‘വധശിക്ഷ തന്നെ കൊടുക്കണം; അവര്‍ പുറത്തിറങ്ങരുത്’

പാനൂര്‍ (കണ്ണൂര്‍) : ‘അവര്‍ക്ക് വധശിക്ഷ തന്നെ കൊടുക്കണം. അവര്‍ പുറത്തിറങ്ങാന്‍ പാടില്ല’, സിപിഎം അക്രമത്തില്‍ കൊല്ലപ്പെട്ട ആര്‍എസ്എസ് പ്രവര്‍ത്തകന്‍ പാപ്പിനിശേരി അരോളിയിലെ സുജിത്തിന്റെ അമ്മ സുലോചന ഹൃദയം നീറി പറഞ്ഞ വാക്കുകളാണിത്. കണ്ണൂരിലെ സിപിഎം അക്രമ രാഷ്‌ട്രീയത്തിലെ പുതിയ ഇരയാണ് കൂലിപ്പണിക്കാരാനായിരുന്ന സുജിത്ത് എന്ന 24കാരന്‍. ‘രാത്രി ‘ഭക്ഷണം കഴിച്ച് കിടന്നുറങ്ങുകയായിരുന്ന മോനെ വിളിച്ചിറക്കി എന്റെ മുന്നിലിട്ടാണ് അവര്‍…..’ വാക്കുകള്‍ പൂര്‍ത്തികരിക്കാനാകാതെ അമ്മ വിതുമ്പി. ‘മകന്‍ രക്തം നല്‍കിയവന്റെ മകനും അക്രമി സംഘത്തിലുണ്ടായിരുന്നു.’

1989ല്‍ സിപിഎം സംഘം കൊലചെയ്ത അരോളിയിലെ ആര്‍എസ്എസ് പ്രവര്‍ത്തകനായ വിശ്വനാഥന്റെ കേസിലെ പ്രതിയായ പണിക്കര്‍ ചന്ദ്രനെ വാഹനാപകടമുണ്ടായപ്പോള്‍ ഓടിയെത്തി രക്തം നല്‍കിയത് സുജിത്താണ്. അതിനു പ്രചോദനമായത് ആര്‍എസ്എസ് ശാഖയിലെ പാഠങ്ങളായിരുന്നു. ആ ജീവനൊടുക്കാന്‍ ചന്ദ്രന്റെ മകന്‍ ലിജേഷും മാര്‍ക്‌സിസ്റ്റുകൂട്ടത്തിലുണ്ടായിരുന്നു. ലിജേഷിനു പാപ്പിനിശേരിയിലെ സിപിഎം ആയുധപരിശീലന കേന്ദ്രത്തില്‍ നിന്നുകിട്ടിയ പാഠങ്ങള്‍ അവനെ കൊലയാളിയാക്കി.

കൊടും കൊലനടത്തിയ ശേഷം പെണ്ണുകേസാണ് കൊലയ്‌ക്ക് കാരണമെന്ന് നുണപറഞ്ഞു. സിപിഎം ജില്ലാസെക്രട്ടറി തന്നെ അതു പ്രചരിപ്പിച്ചു. വളപട്ടണം പോലീസ് രാഷ്‌ട്രീയ കൊലപാതകമെന്ന് എഫ്‌ഐആര്‍ രജിസ്റ്റ്ര്‍ ചെയ്തതില്‍ നുണ പൊളിഞ്ഞു. മകനെ നഷ്ടപ്പെട്ട സുലോചനയ്‌ക്ക് സിപിഎം ആക്രമണത്തില്‍ കൈയെല്ലുകള്‍ പൊട്ടിയിരുന്നു. പിതാവായ ജനാര്‍ദ്ദനനും സഹോദരന്‍ ജയേഷിനും അക്രമത്തില്‍ സാരമായ പരിക്കുപറ്റി.

ഇക്കഴിഞ്ഞ ഫെബ്രുവരി 15ന് രാത്രിയാണ് സിപിഎം ക്രിമിനല്‍കൂട്ടങ്ങള്‍ സുജിത്തിനെ തല്ലിക്കൊന്നത് സിപിഎം നേതാവ് ഇ.പി. ജയരാജന്റെ വീടിനടുത്താണ് സുജിത്തിന്റെയും വീട്. പാപ്പിനിശേരി പഞ്ചായത്തില്‍ തദ്ദേശതെരഞ്ഞെടുപ്പില്‍ ബിജെപി 20ല്‍ 18സീറ്റിലും സ്ഥാനാര്‍ത്ഥിയെ നിര്‍ത്തി. മികച്ച പ്രകടനവും കാഴ്ചവെച്ചു. സുജിത്ത് ബൂത്ത് ഏജന്റായി ഇരുന്നതും സിപിഎമ്മിനെ അക്രമത്തിന് പ്രേരിപ്പിച്ചിട്ടുണ്ടാകാമെന്ന് നാട്ടുകാര്‍ പറയുന്നു. മകനെ തല്ലിക്കൊല്ലുന്നത് നേരിട്ടു കണ്ട അമ്മയും അച്ഛനും ഇപ്പോഴും ആ ഞെട്ടലില്‍ നിന്നും മോചിതമായിട്ടില്ല.

തെരഞ്ഞെടുപ്പിലൂടെ ഇവര്‍ വന്നാല്‍ എല്ലാം ശരിയാകുമെന്ന് മുദ്രാവാക്യമെഴുതി വെച്ചിരിക്കുന്നതുകണ്ട് ഭയമേറുകയാണ് സുജിത്തിന്റെ കുടുംബത്തെ പോലുളള നിരവധി കുടുംബങ്ങള്‍ക്ക്.