ബിജെപി സാന്നിധ്യമില്ലാത്ത കേരള നിയമസഭയാണ് ലക്ഷ്യമെന്നും പ്രധാനമന്ത്രിയും മറ്റു നേതാക്കളും കേരളത്തില്‍ വരുന്നത് കേരളം കലക്കാനാണെന്നുമുള്ള എ.കെ.ആന്റണിയുടെ പ്രസ്താവന കേരള മനസ്സിനെ ആഴത്തില്‍ മുറിവേല്‍പ്പിക്കുന്നതാണ്. കാശ്മീര്‍ വെള്ളപ്പൊക്ക ദുരന്ത സമയത്തും ചെന്നൈ വെള്ളപ്പൊക്കദുരന്ത സമയത്തും പുറ്റിങ്ങല്‍ വെടിക്കെട്ട് ദുരന്തത്തിലും നമ്മുടെ പ്രധാനമന്ത്രി ഓടിയെത്തുകയും ദുരിതാശ്വാസ പ്രവര്‍ത്തനങ്ങള്‍ക്ക് നേരിട്ട് നേതൃത്വം നല്‍കിയതും നാം കണ്ടതാണ്. ലോകവും ലോകനേതാക്കളും ആരാധിക്കുകയും ബഹുമാനിക്കുകയും ചെയ്യുന്ന ലോകനേതാവാണ് ഇന്ത്യന്‍ പ്രധാനമന്ത്രി നരേന്ദ്രമോദി. എ.കെ.ആന്റണി മന്ത്രിയായിരുന്നപ്പോള്‍ നമുക്കൊരു പ്രധാനമന്ത്രിയുണ്ടായിരുന്നുവല്ലോ. ഇന്ത്യയില്‍ തന്നെ ഭൂരിഭാഗം ജനങ്ങള്‍ക്കും അങ്ങിനെയൊരു പ്രധാനമന്ത്രിയെക്കുറിച്ച് അറിയാമായിരുന്നോ?. അന്ന് ലോകരാജ്യങ്ങള്‍ക്കിടയില്‍ ഇന്ത്യയുടെ അവസ്ഥ എന്തായിരുന്നു. നമ്മുടെ പ്രധാനമന്ത്രിയും കൂട്ടരും കേരളത്തിലേക്ക് തെരഞ്ഞെടുപ്പ് പ്രവര്‍ത്തനങ്ങള്‍ക്ക് വരേണ്ട എന്നാണോ ആന്റണിയുടെ പ്രസ്താവനയിലെ ധ്വനി. ഇനി അദ്ദേഹത്തിന്റെ മറ്റൊരു പ്രസ്താവന ബിജെപി സാന്നിധ്യമില്ലാത്ത കേരള നിയമസഭയാണ് വേണ്ടതെന്നാണ്. ഇത് ജനങ്ങളോടും ജനാധിപത്യത്തോടുമുള്ള വെല്ലുവിളിയാണ്. ബിജെപി അംഗങ്ങളും സി.കെ.ജാനുവിനെപ്പോലുള്ള ആദിവാസി നേതാവും നിയമസഭയിലെത്തിയാല്‍ പിന്നെ ഇടതും വലതും മുന്നണികളുടെ അഡ്ജസ്റ്റ്‌മെന്റ് രാഷ്‌ട്രീയം നടക്കില്ല. ദളിതരുടെയും ആദിവാസികളുടെയും പിന്നോക്കക്കാരുടെയും പാവപ്പെട്ട മുന്നോക്കക്കാരുടെയും ശബ്ദം നിയമസഭയില്‍ ഉയരുന്നത് നിങ്ങള്‍ ഇരുകൂട്ടര്‍ക്കും അലോസരമുണ്ടാക്കുമെന്നറിയാം. കോണ്‍ഗ്രസ്-ബിജെപി സഖ്യമെന്നും സിപിഎം-ബിജെപി സഖ്യമെന്നും പരസ്പരം പഴിചാരുന്ന ഏകമുദ്രാവാക്യമല്ലാതെ ജനങ്ങളുടെ മുന്നില്‍ വെക്കാന്‍ നിങ്ങള്‍ക്ക് വേറെന്താണുള്ളത്. നിങ്ങള്‍ ഗ്രൂപ്പിന്റെ പേരില്‍ ആളെ കൊല്ലുന്നു. ജീവിതം മുഴുവന്‍ ഒരു പാര്‍ട്ടിയില്‍ പ്രവര്‍ത്തിച്ച് ഒടുവില്‍ ഒരഭിപ്രായവ്യത്യാസം വന്നാല്‍ അയാളെ അനേകം വെട്ടുകളാല്‍ നിര്‍ദ്ദാക്ഷിണ്യം വധിക്കുന്നു. ഇങ്ങനെയുള്ള നിങ്ങളുടെ പാര്‍ട്ടികളില്‍ ആരാണ് പുതുതായി ചേരുക. ഒരുകാര്യം കൂടി അങ്ങ് ഓര്‍ക്കുക. താങ്കള്‍ മുഖ്യമന്ത്രിയായിരുന്ന കാലത്ത് മാറാട് മതതീവ്രവാദികള്‍ എട്ട് നിരപരാധികളായ ഹിന്ദുക്കളെ കൂട്ടക്കൊല ചെയ്തിട്ടും ആരുടെയെങ്കിലും ശരീരത്തില്‍ ശരീരത്തില്‍ ഒരു പോറലെങ്കിലും ഏല്‍പ്പിച്ചിരുന്നോ?. അതേ അവസരത്തില്‍ കൊല്ലപ്പെട്ടവര്‍ മറ്റേതെങ്കിലും പാര്‍ട്ടിക്കാരായിരുന്നുവെങ്കില്‍, മറ്റ് സമുദായക്കാരായിരുന്നുവെങ്കില്‍ കേരളത്തില്‍ സംഭവിക്കാമായിരുന്ന ഭയാനകമായ കലാപവും കൊലപാതകങ്ങളും താങ്കള്‍ക്ക് ഊഹിക്കാന്‍ കഴിയുമോ? ബഹുമാനപ്പെട്ട ആന്റണീ, ഇന്ന് രാജ്യത്താകമാനം കോണ്‍ഗ്രസ്സ്-കമ്മ്യൂണിസ്റ്റ് ഐക്യമുണ്ടെന്ന് ഇവിടത്തെ കൊച്ചുകുട്ടികള്‍ക്ക് പോലും അറിയാം. പിന്നെ നിങ്ങള്‍ എന്തിനുവേണ്ടിയാണ് വിഡ്ഡിവേഷം കെട്ടുന്നത്. ഓര്‍ക്കുക, മെയ് 16 ന് കേരളജനത നിങ്ങള്‍ക്കിതിന് വ്യക്തമായ മറുപടി തരും.
സുരേഷ് ബാബു, കണ്ണൂര്‍
