ബെയ്റൂട്ട്: സിറിയയിലെ 16 ജിഹാദികള് കൊല്ലപ്പെട്ടു. ഇഡ്ലിബ് പ്രവിശ്യയില് ഭീകരരുടെ നിയന്ത്രണത്തിലുള്ള അബുസുഹോര് വ്യോമത്താവളത്തിലുണ്ടായ വ്യോമാക്രമണത്തിലാണ് ജിഹാദികള് കൊല്ലപ്പെട്ടത്.
കൊല്ലപ്പെട്ടവരില് അല് ഖ്വയ്ദ ബന്ധമുള്ള അല്നസ്റ മുന്നണിയുടെ തലവനും ഉള്പ്പെട്ടതായി ബ്രിട്ടന് ആസ്ഥാനമായ സിറിയന് ഒബ്സര്വേറ്ററി അറിയിച്ചു.
വ്യോമത്താവളത്തില് അറുപതിലധികം വ്യോമാക്രമണങ്ങളാണ് സൈനികര് നടത്തിയത്. എന്നാല് ആക്രമണം നടത്തിയത് ഏതു സൈനികരാണെന്ന കാര്യത്തില് വ്യക്തതയില്ലെന്നും ഒബ്സര്വേറ്ററി അറിയിച്ചു. സിറിയന് സൈന്യത്തിനൊപ്പം റഷ്യയും യുഎസ് നേതൃത്വത്തിലുള്ള സഖ്യസേനയും സിറിയയില് ഭീകരര്ക്കെതിരെ പോരാട്ടത്തിലാണ്.
കഴിഞ്ഞവര്ഷം സെപ്റ്റംബറിലാണ് ഇഡ്ലിബ് പ്രവിശ്യയില് സൈന്യത്തിന്റെ അധീനതയിലുണ്ടായിരുന്ന ഏക വ്യോമത്താവളമായ അബുസുഹോര് ഭീകരര് പിടിച്ചെടുത്തത്. അല്നുസ്റാ ഫ്രണ്ട് ഉള്പ്പെടെയുള്ള ഭീകര സംഘടനകളാണ് ഇഡ്ലിബ് കീഴടക്കിയത്.
