ആലപ്പുഴ: ജിഷ സംഭവത്തില് പ്രതിയെ കണ്ടെത്തി വധ ശിക്ഷ നടപ്പാക്കണമെന്നാവശ്യപ്പെഒറ്റയാള് സമരം. അരൂര് എരമല്ലൂര് കുന്നുതറനികര്ത്തില് കെ.കെ. അജയനാണ് ആലപ്പുഴ കളക്ട്രേറ്റിനു മുന്നില് വോട്ടു ബഹിഷ്കരിച്ച് ഇന്നലെ രാവിലെ ഏഴുമുതല് വൈകിട്ട് ആറുവരെ സമരം നടത്തിയത്.
സൗമ്യവധക്കേസിലെ പ്രതിയെ തൂക്കിലേറ്റുക, ജിഷയുടെ കൊലപാതകിയെ അറസ്റ്റുചെയ്ത് വധശിക്ഷ ഉറപ്പുവരുത്തുക, പീഡനക്കേസിലെ പ്രതികള്ക്ക് ജാമ്യം അനുവദിക്കരുത്, പീഡനക്കേസുകളില് ശിക്ഷിക്കപ്പെടുന്ന പ്രതികളുടെ പ്രായം പരിഗണിക്കരുത്, മാനഭംഗക്കേസുകള് 90 ദിവസത്തിനുള്ളില് വിചാരണ നടത്തി വധശിക്ഷ നടപ്പാക്കണം തുടങ്ങിയ ആവശ്യങ്ങള് ഉന്നയിച്ച് ബോര്ഡുകള് കഴുത്തില് തൂക്കിയാണ് സമരം നടത്തിയത്.
മാനഭംഗക്കേസുകളില് വധശിക്ഷ നടപ്പാക്കണമെന്നാവശ്യപ്പെട്ട് ബഹുജന പങ്കാളിത്തത്തോടെ രാഷ്ട്രപതിക്ക് ഭീമ ഹര്ജി നല്കുമെന്നും സെക്രട്ടറിയേറ്റിനു മുന്നില് സമരം സംഘടിപ്പിക്കുമെന്നും അജയന് പറഞ്ഞു.
