ന്യൂദല്ഹി: മുന് ആഭ്യന്തരമന്ത്രി പി. ചിദംബരം ഇസ്രത്ത് ജഹാന് കേസില് ഫയല് തിരുത്തിയത് എന്തടിസ്ഥാനത്തിലാണെന്നും ആരുടെ നിര്ദ്ദേശ പ്രകാരമായിരുന്നു അതെന്നും വ്യക്തമാക്കണമെന്ന് ബിജെപി ആവശ്യപ്പെട്ടു. ഇക്കാര്യത്തില് അന്നത്തെ പ്രധാനമന്ത്രിയ്ക്കും കോണ്ഗ്രസ് അദ്ധ്യക്ഷ സോണിയാ ഗാന്ധിയ്ക്കും എത്രത്തോളം പങ്കാളിത്തമുണ്ടെന്നു വ്യക്തമാക്കണമെന്നും ബിജെപി ദേശീയ വക്താവ് സുധാംശു ത്രിവേദി ആവശ്യപ്പെട്ടു. ഇസ്രത്ത് കേസില് പുറത്തുവരുന്ന വിവരങ്ങള് കോണ്ഗ്രസിനെയും നേതാക്കളെയും കൂടുതല് കുഴപ്പത്തിലാക്കുമെന്നും സുധാംശു പറഞ്ഞു.
രാജ്യസുരക്ഷയുടെ കാര്യത്തില് കോണ്ഗ്രസ് നികൃഷ്ടമായ നടപടികളാണ് കൈക്കൊണ്ടത്. ഹിന്ദു ഭീകരതയെന്നും കാവി ഭീകരതയെന്നും മറ്റുമുള്ള പ്രയോഗത്തിലൂടെ കോണ്ഗ്രസ് ഹിന്ദു സമൂഹത്തെ മാത്രമല്ല, ദേശീയ പതാകയിലെ ഒരു നിറത്തെയാണ് അപമാനിച്ചിരിക്കുന്നത്. കോണ്ഗ്രസ് ചെയ്യുന്നതെല്ലാം കസേര കിട്ടാന് വേണ്ടിയാണ്, സുധംശു പറഞ്ഞു. എന്ഐഎ ഉള്പ്പെടെയുള്ള ഏജന്സികളുടെ അന്വേഷണത്തിന്റെ ഫലം വരും ദിവസങ്ങളില് പുറത്തുവരുമ്പോള് കൂടുതല് കാര്യങ്ങള് വ്യക്തമാകും. ബിജെപിയോ ഏതെങ്കിലും ഹിന്ദു സംഘടനകളോ ഒരുതരത്തിലുമുള്ള ഭീകരപ്രവര്ത്തനങ്ങളിലും പങ്കാളികളല്ല, ആകുകയുമില്ല, ബിജെപി വക്താവ് പറഞ്ഞു.
ഭീകര പ്രവര്ത്തനങ്ങളുടെ കാര്യത്തില് ഹിന്ദു ഭീകരതയെന്ന പേരില് കോണ്ഗ്രസ് ഉന്നയിക്കുന്ന ആരോപണങ്ങളെ ബിജെപി അപലപിക്കുന്നു. കോടതി പരിഗണനയിലിരിക്കുന്ന കേസുകളാണതെല്ലാം. അവയില് കോടതിയുടെ വിധി വരട്ടെ. എന്നാല്, അതിനിടെ വിവരാവകാശ നിയമപ്രകാരം ലഭിച്ച വിവരങ്ങളുടെയും അന്താരാഷ്ട്ര ഏജന്സികള് പുറത്തുവിടുന്ന വിവരങ്ങളുടെയും അടിസ്ഥാനത്തില് കോണ്ഗ്രസിന്റെ ഭരണത്തിന്കീഴില് നടന്നതെല്ലാം ഗൗരവതരമായ കാര്യമാണെന്നു വ്യക്തമാകുന്നു. രാജ്യസുരക്ഷയെ അപകടപ്പെടുത്തുന്നതായിരുന്നു സര്ക്കാരിന്റെ എല്ലാ നടപടികളും.
2009 ഡിസംബറില് കോണ്ഗ്രസ് പാര്ട്ടി ഹിന്ദു ഭീകരതയെന്ന വാക്കുപയോഗിച്ചു. 2010 ജൂലൈയില് അമേരിക്കന് ഉദ്യോഗസ്ഥരുടെ സാന്നിദ്ധ്യത്തില് കോണ്ഗ്രസ് ഉപാധ്യക്ഷന് ഹിന്ദു ഭീകരതയാണു കൂടുതല് അപകടകരമെന്ന് പ്രഖ്യാപിച്ചു. തികച്ചും അടിസ്ഥാന രഹിതവും തെളിവൊന്നുമില്ലാത്തതുമായ ഈ പ്രസ്താവന ഇതുവരെ തിരുത്താന് കോണ്ഗ്രസോ രാഹുലോ തയ്യാറായിട്ടില്ല.
അതിനു ശേഷം 2010-ല് ആഭ്യന്തരമന്ത്രി പി. ചിദംബരം പാര്ലമെന്റില് ഹിന്ദു ഭീകരതയുണ്ടെന്നും ചില സംഭവങ്ങളില് അതു തെളിഞ്ഞിട്ടുണ്ടെന്നും പ്രസ്താവിച്ചു. പിന്നാലെ കോണ്ഗ്രസ് നേതാവ് ദിഗ്വിജയ് സിങ് മുംബൈയില് ഒരു പുസ്തകം പ്രകാശിപ്പിച്ചു, മലേഗാവ് സ്ഫോടനം ആര്എസ്എസ് ആസൂത്രണം ചെയ്തതാണെന്ന് സ്ഥാപിക്കുന്നതായിരുന്നു പുസ്തകം. കോടതിയുടെ പരിഗണനയിലിരിക്കുന്ന, വിവിധ ഏജന്സികള് അന്വേഷണം നടത്തിക്കൊണ്ടിരിക്കുന്ന കേസുകളില് ഫലം വരും മുമ്പേ വിധി പ്രഖ്യാപിച്ച കോണ്ഗ്രസ്
നേതാക്കളുടെ നടപടിക്കു പിന്നില് ഒരു യുക്തിയും ഉണ്ടായിരുന്നില്ലെന്ന് ആര്ക്കും ബോധ്യമാകും. ഇതുയര്ത്തുന്നത് കോണ്ഗ്രസ് പാര്ട്ടിയുടെയും സര്ക്കാരിന്റെയും ലക്ഷ്യം എന്തായിരുന്നുവെന്ന് വ്യക്തമാകുകയാണ്. രാഷ്ട്രീയ ലക്ഷ്യം വെച്ച് മുന്നിശ്ചയിച്ച പരിപാടി ആവിഷ്കരിക്കുകയായിരുന്നു.
ഇസ്രത് ജഹാന് കേസില് ഇക്കാര്യങ്ങള് സുവ്യക്തമാണ്. അവിടെ ഫയല് തിരുത്തിയതാരാണ്. കല്ക്കരി കുംഭകോണക്കേസുകളുടെ ഫയലുകള് കാണാതായതെങ്ങനെയാണ്, സുധാംശു ചോദിച്ചു.
