പാലാ: കേരളത്തില്‍ എല്‍ഡിഎഫും യുഡിഎഫും ജാതി രാഷ്ട്രീയം കളിക്കുകയാണെന്നും സാമൂഹിക നീതിക്കായി നിലകൊള്ളുന്നത്് എന്‍ഡിഎ മാത്രമാണെന്നും ബിഡിജെഎസ് സംസ്ഥാന അദ്ധ്യക്ഷന്‍ തുഷാര്‍ വെള്ളാപ്പള്ളി. എല്ലാവര്‍ക്കും തുല്യനീതി എന്ന മുദ്രാവാക്യം പ്രകടനപത്രികയില്‍ പ്രഖ്യാപിച്ചിട്ടുള്ളത് എന്‍ഡിഎ മാത്രമാണെന്നും അദ്ദേഹം പറഞ്ഞു. പാലാ നിയോജകമണ്ഡലം എന്‍ഡിഎ സ്ഥാനാര്‍ത്ഥി എന്‍. ഹരിയുടെ തെരഞ്ഞെടുപ്പു പ്രചരണത്തിന്റെ ഭാഗമായി ഇന്നലെ പാലായില്‍ നടന്ന മഹാറാലിക്കുശേഷം മഹാസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
രണ്ടുമുന്നണിയും മാറിമാറി ഭരിച്ചിട്ട് കേരളത്തില്‍ എന്തു നേട്ടമാണുണ്ടായത് എന്നദ്ദേഹം ചോദിച്ചു . വിദ്യാസമ്പന്നരായ ചെറുപ്പക്കാര്‍ക്ക് തൊഴിലില്ല. കാര്‍ഷിക മേഖല തകര്‍ന്നടിഞ്ഞു. അരിയും പച്ചക്കറിയും ഉള്‍പ്പടെ ഭക്ഷ്യസാധനങ്ങള്‍ക്കായി അന്യസംസ്ഥാനങ്ങളെ ആശ്രയിക്കണം. വ്യവസായങ്ങള്‍ പൂട്ടി. സംസ്ഥാനത്തെ പ്രധാന പാതകള്‍ രാജഭരണകാലത്ത് നിര്‍മ്മിച്ചതു മാത്രമാണ്. സംസ്ഥാനത്തെ ഓരോ വ്യക്തിയുടേയും മേല്‍ ലക്ഷക്കണക്കിന് രൂപയുടെ കടബാദ്ധ്യതകള്‍ മാത്രമാണ് രണ്ടുമുന്നണികളും ഉണ്ടാക്കിയ നേട്ടമെന്നദ്ദേഹം പറഞ്ഞു. കേരളത്തില്‍ എല്ലായിടത്തും ശക്തമായ ത്രികോണമത്സരമാണ് നടക്കുന്നത്. ദേശീയ ജനാധിപത്യ സഖ്യം കേരളത്തില്‍ വിജയത്തിലേക്കെത്തുകയാണ്. അടുത്ത തെരഞ്ഞടുപ്പില്‍ ബംഗാളിന് തുല്യമായി കേരളത്തില്‍ അരിവാള്‍ കൈപ്പത്തി ചിഹ്നവുമായി രണ്ടു മുന്നണികളും എന്‍ഡിഎ. യ്‌ക്കെതിരെ മത്സരിക്കുന്ന കാഴ്ചയുണ്ടാവും. അസംഘടിത നിലപാടാണ് ഇടതു-വലതു മുന്നണികള്‍ സ്വീകരിക്കുന്നതെന്ന് തുഷാര്‍ വെള്ളാപ്പള്ളി പറഞ്ഞു. എന്‍ഡിഎ. ചെയര്‍മാന്‍ മോഹനന്‍ പനയ്‌ക്കല്‍ അദ്ധ്യക്ഷത വഹിച്ചു. റബ്ബര്‍ കര്‍ഷകരെ ദുരിതത്തിലാക്കിയത് യുപിഎ സര്‍ക്കാറിന്റെ ഇറക്കുമതി നയമാണെന്നും ഇതിന് മാറ്റമുണ്ടായത് നരേന്ദ്രമോദി സര്‍ക്കാര്‍ അധികാരത്തില്‍ വന്നതോടെയാണെന്നും കേരളാ കോണ്‍ഗ്രസ് ചെയര്‍മാന്‍ പി.സി.തോമസ് പറഞ്ഞു. സിപിഎം. ജനറല്‍ സെക്രട്ടറി സീതാറാം യെച്ചൂരിയും കോണ്‍ഗ്രസ് അദ്ധ്യക്ഷ സോണിയാ ഗാന്ധിയും കേരളത്തിലെ ജനങ്ങളെ കബളിപ്പിക്കുകയാണെന്ന് ബിഡിജെഎസ.് ജില്ലാ ഉപാദ്ധ്യക്ഷന്‍ അഡ്വ. കെ.എം. സന്തോഷ്‌കുമാര്‍ പറഞ്ഞു. മലയോര മേഖലകളിലെ വികസനം പ്രഖ്യാപനങ്ങളിലും കടലാസിലും മാത്രമാണെന്നും ടൂറിസം മേഖലയെ പ്രഖ്യാപിച്ച സ്ഥലങ്ങളില്‍ വികസനം എത്തിയിട്ടില്ലെന്നും സ്ഥാനാര്‍ത്ഥി എന്‍.ഹരി പറഞ്ഞു. ബിജെപി സംസ്ഥാന സമിതിയംഗങ്ങളായ അഡ്വ. എസ്.ജയസൂര്യന്‍, പ്രൊഫ. ബി.വിജയകുമാര്‍, ജില്ലാ ഉപാദ്ധ്യക്ഷന്മാരായ എന്‍.കെ.ശശികുമാര്‍, റ്റി.ആര്‍.നരേന്ദ്രന്‍, എന്‍ഡിഎ. നേതാക്കളായ അഡ്വ.ബിനു പുളിക്കക്കണ്ടം, ലാലിറ്റ് തകടിയേല്‍, അജി എരുമേലി, സുരേഷ്് ഇത്തിക്കുന്നേല്‍ എന്നിവര്‍ പ്രസംഗിച്ചു.
അനീഷ് പുല്ലുവേലില്‍ സ്വാഗതവും രണ്‍ജിത്ത്.ജി. കൃതജ്ഞതയും പറഞ്ഞു. സമ്മേളനത്തിന് മുന്നോടിയായി കൊട്ടാരമറ്റത്തുനിന്നും പാലാ നിയോജകമണ്ഡലം എന്‍ഡിഎ.യുടെ ആഭിമുഖ്യത്തില്‍ നടന്ന മഹാറാലിയില്‍ ആയിരങ്ങള്‍ പങ്കെടുത്തു.
