ബിജെപി പ്രകടനപത്രികയില് ഉള്പ്പെടുത്തേണ്ട വനിതാ വിഷയങ്ങള് അടങ്ങിയ റിപ്പോര്ട്ട് ഇതിനായി നിയോഗിക്കപ്പെട്ട സമിതിയംഗങ്ങളായ സിമി ജ്യോതീഷ്, അഞ്ചന സുരേഷ്, വി. സുധര്മ്മ, ഹേമലത ശിവകുമാര് എന്നിവര് ചേര്ന്ന് സംസ്ഥാന പ്രസിഡന്റ് കുമ്മനം രാജശേഖരന് കൈമാറുന്നു
പേരൂര്ക്കട: മുന്ഗാമി കെ.ജി. മാരാരുടെ സ്മരണയ്ക്കു മുമ്പില് പുഷ്പാര്ച്ചന നടത്തിയായിരുന്നു ബിജെപി അധ്യക്ഷന് കുമ്മനം രാജശേഖരന് ഇന്നലത്തെ പര്യടനത്തിന് തുടക്കം കുറിച്ചത്. ബിജെപി മുന് അദ്ധ്യക്ഷന് കെ.ജി. മാരാരുടെ ചരമദിനമായ ഇന്നലെ രാവിലെ 7.30ന് പേരൂര്ക്കടയിലെ തെരഞ്ഞെടുപ്പ് കമ്മിറ്റി ഓഫീസിലെത്തിയാണ് ചിത്രത്തിനു മുന്നില് പുഷ്പാര്ച്ചന നടത്തിയത്. തുടര്ന്ന് പര്യടന തിരക്കിലേക്ക്. വാഴോട്ടുകോണം വാര്ഡിലായിരുന്നു ഭവന സമ്പര്ക്കം. നിശ്ചയിച്ചതിലും അല്പം വൈകിയെത്തിയ തങ്ങളുടെ നേതാവിനെ വരവേല്ക്കാന് പ്രായവ്യത്യാസമില്ലാതെ നിരവധിപ്പേര്. കുമ്മനമെത്തിയതോടെ ആവേശം അലതല്ലി. പ്രവര്ത്തകര് ഷാള് അണിയിച്ചു സ്വീകരിച്ചു. റോഡിനിരുവശത്തുമുള്ള വീടുകളില് നിന്നും ആള്ക്കാര് കുമ്മനത്തിനെ കാണാനായി ഗേറ്റിനരികിലേക്ക് ഓടി വന്നു. എല്ലാവരോടും നേരിട്ട് വോട്ട് അഭ്യര്ത്ഥിച്ചാണ് കുമ്മനത്തിന്റെ യാത്ര.
സെല്ഫിയെടുക്കാന് വന്ന ന്യൂജെന് വോട്ടര്മാരോട് ചേര്ന്ന് സെല്ഫിയെടുക്കാനും കുമ്മനം അവസരം ഒരുക്കി. ഇതിനിടെ മുന് ജില്ലാ പ്രസിഡന്റ് ചന്ദ്രശേഖരന്നായര് രോഗാവസ്ഥയിലാണെന്ന് പ്രവര്ത്തകരില് ഒരാള് പറഞ്ഞു. ചേട്ടനെ കണ്ടതിനുശേഷം മാത്രം മതി ഇനി പ്രചാരണമെന്ന് കുമ്മനം. പ്രചാരണ പ്രവര്ത്തനങ്ങള് നിര്ത്തിവച്ച് നേരെ ചന്ദ്രശേഖരന്നായരുടെ വീട്ടിലേക്ക്. കുമ്മനത്തിനെ കണ്ട് ചന്ദ്രശേഖരന്നായര് അവശതകള്ക്കിടയിലും ആവേശഭരിതനായി. പഴയകാല പ്രവര്ത്തകരെക്കുറിച്ചും പ്രവര്ത്തനങ്ങളെക്കുറിച്ചും അന്നത്തെ കഷ്ടതകളെക്കുറിച്ചും വാതോരാതെ സംസാരിച്ചു. കുമ്മനത്തിന്റെ നേതൃത്വത്തെ അഭിനന്ദിക്കാനും മറന്നില്ല. എന്നാല് ഞാന് നില്ക്കുന്നത് നിങ്ങളുടെ തലമുറ തീര്ത്ത അടിസ്ഥാനത്തിന്റെ പുറത്താണ് എന്ന വിനയാന്വിതമായ മറുപടി.
