ന്യൂദല്ഹി: വിദേശരാജ്യങ്ങളില് നിക്ഷേപമുള്ള ഭാരതീയരുടെ കൂടുതല് വിശദവിവരങ്ങള് പുറത്ത്. പ്രമുഖ ബോളിവുഡ് താരം അജയ് ദേവ്ഗണിന് വെര്ജിന് ഐലന്റില് നിക്ഷേപമുണ്ടെന്നാണ് വെളിപ്പെടുത്തല്. വിദേശത്ത് കള്ളപ്പണ നിക്ഷേപമുള്ളവരില് ഒരു മലയാളിയുടെ വിവരം കൂടി പുറത്തായിട്ടുണ്ട്. ആലപ്പുഴ സ്വദേശി പീടികപ്പറമ്പില് തോമസ് മാത്യുവാണിത്. കപ്പല് കമ്പനി ഉടമയാണ് തോമസ് മാത്യു.
2013ല് വെര്ജിന് ഐലന്റിലെ മെറില്ബോണ് എന്റര്ടെയ്ന്മെന്റ് ലിമിറ്റഡ് എന്ന കമ്പനി അജയ് ദേവ്ഗണ് വാങ്ങിയെന്നാണ് വിവരം. എന്നാല് അന്നത്തെ സര്ക്കാരിന്റെ അറിവോടെ, മുഴുവന് നടപടിക്രമങ്ങളും പൂര്ത്തിയാക്കിയാണ് കമ്പനി വാങ്ങിയതെന്നാണ് ദേവ്ഗണിന്റെ പ്രതികരണം.സയനിയെന്ന ആളില് നിന്നാണ് കമ്പനിയുടെ ഓഹരികള് വാങ്ങിയത്. ഹിന്ദി സിനിമകളുടെ പതിപ്പുകള് വാങ്ങി വിദേശരാജ്യങ്ങളില് വിതരണം ചെയ്യുന്ന കമ്പനിയാണ് ഇത്.
2013 ഒക്ടോബര് 31 മുതല് ദേവ്ഗണ് കമ്പനി ഡയറക്ടറാണ്. 2014 ഡിസംബര് പതിനഞ്ചിന് ദേവ്ഗണ് ഈ പദവി രാജിവച്ചു. പട്ടികയില് ആറാമത്തെ പേരാണ് ദേവ്ഗണിന്േറത്.കമ്പനിയുടെ ആയിരം ഓഹരികളാണ് ദേവ്ഗണിന് ഉണ്ടായിരുന്നത്. പട്ടികയില് സ്ഥാനം പിടിക്കുന്ന മൂന്നാമനാണ് ദേവ്ഗണ്. നേരത്തെ അമിതാഭ് ബച്ചന്, മരുമകളും പ്രമുഖ ബോളിവുഡ് താരവുമായ ഐശ്വര്യ റായ് എന്നിവരുടെ പേരുകള് പുറത്തുവന്നിരുന്നു.
അതിനിടെ 500 കോടി രൂപയുടെ കള്ളപ്പണം കണ്ടെത്തനായതായി പ്രത്യക്ഷ നികുതി ബോര്ഡ് അധികൃതര് പറഞ്ഞു. കണക്കില് പെടാത്ത പണമുള്ള 546 പേരെ കണ്ടെത്താനായതായും ബോര്ഡ് അധികൃതര് പറഞ്ഞു.
രാജ്യത്ത് വസിക്കുന്ന 434 പേര് അടക്കം കള്ളപ്പണമുള്ള 546 ഭാരതീയരെ കണ്ടെത്താനായതായി ബോര്ഡ് രാജ്യസഭാ അധികൃതരെ അറിയിച്ചിട്ടുണ്ട്. ഇവരില് മിക്കവര്ക്കും ബ്രിട്ടീഷ് വെര്ജിന് ദ്വീപിലാണ് നിക്ഷേപമുള്ളത്.
വിവേകാനന്ദ ഗദ്ദാം, വിജയ്മല്ല്യ, പ്രമുഖ വ്യവസായി രവികാന്ത് റൂയിയ, ചേതന് ബര്മന്, അഭയ് കുമാര് ഓസ്വാള് എന്നിവരടക്കം 612 പേര്ക്ക് വിദേശത്ത് നിക്ഷേപമുണ്ട്. 500 കോടിയുടെ കള്ളപ്പണം കണ്ടെത്താന് കഴിഞ്ഞിട്ടുണ്ട്. ഇതുമായി ബന്ധപ്പെട്ട് ഇതുവരെയായി 10 കേസുകള് എടുത്തിട്ടുണ്ട്. അന്വേഷണം തുടരുകയാണെന്നും രാജ്യസഭയിലെ ചോദ്യത്തിന് ഉത്തരമായി നല്കിയ രേഖയില് വ്യക്തമാക്കുന്നു.
