നിരന്തര ആക്രമണങ്ങള്ക്കൊടുവില് 64-ാം മിനിറ്റില് അവര് ലീഡ് നേടുകയും ചെയ്തു. വിറ്റോലൊയുടെ പാസ് സ്വീകരിച്ച് ബോക്സിന് പുറത്തുനിന്ന് കോകെ പറത്തിയ ബുള്ളറ്റ് ഷോട്ടാണ് ലിവര്പൂള് വലയില് തറച്ചുകയറിയത്. ആറ് മിനിറ്റിനുശേഷം ലിവര്പൂളിന്റെ വിധി നിര്ണ്ണയിപ്പെട്ട ഗോളും പിറന്നു. കോകെയാണ് ഈ ഗോളും നേടിയത്. ഇതോടെ 2000-01 സീസണിനുശേഷം യൂറോപ്പ ലീഗ് കിരീടം നേടാമെന്ന ലിവര്പൂളിന്റെ കിരീടം നേടാമെന്ന പ്രതീക്ഷയും തകര്ന്നു.