പര്യടനത്തിനിടെ പ്രവര്ത്തകരുടെ വീട്ടില് നിന്നും മോരുവെള്ളം. ഇപ്പോള് വെള്ളം എത്രയും കുടിക്കുന്നത് നല്ലത്. മോരാകുമ്പോള് പ്രശ്നമില്ലെന്ന് കുമ്മനം പറഞ്ഞു. വീട്ടിലെ മുതിര്ന്ന അംഗത്തിന്റെ കാല്തൊട്ട് വന്ദിച്ചിട്ടാണ് അദ്ദേഹം പ്രചാരണം തുടര്ന്നത്. കുറച്ച് വീടുകള് സന്ദര്ശിച്ചതിന് ശേഷം പഞ്ചമി നഗറിലെ പഞ്ചമി ദേവീക്ഷേത്രത്തിലേക്ക് തിരിച്ചു. ക്ഷേത്രത്തിലെ പൊങ്കാല ചടങ്ങില് പങ്കെടുത്തു. ഭക്തരോട് കുശലം പറഞ്ഞ് ക്ഷേത്രദര്ശനവും നടത്തി വീണ്ടും വാഴോട്ടുകോണത്തേക്ക്. പ്രവര്ത്തകന്റെ വീട്ടില് ഉച്ചഭക്ഷണം. ഉച്ചഭക്ഷണത്തിന് ശേഷമുള്ള വിശ്രമത്തിനിടയ്ക്ക് കറന്റ് പോയി. തുടരെത്തുടരെയുണ്ടാകുന്ന കറന്റ് കട്ടിനെക്കുറിച്ചുള്ള പരാതി നാട്ടുകാര് അപ്പോള് തന്നെ സ്ഥാനാര്ത്ഥിയെ അറിയിച്ചു. വാര്ഡിന്റെ അസൗകര്യങ്ങളെ കുറിച്ചായിരുന്നു പിന്നീടുള്ള പരാതി. ഈ പരാതികള് കേട്ട് കൊണ്ടിരുന്നപ്പോള് തന്നെ വാര്ഡിലെ സ്കൂള്കുട്ടികളും പരാതിക്കെട്ടുമായി കുമ്മനത്തിനടത്ത് എത്തി. ഇവിടുന്ന് സ്കൂള് സമയത്ത് ബസ് സര്വ്വീസില്ലെന്നും അതിനാല് തങ്ങള്ക്ക് സമയത്ത് സ്കൂളില് എത്താന് കഴിയുന്നില്ലെന്നുമായിരുന്നു അവരുടെ പരാതി. അവരുടെ പരാതികള് കുമ്മനം ശ്രദ്ധയോടെ കേട്ടു.
മണികണ്ഠേശ്വരത്ത് കുടുംബയോഗം. പിന്നീട് കുന്നുകുഴിയിലെ ബിജെപി തെരഞ്ഞെടുപ്പ് കമ്മിറ്റി ഓഫീസിലേക്ക്. ബിജെപി പ്രകടനപത്രികയില് ഉള്പ്പെടുത്തേണ്ട വനിതാ വിഷയങ്ങള് തയ്യാറാക്കിയത് സ്വീകരിക്കല് ചടങ്ങ്. ഇതിനായി നിയോഗിക്കപ്പെട്ട സമിതിയംഗങ്ങളായ സിമി ജ്യോതീഷ്, അഞ്ചന സുരേഷ്, വി. സുധര്മ്മ, ഹേമലത ശിവകുമാര് എന്നിവര് ചേര്ന്ന് 22 ഇന വിഷയങ്ങള് അടങ്ങിയ റിപ്പോര്ട്ട് കുമ്മനത്തിന് കൈമാറി. തുടര്ന്ന് ചെങ്കോട്ടുകോണം ശ്രീരാമദാസാശ്രമത്തിലേക്ക്. തിരിച്ച് പേരൂര്ക്കട തെരഞ്ഞെടിപ്പ് കമ്മിറ്റി ഓഫീസിലെത്തി പ്രവര്ക്കരുടെ യോഗങ്ങള്. പെള്ളുന്ന വെയിലിലും തിരക്കിട്ടതായിരുന്നു കുമ്മനത്തിന്റെ ഇന്നലത്തെ പര്യടനം.
