കോട്ടയം: വിശ്വകര്‍മ്മജരോടുള്ള എല്‍ഡിഎഫ്-യുഡിഎഫ് മുന്നണികളുടെ അവഗണനയില്‍ പ്രതിഷേധിച്ച് വിശ്വകര്‍മ്മ ക്ഷേമസമിതി എന്ഡിഎയ്ക്ക് പിന്തുണ നല്‍കുവാന്‍ തീരുമാനിച്ചു. വിശ്വകര്‍മ്മജര്‍ അഭിമുഖീകരിക്കുന്ന പ്രശ്‌നങ്ങള്‍ പഠിക്കുവാന്‍ ഉമ്മന്‍ചാണ്ടി സര്‍ക്കാര്‍ നിയോഗിച്ച ശങ്കരന്‍ കമ്മീഷന്റെ റിപ്പോര്‍ട്ട് നിയമസഭയില്‍ അവതരിപ്പിക്കാനുള്ള അവസരം പോലും നല്‍കാതെ സമുദായത്തെ അവഗണിക്കുകയായിരുന്നു. ബജറ്റില്‍ പ്രഖ്യാപിച്ച ക്ഷേമപെന്‍ഷന്‍ നാളിതുവരെ ഗുണകരമായ രീതിയില്‍ വിതരണം നടത്താത്തതിനെതിരെയും വിശ്വകര്‍മ്മജരായ പരമ്പരാഗത തൊഴിലാളികളുടെ തൊഴിലില്ലായ്‌മയും അന്യസംസ്ഥാന തൊഴിലാളികളുടെ കടന്നുകയറ്റവും അസംസ്‌കൃത വസ്തുക്കളുടെ ലഭ്യതക്കുറവും വിശ്വകര്‍മ്മജര്‍ക്ക് പ്രതിസന്ധി സൃഷ്ടിക്കുന്നു. ഈ പ്രശ്‌നങ്ങള്‍ക്ക് നേരെ പുറംതിരിഞ്ഞ് നില്‍ക്കുന്ന എല്‍ഡിഎഫ് യുഡിഎഫ് മുന്നണികളുടെ സാമുദായിക പ്രീണനത്തിനെതിരെ വിശ്വകര്‍മ്മ ക്ഷേമസമിതി പ്രതിഷേധിച്ചു. സ്ഥാനാര്‍ത്ഥി നിര്‍ണ്ണയത്തില്‍ ഇരുമുന്നണികളും വിശ്വകര്‍മ്മജരെ അവഗണിച്ചു. തുടര്‍ന്നാണ് എന്‍ഡിഎ സഖ്യത്തിന് പിന്തുണ നല്‍കാന്‍ തീരുമാനിച്ചത്. ഈ സന്ദേശം ജനമനസ്സുകളില്‍ എത്തിച്ചുകൊണ്ട് വിശ്വകര്‍മ്മ ക്ഷേമസമിതി 11ന് രാവിലെ 9ന് കോട്ടയം ഗാന്ധി സ്‌ക്വയറില്‍ നിന്ന് സന്ദേശ റാലി സംഘടിപ്പിക്കും. ബിജെപി ജില്ലാ ട്രഷറര്‍ കെ.ജി.കണ്ണന്‍ റാലി ഫഌഗ് ഓഫ് ചെയ്യും. പാമ്പാടി, പുളിക്കല്‍കവല, കങ്ങഴസ കറുകച്ചാല്‍, നെടുങ്കുന്നം, മണിമല, ചിറക്കടവ്, കൊടുങ്ങൂര്‍, പള്ളിക്കത്തോട്, പൊന്‍കുന്നം, കാഞ്ഞിരപ്പള്ളി, മുക്കാലി വഴി റാലി 7ന് മുണ്ടക്കയത്ത് സമാപിക്കും. സമാപനസമ്മേളനം ബിഡിജെഎസ് ജില്ലാ വൈസ് പ്രസിഡന്റ് കെ.എം.സന്തോഷ് കുമാര്‍ ഉദ്ഘാടനം ചെയ്യും. പത്രസമ്മേളനത്തില്‍ വിശ്വകര്‍മ്മ സമിതി നേതാക്കളായ കെ.വി.അഭിലാഷ്, കെ.വി. സോമനാചാരി, എന്‍.എം.രാജേന്ദ്രന്‍, വി.കെ.ശശിധരന്‍, രാജേഷ് ദാമോദരന്‍ എന്നിവര്‍ പങ്കെടുത്തു.
