കണ്ണൂര്‍: കണ്ണൂരിലെ കോണ്‍ഗ്രസ്സ് പ്രവര്‍ത്തകുടെ വിയര്‍പ്പ് തുള്ളി വിറ്റ് കാശാക്കി കണ്ണൂരില്‍ കെട്ടിപ്പൊക്കിയ കോണ്‍ഗ്രസ്സിന്റെ ആസ്ഥാനമന്ദിരം തച്ചുടച്ച് വാടകക്കെട്ടിടത്തിലേക്ക് മാറ്റിയത് ഡിസിസി പ്രസിഡണ്ട് കെ.സുരേന്ദ്രനാണെന്ന് ഐക്യജനാധിപത്യ സംരക്ഷണ സമിതി നേതാവ് പി.കെ.രാഗേഷ്. ആസ്ഥാന മന്ദിരത്തിന്റെ പേരിലും പാവപ്പെട്ട പാര്‍ട്ടി പ്രവര്‍ത്തകര്‍ക്ക് ഇന്‍ഷുറന്‍സ് പരിരക്ഷ എന്ന് പറഞ്ഞും പിരിച്ച കോടികളും എവിടെയെന്ന് ഡിസിസി പ്രസിഡണ്ട് വ്യക്തമാക്കണമെന്നും പി.കെ.രാഗേഷ് പത്രസമ്മേളനത്തില്‍ ആവശ്യപ്പെട്ടു. കോടികളുടെ ഇടപാട് സംബന്ധിച്ച് മറുപടി പറയാന്‍ സാധിക്കാത്ത സാഹചര്യത്തിലാണ് കോണ്‍ഗ്രസ്സില്‍ നിന്ന് ഒരു വിഭാഗത്തെ പത്രസമ്മേളനം വിളിച്ച് പുറത്താക്കിയത്. തളിപ്പറമ്പ് നിയോജക മണ്ഡലത്തിലെ യുഡിഎഫ് സ്ഥാനാര്‍ത്ഥിക്കെതിരെ അപവാദ പ്രചാരണവും റിബല്‍ സ്ഥാനാര്‍ത്ഥിയെ നിര്‍ത്തുമെന്നും പറഞ്ഞ് ഭീഷണി മുഴക്കി കാരണം കാണിക്കല്‍ നോട്ടീസ് ലഭിച്ച വ്യക്തിയും, കോര്‍പറേഷന്‍ സ്റ്റാന്റിംഗ് കമ്മറ്റി തെരഞ്ഞെടുപ്പില്‍ പി.കെ.രാഗേഷിന്റെ വോട്ട് വാങ്ങി സ്റ്റാന്റിംഗ് കമ്മറ്റി ചെയര്‍മാനയ വ്യക്തിയെയും കൂട്ട് പിടിച്ചാണ് ഡിസിസി പ്രസിഡണ്ട് പുറത്താക്കല്‍ പത്രസമ്മേളനം വിളിച്ചത്. ഡിസിസി പ്രസിഡണ്ടിന് അല്‍പമെങ്കിലും ആത്മാഭിമാനമുണ്ടെങ്കില്‍ സ്റ്റാന്റിംഗ് കമ്മറ്റി ചെയര്‍മാന്‍മാരെ രാജിവെപ്പിക്കണമെന്നും രാഗേഷ് ആവശ്യപ്പെട്ടു. കോണ്‍ഗ്രസ്സ് വിമതന്‍മാരുടെ പ്രശ്‌നം മുഖ്യമന്ത്രി നേരിട്ടെത്തി ചര്‍ച്ച ചെയ്യുകയും നിര്‍ദ്ദേശങ്ങള്‍ നടപ്പിലാക്കാന്‍ ഡിസിസി പ്രസിഡണ്ടിനെ ചുമതലപ്പെടുത്തിയതുമാണ്. എന്നാല്‍ കെ.സുധാകരനും കെ.സുരേന്ദ്രനും കെ.എം.ഷാജിയും ചേര്‍ന്ന് ഇത് അട്ടിമറിക്കുകയായിരുന്നു. കോണ്‍ഗ്രസ്സിലെ മുതലാളിമാരായ സൂപ്പര്‍ ഹൈക്കമാന്റായാണ് ഇവര്‍ പെരുമാറുന്നത്. പള്ളിക്കുന്ന് മണ്ഡലം പ്രസിഡണ്ടിനെ മാറ്റുന്ന കാര്യം മുഖ്യമന്ത്രി തത്വത്തില്‍ അംഗീകരിച്ചതാണ്. കെ.സുധാകരന്‍ മൂഢസ്വര്‍ഗത്തിലാണ് ജീവിക്കുന്നത്. പാര്‍ലമെന്റ് തെരഞ്ഞെടുപ്പിലെ പരാജയം കാണിക്കുന്നത് സുധാകരന്റെ രാഷ്‌ട്രീയ പാപ്പരത്തമാണ്. കോണ്‍ഗ്രസ്സ് നേതൃത്വത്തിന്റെ കണ്ണ് തുറപ്പിക്കുന്നതിനു വേണ്ടി കണ്ണൂര്‍, അഴീക്കോട് നിയോജക മണ്ഡലങ്ങളില്‍ സ്ഥാനാര്‍ത്ഥിയെ മത്സരിപ്പിക്കുമെന്നും രാഗേഷ് പറഞ്ഞു. കായക്കല്‍ രാഹുല്‍, എ.എം.ജയറാം, എം.വി.പ്രദീപ്കുമാര്‍, ഡി.രവീന്ദ്രന്‍ എന്നിവരും പത്രസമ്മേളനത്തില്‍ പങ്കെടുത്തു.
Thursday, December 26, 2024
ഉമ്മന്‍ചാണ്ടിയുമായുണ്ടാക്കിയ ധാരണ അട്ടിമറിച്ചത് കെ.സുധാകരന്‍ കണ്ണൂരില്‍ ഡിസിസി ഓഫീസ് തച്ചുടച്ചത് കെ.സുരേന്ദ്രന്‍: പി.കെ.രാഗേഷ്
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
പ്രതികരിക്കാൻ ഇവിടെ എഴുതുക: